Гомельская вобласць прыняла ўдзельнікаў рэспубліканскага семінару пад кіраўніцтвам старшыні Дзяржаўнага камітэта па маёмасці Рэспублікі Беларусь Дзмітрыя Матусевіча. У выязной сустрэчы прынялі ўдзел кіраўнікі камітэтаў дзяржаўнай маёмасці аблвыканкамаў, намеснікі старшынь раённых выканаўчых камітэтаў Гомельскай вобласці і іншых рэгіёнаў, а таксама прадстаўнікі бізнесу і саюза прадпрымальнікаў.
Сёлета месцам правядзення рэспубліканскага семінару паўднёва-ўсходні рэгіён быў абраны не выпадкова. Як адзначыў Дзмітрый Матусевіч, традыцыйна падобныя сустрэчы па абмене досведам праводзяцца ў абласцях, якія вылучаюцца работай па вяртанні ў гаспадарчы абарот маёмасці, што не выкарыстоўваецца.
— У мінулым годзе мы сустракаліся ў Брэсцкай вобласці. Сёлета, паводле нашай ацэнкі, Гомельская з’яўляецца лідарам у сферы ўключэння маёмасці ў гаспадарчы абарот, — звярнуў увагу старшыня Дзяржаўнага камітэта па маёмасці Рэспублікі Беларусь. — Важна, што мы сабраліся ўпершыню пасля ўступлення ў сілу новага Указа Прэзідэнта аб распараджэнні дзяржаўнай маёмасцю. Гэта значыць, мы ўжо можам падвесці пэўныя вынікі і адначасова падзяліцца досведам правапрымяняльнай практыкі. Усюды ёсць станоўчыя прыклады, ёсць што абмеркаваць з удзелам прадстаўнікоў Генеральнай пракуратуры, камітэта Дзяржкантролю, тэрытарыяльных органаў, каб абмяняцца лепшымі практыкамі.
Як адзначыў на адкрыцці семінара намеснік старшыні аблвыканкама Андрэй Конюшка, на Гомельшчыне безгаспадарчымі застаюцца 2,7% дзяржаўнай маёмасці. Вярнуць у гаспадарчы абарот неабходна яшчэ каля 300 тысяч квадратных метраў будынкаў і збудаванняў. І поспехі ў гэтым напрамку ёсць.
— Мы ставім мэту, каб уся дзяржаўная маёмасць прыносіла прыбытак. Будзем імкнуцца ўдасканальваць гэту работу, — падкрэсліў намеснік старшыні аблвыканкама.
Андрэй Конюшка прывёў прыклады паспяховага вяртання ў эканоміку маёмасных рэсурсаў. Так, у працэсе санацыі ўдалося рэалізаваць пад інвестпраекты маёмасць, якая не выкарыстоўваецца, на тэрыторыі Мазырскага лікёра-гарэлачнага завода. Там ужо эфектыўна працуе вытворчасць у сферы металаапрацоўкі. Між тым да канца года павінна вырашыцца адно з хвалюючых пытанняў — выкарыстанне плошчы былога завода вымяральных прыбораў, якая размяшчаецца амаль што ў цэнтры Гомеля. На гэтай тэрыторыі можа размясціцца шматфункцыянальны цэнтр або вытворчасць, якая адказвае неабходным нормам.
У ходзе семінару ў Гомелі прайшло знаёмства з работай прыватнага прадпрыемства «Бумпрам». Гэта вытворчасць некалькі год таму адкрылася на базе карпусоў завода хімічных вырабаў, якія зараз знаходзяцца на стадыі санацыі. «Бумпрам» — рэзідэнт свабоднай эканамічнай зоны «Гомель-Ратон» спецыялізуецца на вытворчасці вінілавых і іншых відаў шпалер, мае ўласную студыя дызайну. Прадпрыемства вярнула ў гаспадарчае карыстанне і не толькі прыстасавала пад вытворчасць былыя корпусы завода, але і ўжо пабудавала на гэтай тэрыторыі новыя. Арганізавана 270 працоўных месцаў.
На тэрыторыі Гомельскага раёна ўдзельнікі рэспубліканскага семінару азнаёміліся з тым, якім чынам удалося вярнуць у гаспадарчы абарот маёмасці былых дзіцячых аздараўленчых лагераў рэспубліканскай уласнасці. Так, у пасёлку Барэц, што пад Гомелем, на месцы былога аздараўленчага лагера «Арляня» быў створаны аб’ект аграэкатурызму. З 2016 года на месцы здраўніцы з’явіўся забаўляльны комплекс «Загарадная Карчма». У мінулым годзе аб’ект змяніўся ўладара, але працягнуў свой кірунак дзейнасці. Зараз ужо пад назвай «Славянская Карчма» — рэстаран, гасцініца, лазня і нават вяровачны гарадок для фізічнай актыўнасці для дзяцей і іх бацькоў.
На прыкладзе прадпрыемства «Веза-Г» удзельнікі рэспубліканскага семінару назіралі за арганізацыяй вытворчых аб’ектаў прадпрыемствамі — рэзідэнтамі свабоднай эканамічнай зоны «Гомель-Ратон». Так, паспяхова развіваецца прадпрыемства па вырабе вентыляцыйнага абсталявання, адкрытае на тэрыторыі былога Гомельскага радыёзавода. Тут працаўладкавана 500 чалавек, да 90 працэнтаў прадукцыі прадпрыемства экспартуецца ў Расійскую Федэрацыю.
Як адзначыла старшыня камітэта дзяржаўнай маёмасці Гомельскага аблвыканкама Наталля Сацута, Гомельская вобласць вельмі эфектыўна выкарыстоўвае магчымасці сучаснага фармату электроннага гандлю.
— Па-першае, гэта дазваляе нам прыцягнуць пакупнікоў з іншых абласцей. За мінулы і бягучы год у нас іх 16. Па-другое, гэта пашырэнне рэкламы і эканомія часу, бо ўвесь працэс ад рэгістрацыі да ўдзелу цалкам аўтаматызаваны. У цэлым, за перыяд з 2020 года па цяперашні час камітэтам арганізаваны і праведзены 331 аўкцыён, на якіх выстаўлялася больш за 1800 лотаў. У выніку прададзены 281 аб’ект, у бюджэт розных узроўняў паступіла больш за 5,6 мільёнаў рублёў, — звярнула ўвагу кіраўнік камітэта дзяржаўнай маёмасці Гомельскага аблвыканкама.
У бягучым годзе камітэт «Гомельаблмаёмасць» адзіны ў рэспубліцы цалкам перайшоў на анлайн-гандаль.
Праграма рэспубліканскага семінару працягнулася знаёмствам з вопытам работы ў Жлобінскім раёне. Так, былі прадэманстраваны формы вяртання ў гаспадарчы абарот маёмасці адкрытых акцыянерных таварыстваў з доляй ва ўстаўным фондзе раённай камунальнай уласнасці, якая не выкарыстоўвалася.
Наталля КАПРЫЛЕНКА
Фота аўтара
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
