Вы тут

Прэзідэнт: Маё сэрца канчаткова і беспаваротна аддадзена гэтай зямлі і гэтым людзям


Такую думку Прэзідэнт Беларусі Аляксандр Лукашэнка выказаў падчас гала-канцэрта «Мая Александрыя».  Канцэрт стаў галоўнай падзеяй рэспубліканскага свята «Купалле» («Александрыя збірае сяброў»), што праходзіць у аграгарадку Александрыя Шклоўскага раёна 11-12 ліпеня.


Прэзідэнт падзяліўся: пад'язджаючы на свята, ён задумаўся, што самае важнае ў жыцці. «Самае галоўнае, што час няўмольна рухаецца наперад. Зусім нядаўна мы праводзілі тут першае свята, а сёння ўжо больш за дзясятак іх адбылося тут, на гэтай дабратворнай зямлі, на беразе гэтай выдатнай  ракі (Дняпра -  «Зв.»), якая аб'ядноўвае лёсы трох славянскіх народаў — расіян, украінцаў і беларусаў», — падкрэсліў кіраўнік краіны.

Ён адзначыў, што ўсім сэрцам шчаслівы вітаць усіх на гасціннай александрыйскай зямлі. Па яго словах, гэта свята - нагода паглядзець адзін аднаму ў вочы, пагаварыць са старымі таварышамі, займець новых сяброў, удыхнуць напоўніцу летняе, напоўненае водарам мёду і спеючых каласоў паветра беларускіх палёў, пачуць спевы птушак, убачыць зорнае неба без гарадскіх агнёў.

«Мы маем магчымасць зноў пагрузіцца ў тое, што было самым звычайным у нашым басаногім дзяцінстве, але стала для многіх у сучасным свеце сапраўднай раскошай. Такую выдатную магчымасць вось ужо больш за 10 гадоў дае нам гэты народны фестываль з на дзіва цёплай, добрай і светлай атмасферай, — сказаў Аляксандр Лукашэнка. — Сотні тысяч гледачоў, гаспадары рамесных і фермерскіх падворкаў, беларускія і замежныя артысты, якія імкнуцца прыехаць да нас (і гэты складаны год не выключэнне), не проста сталі сябрамі, а амаль парадніліся».

Шчырае сяброўства і жаданне сустрэцца заўсёды былі мацнейшыя за любыя перашкоды і адлегласці.

На думку кіраўніка краіны, «такіх свят, якія б аб'ядноўвалі асноўныя славянскія народы, няшмат»: «Гэта, можна сказаць, рэпетыцыя асноўнага свята, якое адбудзецца праз некалькі дзён – «Славянскага базару ў Віцебску».

Нездарма кажуць, што рай для кожнага чалавека там, дзе знаходзіцца яго сэрца. «Не толькі маё, але і ўсіх, хто сабраўся тут, сэрца тут. Маё сэрца канчаткова і беспаваротна аддадзена гэтай зямлі і гэтым людзям. Усім беларусам, нашаму мудраму і моцнаму народу. Народу, які за многія стагоддзі сваёй гісторыі перажыў нямала бед і няшчасцяў, але ніколі і ні перад кім не станавіўся на калені. Народ, які выдатна ведае кошт слоў і спраў, які выпакутаваў права жыць у сваёй дзяржаве і самастойна выбіраць і вызначаць сваю будучыню», — дадаў Прэзідэнт.

2020-ы завяршае трылогію «Малой радзімы». Кіраўнік краіны папрасіў прысутных азірнуцца вакол, паглядзець, колькі добрага зроблена намі для роднай зямлі, узгадайць, якой яна была некалькі гадоў таму і пяць, дзесяць, чвэрць стагоддзя таму.

«Ваша вялікая заслуга ў тым, што ўжо не адно пакаленне беларусаў расце ў шчаслівайай, чыстай, мірнай і прыгожай краіне. Краіне, якую стварылі мы з вамі практычна з нуля, на абломках вялікай імперыі, імя якой Савецкі Саюз. Так, было нялёгка. Вядома, нешта атрымалася на «выдатна», нават лепш, чым мы сабе калісьці ўяўлялі. Штосьці на «добра». А над чымсьці трэба будзе яшчэ нямала працаваць. Бо мы ж з вамі дакладна ведаем: бохан свежага духмянага натуральнага хлеба - гэта вынік доўгай, упартай і карпатлівай працы. І ніяк інакш», — канстатаваў Аляксандр Лукашэнка.

Па яго словах, адзіны спосаб стварыць найлепшую будучыню для сваёй краіны і для свайго народа — працаваць на вынік, аб'ядноўвацца перад любымі выпрабаваннямі, пераадольваць усе цяжкасці.

«Нездарма ў савецкія часы гаварылі: перш чым спытаць, што Радзіма зрабіла для цябе, спытай, а што я зрабіў для Радзімы для сваёй краіны для свайго народа? І адкажы на гэтае пытанне сумленна, — нагадаў Прэзідэнт. —  Сапраўдная любоў да Айчыны - стваральная. Таму давайце і далей разам будаваць нашу Беларусь справядлівай, бяспечнай і моцнай краінай. Зараз  гэта вельмі актуальна. Калі мацнейшыя імкнуцца перадзяліць свет, зламаць устоі, навязаць больш слабым краінам сваё мысленне», — дадаў Аляксандр Лукашэнка і выказаў думку, што ў такія часы галоўнае —  слухаць сваё сэрца, якое заўсёды пакажа самы верны і правільны шлях у будучыню.

Марыя ДАДАЛКА

Выбар рэдакцыі

Грамадства

«Да штыка ён пяро прыраўняў». Узгадваем ваеннага карэспандэнта Канстанціна Сіманава

«Да штыка ён пяро прыраўняў». Узгадваем ваеннага карэспандэнта Канстанціна Сіманава

28 лістапада 2020 года спаўняецца 105 гадоў з дня нараджэння вядомага рускага пісьменніка, ваеннага карэспандэнта і журналіста Канстанціна Сіманава. 

Грамадства

«Калі б не сям'я Абрамукоў, наш род перастаў бы існаваць яшчэ ў 1941 годзе». Расіянка з Ніжняга Ноўгарада знайшла ў беларускай вёсцы сваякоў

«Калі б не сям'я Абрамукоў, наш род перастаў бы існаваць яшчэ ў 1941 годзе». Расіянка з Ніжняга Ноўгарада знайшла ў беларускай вёсцы сваякоў

І аднавяскоўцаў людзей, якія ў час вайны ратавалі сям'ю яе бабулі, жонкі афіцэра Чырвонай Арміі.

Спорт

«Вікторыя», якая робіць з Гродна баскетбольную сталіцу

«Вікторыя», якая робіць з Гродна баскетбольную сталіцу

Гродна — горад з багатай не толькі культурнай, але і баскетбольнай гісторыяй. 

Грамадства

У Гродне жыхары кватэр адмовіліся падчас капітальнага рамонту здымаць аздабленне з балконаў. На іх падалі ў суд

У Гродне жыхары кватэр адмовіліся падчас капітальнага рамонту здымаць аздабленне з балконаў. На іх падалі ў суд

Такога кшталту справа ў судзе Кастрычнiцкага раёна Гродна разглядаецца ўпершыню.