У першы дзень зімы адбылася прэзентацыя кніг, адрасаваных юным чытачам, якія пабачылі свет у Выдавецкім доме «Звязда». Гэта зборнік вершаў Віктара Шніпа «Кастусь і Міёна» і «Штукарствы месяцовага зайчыка» Галіны Пшонік. Абедзве кніжкі аформіла вядомая мастачка Аксана Аракчэева, якая таксама прысутнічала на сустрэчы разам з аўтарамі.
Юныя чытачы — навучэнцы адной з мінскіх школ — слухалі ўрыўкі з кніг, разгадвалі загадкі, задавалі пытанні аўтарам. Вельмі зацікавіла, што героі Віктара Шніпа — рэальныя персанажы. Гэта ўнук паэта Кастусь і аўчарка Міёна, поўнае імя якой — Герміёна. Мастачка пастаралася, каб на малюнках гэтыя героі былі падобныя да сябе. Нават аўтара кнігі, Віктара Шніпа, можна пазнаць на адной са старонак — як ён выгульвае пад дажджом сваю Міёну, пра што і напісаў верш.
А напрыканцы імпрэзы маленькія госці маглі набыць упадабаныя кнігі і атрымаць аўтографы... Прычым калі аўтографы ад літаратараў былі добрымі пажаданнямі ў словах, Аксана Аракчэева свой аўтограф пакідала ў выглядзе малюнка.
Прэзентацыя адбылася ў краме «Акадэмічная кніга». Яркія і па афармленні, і па змесце беларускія кнігі — добры навагодні і калядны падарунак дзецям, не забудзьцеся з гэтага скарыстацца.
Людміла ІВАНОВА
Фота аўтара
Аб спорце, сакрэтах замужжа, выхаванні дзяцей, прыгажосці і здаровых звычках ў інтэрв’ю.
Народны мастак можа быць прыкладам у тым, як ствараць свой лёс.
Брудныя бізнес-гульні.
Інтэрв’ю з капітанам каманды «Доктар Хаусс» Паўлам Малахавым.
