Паляўнічыя і рыбаловы справілі наваселле і займелі сваю ікону

Супрацоўнікі выканаўчага апарата Беларускага таварыства паляўнічых і рыбаловаў пераехалі ў новы двухпавярховы будынак па адрасе — Мінск, Лагойскі тракт, 5. Цырымонія яго адкрыцця адбылася 22 чэрвеня.

«Наваселле — гэта заўсёды свята, — каментуе кіраўнік БТПР Ігар Шуневіч. — Мы пачынаем новае жыццё са старымі традыцыямі, але ўжо з новым напаўненнем. Камфорт працы і жыцця шмат значаць для людзей. У новым будынку нам будзе зручней і працаваць, і прымаць гасцей».

Раней таварыства арандавала паверх у адным з мінскіх будынкаў. Цяпер калектыў займеў магчымасць працаваць у больш камфортных умовах. Мясцовыя ўлады пайшлі насустрач і знайшлі для яго будынак, які пуставаў.Там зроблены рамонт. 

Таксама ў дзень адкрыцця адбылося асвятленне новага будынка і саборнага абразу заступніцы паляўнічых і рыбаловаў Рэспублікі Беларусь Мітрапалітам Мінскім і Заслаўскім, Патрыяршым Экзархам усяе Беларусі Веніямінам.

«Благадаць Святога Духу рэдка ўваходзіць бачным чынам, але людзі, уважлівыя да духоўнага жыцця, якія маюць чулае сэрца, адчуваюць, як змяняецца абстаноўка», — падкрэсліў міртапаліт пасля асвячэння.

Трэба сказаць, што паляўнічыя і рыбаловы сёння займелі не толькі новы будынак, але і абраз, на якім адлюстравана яўленне вобразу Жыровіцкай Найсвяцейшай Багародзіцы пастушкам у лесе. Сярод густога гушчару на дзікім дрэве тыя ўбачылі маленькі абраз, ад якога зыходзіла незвычайнае ззянне. Вакол гэтай дзеі на іконе намаляваны вобразы Святога Андрэя, святога Мікалая, а таксама заступніка паляўнічых Святога Трыфана.

«Гэта саборная ікона Беларускага таварыства паляўнічых і рыбаловаў выраблена ў Жыровіцкай іканапіснай майстэрні спецыяльна па нашай замове. Яе літаграфіі будуць раздадзены ўсім супрацоўнікам нашых падраздзяленняў. Я лічу, што Божай дапамогі ўсім нам не стае, а яна так патрэбна», — сказаў журналістам падчас адкрыцця кіраўнік БТПР Ігар Шуневіч. Ён лічыць пераезд на новае месца працы адным з этапаў станаўлення гэтай грамадскай арганізацыі.Будынак на Лагойскім тракце, 5 і ікону, пастаўленую на пачэснае месца ў адным з яго пакояў, асвяціў Мітрапаліт Мінскі і Заслаўскі, Патрыяршы Экзарх Усяе Беларусі Веніямін.

Беларускае таварыства паляўнічых і рыбаловаў было створана ў 1921 годзе. На сённяшні дзень яно налічвае каля 70 тысяч членаў. У склад аб’яднання ўваходзяць 6 абласных і 107 раённых арганізацыйных структур.

Ганна ЛАГУН, Лізавета ГОЛАД

Фота Лізаветы ГОЛАД