Вы тут

Што хвалюе жыхароў Гомельшчыны?


Зварот па дапамогу ад работнікаў фермы пад Акцябрскім, просьба вырашыць праблему з транспартам на Веткаўшчыне і пытанні выдзялення зямлі фермерам з Буда-Кашалёўскага, Ельскага і Жыткавіцкага раёнаў... На працягу трох гадзін старшыня Гомельскага аблвыканкама Генадзь Салавей прымаў тэлефонныя звароты грамадзян рэгіёна: патэлефанавала больш за сорак чалавек.


Прамая лінія губернатара выйшла традыцыйна гарачая: паступаў званок, чалавек заяўляў пра праблему, Генадзь Салавей слухаў і, застаючыся на лініі, паралельна па тэлефоне даручаў кіраўнікам, у чыёй кампетэнцыі тэма, разабрацца.

Так, на прамую лінію патэлефанавалі жыхары вёскі Шкава Акцябрскага раёна. Адна з работніц тутэйшай гаспадаркі перадала калектыўную просьбу: ратуйце нашу ферму! Кармоў паступае недастаткова, няма ветурача, у выніку надоі ўпалі — ферму вось-вось закрыюць. Калектыў абяцаюць не кідаць, а вазіць у іншую гаспадарку, але работнікі са Шкавы — у асноўным сямейныя пары — хвалююцца, што страцяць работу. «Не перажывайце, ферма застанецца», — адказвае губернатар і тут жа па другой лініі дае даручэнне кіраўніцтву раёна разабрацца з пастаўкамі кармоў і ветдапамогай для гаспадаркі.

Па дапамогу да кіраўніка рэгіёна ад імя вяскоўцаў з Навасёлак, Ягаднага, Шарсціна, Радугі, што ў Веткаўскім раёне, звярнулася мясцовая жыхарка адной з вёсак. «Рэйсавы аўтобус ходзіць толькі ўранку і позна ўвечары. Маршрутчыкі раніцай у панядзелак і аўторак наогул ладзяць сабе выхадны. Людзям не дабрацца, а што рабіць, калі большасць вясковых працуе ў горадзе», — абураецца Таццяна Іванаўна і ад імя вяскоўцаў просіць вырашыць праблему з транспартным забеспячэннем.

Прыняцця рашэння па некалькіх калектыўных зваротах чакаюць таксама жыхары Гомеля. Старшыня гаражнага кааператыва па вуліцы Віцебскай патэлефанавала з просьбай дапамагчы наладзіць электразабеспячэнне: чацвёрты год на аб'екце няма святла. Генадзь Салавей адразу звязаўся з кіраўніцтвам РУП «Гомельэнерга»: пастаўлена задача ў кароткі тэрмін разабрацца ў прычынах «светлавога калапсу» і дапамагчы людзям.

Гамяльчанін Андрэй Гарыевіч агучыў просьбу жыхароў шматпавярховак па вуліцах 2-й Авіяцыйнай, Кожара, Савецкай. Людзі просяць афіцыйна надаць статус сквера зялёнай зоне ў раёне гасцініцы «Турыст». Яны звяртаюць увагу, што па генплане такі статус мае толькі 0,6 гектара зямлі ў скверы, але неабходна захаваць усю тэрыторыю парку. Мужчына паведаміў, што жыхары дамоў актыўна добраўпарадкоўваюць тэрыторыю: высадзілі дзясяткі дрэў, самі забяспечваюць паліўку пасадак. Для іх важна абараніць зялёны куток ад магчымай забудовы па ўшчыльненні.

— Рашэнне ў гэтай сітуацыі адназначнае: мы павінны захаваць зялёную зону, — супакойвае Генадзь Салавей. Пытанне захавання сквера застанецца на кантролі.

Падчас прамой лініі гамяльчане таксама паднялі праблему водазабеспячэння ў дамах у цэнтры горада па вуліцы Артылерыйскай. Высветлілася, што з-за тэхнічнага застою раніцай з кранаў ідзе рудая вада.

— Уся вада, якая пастаўляецца ў кватэры, павінна быць належнай якасці, — каментуе Генадзь Салавей і дае даручэнне адказным арганізацыям вырашыць праблему з іржавай вадой.

Між тым некалькі гамяльчан патэлефанавалі і з калектыўнымі падзякамі на адрас улад. Так, актывісты Савецкага раёна Гомеля запрасілі губернатара ацаніць добраўпарадкаванне дваровых тэрыторый, якое робіцца сіламі грамадзян і камунальнікаў. Жыхары мікрараёна Хутар падзякавалі за ўвагу да развіцця інфраструктуры ў масіве новабудоўляў. Пасля сустрэчы губернатара з ініцыятыўнай групай «хутаранцаў» пачалася распрацоўка праектна-каштарыснай дакументацыі для будучай школы. Карыстаючыся выпадкам, жыхары мікрараёна закранулі пытанне выкарыстання будынка былога дзіцячага дома на «Крышталі». Плануецца размясціць там паліклініку, паведамілі ў аблвыканкаме.

Пасля прамой лініі журналісты пацікавіліся ў Генадзя Салаўя пра яго меркаванне наконт эфектыўнасці работы з тэлефоннымі зваротамі грамадзян.

— Калі праблема вырашальная, рэакцыя павінна быць імгненная, — адзначыў старшыня аблвыканкама. — Часам вырашэнне таго ці іншага вострага пытання патрабуе дадатковага вывучэння і больш грунтоўнага разгляду. Людзі шукаюць дапамогі не толькі ў сваім рэгіёне, звяртаюцца ў Адміністрацыю Прэзідэнта, у іншыя органы.

На думку кіраўніка рэгіёна, у раёнах праблемы людзей можна вырашыць больш аператыўна. Менавіта мясцовыя ўлады павінны забяспечваць камфорт людзей на тэрыторыі іх пражывання.

Наталля КАПРЫЛЕНКА

Фота БЕЛТА

Выбар рэдакцыі

Грамадства

Спрыяльнае навакольнае асяроддзе ствараецца там, дзе над гэтым працуюць на месцах — у гарадскіх мікрараёнах ці на вясковых падворках і вуліцах

Спрыяльнае навакольнае асяроддзе ствараецца там, дзе над гэтым працуюць на месцах — у гарадскіх мікрараёнах ці на вясковых падворках і вуліцах

Маленькі прынц у аднайменнай казцы кожны дзень пачынаў з таго, што прыводзіў у парадак сваю планету. 

Калейдаскоп

Вясёлыя гісторыі чытачоў

Вясёлыя гісторыі чытачоў

Чым бы дзіця ні цешылася, абы не плакала. Пажадана, каб нікога да слёз не даводзіла. Але ж бывае па-іншаму.

Грамадства

«Дзякуй за вашу працу! Вы — героі на ўсе часы!»

«Дзякуй за вашу працу! Вы — героі на ўсе часы!»

Як працуюць з COVІD-пацыентамі дзіцячыя ўрачы.

Грамадства

Уступленне ў дарослае жыццё — як выхад у космас

Уступленне ў дарослае жыццё — як выхад у космас

Псiхолаг тлумачыць, чаму паўза пасля заканчэння школы — не трагедыя.