Ігар Шуневіч: «У нас павінен быць свой рэйтынгавы інструмент ацэнкі трафеяў»

У інтэрнэт-прасторы з’явілася інфармацыйная сістэма, накіраваная на збор і прадстаўленне звестак аб найбольш значных поспехах паляўнічых — Нацыянальная трафейная кніга Рэспублікі Беларусь.

З далёкіх сівых часін праявілася цікавасць чалавека да паляўнічых трафеяў. Калі па абшарах нашай планеты вандравалі шарсцістыя маманты, стэпавыя бізоны і гіганцкія алені, а стэпы і лясы кішэлі ад шаблезубых тыграў і іншых прадстаўнікоў старажытнага жывёльнага свету, рогі, іклы, чэрапы і шкуры звяроў ў першую чаргу былі доказам майстэрства, смеласці і моцы паляўнічага і толькі потым матэрыялам для стварэння адзення, зброі, прылад працы, а таксама будоўлі і ўпрыгожвання жылля.

Прайшлі стагоддзі, паляванне са сродка да існавання ператварылася ў экстрэмальную форму баўлення часу, а трафеі — у сімвал меткага вока і моцнай вытрымкі і элемент інтэр’ера.

Да пачатку ХХ ст. матэрыяльныя доказы паспяховага палявання ацэньваліся па розных параметрах: размеру, форме, вонкавай прыцягальнасці. Але ў 1920-х гг. Аўстрыя, Германія, Чэхаславакія і Венгрыя распрацавалі адзіную сістэму ацэнкі некаторых відаў трафеяў. Яе пакрысе ўдасканальвалі, пакуль у 1952 г. Міжнародны з’езд паляўнічых у Мадрыдзе не ўзгадніў методыку, на якой заснавана сучасная версія сістэмы ацэнкі.

Врез. Згодна Правіл палявання, зацверджаных Указам Прэзідэнта Рэспублікі Беларусь ад 21 сакавіка 2018 г. № 112 (у рэд. ад 16.09.2020 № 345), паляўнічыя трафеі — іклы і рогі, якія ўтвараюць адзінае цэлае з чэрапам або лобнай косткай, чэрапы, радзей шкуры, якія могуць ацэньвацца ў парадку, вызначаным Міністэрствам лясной гаспадаркі Рэспублікі Беларусь.

Нацыянальная трафейная кніга Рэспублікі Беларусь (кніга) — інфармацыйная сістэма, якая кумулюе звесткі пра паляўнічыя трафеі, здабытыя на тэрыторыі паляўнічых тэрыторый і ў іншых месцах пражывання паляўнічых жывёл нашай краіны. Старшыня Рэспубліканскай рады Беларускага таварыства паляўнічых і рыбаловаў (БТПР) Ігар Шуневіч на прэзентацыі кнігі, што адбылася напрыканцы гэтага студзеня, адзначыў: «Наша краіна мае даўнія паляўнічыя традыцыі, таму ў нас павінен быць свой рэйтынгавы інструмент ацэнкі трафеяў. Мы звярнуліся да сусветнага вопыта вядзенне такіх кніг, ацанілі магчымасці яе стварэння. Быў вызначаны падрадчык, які тэхнічна ажыццявіў задуму, і сёння мы гатовы прапанаваць вынік. Трафейная кніга ўжо працуе і чакае напаўнення».

Па словах намесніка начальніка ўпраўлення палявання, рыбалоўства і турызму БТПР Уладзіміра Казлоўскага, каб зафіксаваць трафей у кнізе, паляўнічаму неабходна яго здабыць і ацаніць. Затым зарэгістравацца на сайце БТПР і падаць заяўку, якая разгледжваецца на працягу 3 дзён. Пазначыць свае прозвішчы, месца і дату здабычы, сертыфікат паляўнічага трафея, колькасць набраных балаў і некаторыя іншыя звесткі, а таксама прыкласці фота трафея.

Апрача збору інфармацыі аб трафеях, кніга створана для развіцця трафейнай справы, правядзення аналізу і кантролю стану папуляцыі жывёл, а таксама папулярызацыі трафейнага палявання. Так, на аснове звестак гэтага электроннага рэсурсу плануецца правядзенне конкурсу «Лепшы паляўнічы трафей» з дзвюма намінацыямі — «Вялiкая беларуская пяцёрка» і «Вялiкая беларуская сямёрка» і адпаведнымі нагруднымі знакамі-узнагародамі.

Так, знак «Вялікая беларуская сямёрка» атрымаюць паляўнічыя-мужчыны, якія за пяць гадоў здабылі «залатыя» трафеі: лася, аленя, казулю, ваўка, кабана, зубра і глушца. «Вялікая беларуская пяцёрка» чакае беларускіх жанчын-паляўнічых, якія «ўзялі» лася, аленя, казулю, ваўка і кабана. Кожная ўзнагарода выраблена з выкарыстаннем золата і срэбры. «Усе знакі нумарныя, да іх будзе выдавацца сертыфікат, а Нацыянальная трафейная кніга захавае фатаграфію і дадзеныя кавалера гэтага знака на сваіх старонках», — паведаміў Ігар Шуневіч.

​Александрына ПАРШЫНА

Фота аўтара, Аляксандра АЧАРЭТНЯГА