01 снежня, аўторак

Вы тут

Хто выступае ў фаер-шоу: артысты ці экстрэмалы?


Аб тым, што такое фаер-шоу, у наш час ведае, напэўна, кожны. Гэта маляўнічае, эмацыянальнае і па-сапраўднаму небяспечнае прадстаўленне. Шоу, у якім артысты гуляюць з агнём у прамым сэнсе слова. Для кагосьці адважныя выступоўцы, што прыручылі стыхію, здаюцца сапраўднымі героямі, а некаторыя лічаць іх вар'ятамі. Хто ж яны: артысты ці экстрэмалы? На гэтае і іншыя пытанні нам адказаў кіраўнік мінскага тэатра агню «Flаmеn» Дзмітрый Пятровіч.


Марта Разумейчык

— З гэтым экстрэмальным відам мастацтва я пазнаёміўся даўно і зусім выпадкова. Аднойчы, гуляючы па вуліцы, сустрэў фаершчыкаў, яны па-майстэрску спраўляліся з агнём. Іх трукі мяне проста скарылі, я вырашыў пагутарыць з імі і пазнаёміўся бліжэй. У выніку, убачыўшы, што мяне гэта справа зацікавіла, хлопцы прапанавалі пазаймацца з імі і павучыцца. Спачатку не аддаваў новаму захапленню шмат увагі — для мяне тое было проста хобі, але потым зацягнула, і ў выніку я стаў прафесіяналам у гэтай сферы.

З часам наш герой зразумеў, што яго жаданні і магчымасці сталі выходзіць за рамкі аднаго артыста і што ён хоча не проста быць часткай нейкага калектыву, а стварыць свой — літаральна з нуля. На шчасце, побач знаходзіліся тыя, хто падтрымаў ініцыятыву Дзмітрыя. Цяпер у яго камандзе сем артыстаў асноўнага складу, аднак колькасць можа павялічвацца ў залежнасці ад сезона.

— Пры наборы «навабранцаў» у шэрагі фаершчыкаў я звяртаю ўвагу на многія фактары. Першае — вядома ж, наяўнасць артыстызму, бо для мяне «ўтаймавальнік агню» — найперш артыст. Ён дорыць людзям шоу, зачароўвае іх, таму харызма лішняй дакладна не будзе. Акрамя таго, чалавек, які ўступіў у гэтую справу, павінен быць творчы і крэатыўны. Абсалютна ўсе нумары мы прыдумляем самастойна, і, акрамя элементаў фаер-шоу, закранаем харэаграфію і тэатральнае мастацтва, а таксама падбіраем музыку і прадумваем уласныя вобразы. Ну і, вядома ж, у нашых артыстаў проста абавязана быць «галава на плячах» і адказнасць. Бо мы круцім не праекцыяй, а сапраўдным агнём, які можа нанесці сур'ёзныя траўмы. Што датычыцца ўзросту і фізічнай падрыхтоўкі, то гэта абсалютна індывідуальна. Але я раіў бы пачынаць не раней за васямнаццаць гадоў.

У арсенале ў «вогненных» артыстаў, акрамя трукаў, маецца яшчэ мноства атрыбутаў, што выкарыстоўваюцца падчас трэніровак і выступленняў. Інвентар разнастайны, самае папулярнае — гэта паі, папросту кажучы — мячыкі на ланцугах. Акрамя гэтага, часта выкарыстоўваецца ланцуг, на якім стаіць кнот, прамочаны гаручай сумессю, ён называецца роуп-дарт. Ёсць яшчэ вееры, палмы, дабл-стаф, каметы, кубы і многае іншае. З усімі вышэйпералічанымі штукамі фаершчыкі ствараюць акрабатычныя, харэаграфічныя, тэатралізаваныя нумары. А вось адзін з самых папулярных трукаў сярод гледачоў — выдзіманне агню — Дзмітрый і яго каманда не выконваюць, нягледзячы на ўсю яго эфектнасць. Ён лічыць яго самым небяспечным і рызыкоўным сярод усіх астатніх, бо нават пры захаванні тэхнікі бяспекі могуць адбыцца неспадзяванкі.

— Наогул, захаванне тэхнікі бяспекі ў фаершчыкаў з'яўляецца прыярытэтным заняткам. Не варта забываць аб тым, што агонь усё-такі не цацка, як бы банальна гэта ні гучала, а стыхія, непадуладная чалавеку, і далёка не заўсёды яна паддаецца кантролю па нашым жаданні. На шчасце, ні ў мяне, ні ў маёй каманды сур'ёзных траўмаў не было, а ўсё таму, што пачаткоўцы праходзяць строгі інструктаж і падрыхтоўку. Пачынаць займацца «навабранцам» трэба абавязкова з трэніровачнага рэквізіту і пад наглядам вопытных артыстаў. Першыя крокі з агнём яны змогуць зрабіць ужо праз некалькі месяцаў, а праз паўгода — паспрабаваць сябе ў ролі артыста. Зрэшты, па тэрмінах усё індывідуальна, у таленавітых навучэнцаў усе гэтыя этапы могуць праходзіць хутчэй. У любым выпадку трэба абавязкова запасціся цярпеннем, стараннасцю і жаданнем працаваць над сабой.

Яўгенія Маджарава.

У прафесіі артыста вогненнага тэатра, як і ў любой іншай, ёсць свае плюсы і мінусы. У ходзе нашай гутаркі Дзмітрый не раз падкрэсліваў вартасці гэтай працы, напрыклад, незвычайнасць, магчымасць творчага развіцця і крэатыўнага мыслення, новыя знаёмствы з цікавымі людзьмі і, вядома ж, адрэналін, які атрымліваеш вялізнымі дозамі пасля кожнага выступлення. А вось над недахопамі наш суразмоўнік думаў вельмі доўга.

— Мінусам можна назваць хіба што пастаянную занятасць у выхадныя і святы. Хоць з іншага боку, наша работа — гэта і ёсць пастаяннае свята! На мерапрыемствах, дзе мы выступаем, не атрымліваецца сумаваць, так што ў стане апошняга мы знаходзімся пастаянна. Фаершчыкаў нельга параўнаць з людзьмі, якія працуюць у офісе, наш занятак неверагодна цікавы і творчы. Мы не сядзім на месцы з-за раз'ездаў, пастаянна прыдумляем і спрабуем нешта новае і захапляльнае. Таму атрымліваецца, што ў маёй прафесіі для мяне няма недахопаў! (Смяецца).

У звычайны час Дзмітрый са сваёй камандай часта гастралююць па прасторах нашай краіны, таксама выязджаюць за мяжу дзяліцца з калегамі сваім вопытам. У творчым адпачынку, які здарыўся з-за напружанай эпідэміялагічнай сітуацыі, ён прыдумляе і прапрацоўвае з калектывам усё больш новых і цікавых трукаў і нумароў, каб потым з новай сілай скараць сэрцы сваіх гледачоў магіяй агню.

Ангеліна НОВІКАВА, студэнтка ІV курса Беларускага дзяржаўнага ўніверсітэта культуры і мастацтваў

Фота дадзены суразмоўнікам

Выбар рэдакцыі

Грамадства

Што мяняецца з 1 снежня

Што мяняецца з 1 снежня

Вырасце памер пенсiй: па ўзросце, за выслугу гадоў, па iнвалiднасцi, з прычыны страты кармiцеля. 

Грамадства

​Што павiнны зрабiць на прадпрыемствах, каб папярэдзiць распаўсюджванне COVID-19

​Што павiнны зрабiць на прадпрыемствах, каб папярэдзiць распаўсюджванне COVID-19

Мiнiстэрства аховы здароўя распрацавала рэкамендацыi па прафiлактыцы каранавiруснай iнфекцыi ў арганiзацыях.

Грамадства

Бонусы для альтруiстаў могуць быць прадугледжаны законам аб валанцёрскай дзейнасцi

Бонусы для альтруiстаў могуць быць прадугледжаны законам аб валанцёрскай дзейнасцi

Пра гэтыя i iншыя прапановы ў законапраект аб валанцёрскай дзейнасцi разважалi эксперты падчас круглага стала.

Грамадства

«Да штыка ён пяро прыраўняў». Узгадваем ваеннага карэспандэнта Канстанціна Сіманава

«Да штыка ён пяро прыраўняў». Узгадваем ваеннага карэспандэнта Канстанціна Сіманава

28 лістапада 2020 года спаўняецца 105 гадоў з дня нараджэння вядомага рускага пісьменніка, ваеннага карэспандэнта і журналіста Канстанціна Сіманава.