З 1 лютага гэтага года павялічваюцца ўсе віды пенсій і дзяржаўныя дапамогі сем’ям, якія выхоўваюць дзяцей. Рост многіх з гэтых выплат звязаны з павелічэннем бюджэту пражытачнага мінімуму (БПМ). Расказваем, што мяняецца з лютага.
Як паведамляе Міністэрства працы і сацыяльнай абароны, павялічваюцца памеры бюджэту пражытачнага мінімуму, якія будуць дзейнічаць да 30 красавіка 2024 года. Такім чынам, БПМ у сярэднім на душу насельніцтва ў параўнанні з яго значэннем, устаноўленым з 1 лістапада 2023 года, павялічыцца на 10,6 працэнта і складзе 406,74 рубля. Для працаздольнага насельніцтва ён вырасце да 434,60 рубля, для пенсіянераў — да 298,43 рубля, дзяцей да трох гадоў — да 260,39 рубля, дзяцей ад трох да шасці гадоў — да 349,09 рубля, для дзяцей ад шасці да 18 гадоў — да 406,03 рубля.
Рост гэтага сацыяльнага нарматыву абумоўлены, у першую чаргу, змяненнем якаснага складу мінімальнага набору прадуктаў харчавання, які ўваходзіць у пражытачны мінімум, зацверджаным рашэннем урада, патлумачылі ў Мінпрацы.
Змяненні закрануць каля 1,5 мільёна атрымальнікаў сацыяльных выплат, устаноўленых ад БПМ. Такім чынам, аўтаматычна пераглядаюцца ўбудаваныя ў сістэму сацыяльнай абароны розныя надбаўкі і павышэнні, а таксама асобныя сацыяльныя выплаты, якія вылічаюцца ад памеру БПМ, а менавіта памеры дзяржаўных дапамог сем’ям, якія выхоўваюць дзяцей, даплаты да пенсій, дапамогі па доглядзе інваліда І групы або асобы, якая дасягнула 80-гадовага ўзросту, сацыяльныя пенсіі.
З лютага гэтыя дапамогі складуць:
Памеры дапамог выраслі на 11,3 працэнта.
Нагадаем, што ў адпаведнасці з Законам «Аб дзяржаўных дапамогах сем’ям, якія выхоўваюць дзяцей» памеры дапамогі па доглядзе дзіцяці ва ўзросце да трох гадоў пераразлічваюцца два разы на год: з 1 лютага і 1 жніўня.
Памер дапамогі па доглядзе дзіцяці ва ўзросце да трох гадоў на першае дзіця складае 35 працэнтаў сярэднямесячнай заработнай платы работнікаў у краіне за квартал, на другога і наступных дзяцей — 40 працэнтаў сярэднямесячнай заработнай платы работнікаў у краіне за квартал, на дзіця-інваліда незалежна ад чарговасці яго нараджэння — 45 працэнтаў сярэднямесячнай заработнай платы работнікаў у краіне за квартал.
Акрамя памераў дапамогі па доглядзе дзіцяці ва ўзросце да трох гадоў, якія вылічваюцца з сярэднямесячнай заработнай платы, з 1 лютага на 10,6 працэнта павялічваюцца памеры дзяржаўных дапамог сем’ям, якія выхоўваюць дзяцей, што вылічваюцца з бюджэту пражытачнага мінімуму ў сярэднім на душу насельніцтва.
Так, аднаразовая дапамога пры нараджэнні першага дзіцяці зараз складзе 4067,40 рубля (павялічыцца на 389,5 рубля), пры нараджэнні другога і наступных дзяцей — 5694,36 (рост на 545,3 рубля).
Аднаразовая дапамога жанчынам, якія сталі на ўлік у арганізацыях аховы здароўя да 12-тыднёвага тэрміну цяжарнасці, з лютага будзе выплачвацца ў памеры 406,74 рубля, штомесячная дапамога сем’ям на дзяцей ва ўзросце ад трох да 18 гадоў у перыяд выхавання дзіцяці ва ўзросце да трох гадоў — у памеры 203,37 рубля.
Памер штомесячнай дапамогі сем’ям на дзяцей, старэйшых за тры гады, з асобных катэгорый сем’яў на дзіця-інваліда складзе 284,72 рубля, на іншых дзяцей у сям’і — 203,37 рубля.
Штомесячная дапамога па доглядзе дзіцяці-інваліда ва ўзросце да 18 гадоў складзе 406,74 рубля (з І і ІІ ступенню страты здароўя і з ІІІ і ІV ступенню страты здароўя да спаўнення дзіцяці ўзросту трох гадоў) і 488,09 рубля (з ІІІ і ІV ступенню страты здароўя пасля спаўнення дзіцяці ўзросту трох гадоў), штомесячная дапамога на дзіця ва ўзросце да 18 гадоў, інфіцыраванага ВІЧ, — 284,72 рубля.
Пры выхаванні ў сям’і дваіх і больш дзяцей, адно з якіх ва ўзросце да трох гадоў, выплачваюцца дзве дапамогі: на дзіця да трох гадоў (40% сярэдняй заработнай платы) і дзіця (дзяцей) ад трох да 18 гадоў (50% БПМ). Сумарны памер дзвюх дапамог складзе 1031,77 рубля.
У бягучым годзе на выплату дапамог па мацярынстве і сямейных дапамог плануецца накіраваць 3,4 мільярда рублёў, з іх 1,8 мільярда — на выплату дапамог па доглядзе дзяцей ва ўзросце да трох гадоў.
Згодна з рашэннем кіраўніка дзяржавы, з 1 лютага на 10 працэнтаў павышаюцца ўсе віды працоўных пенсій (па ўзросце, за выслугу гадоў, па інваліднасці, з прычыны страты карміцеля).
З улікам росту бюджэту пражытачнага мінімуму ў сярэднім на душу насельніцтва на 10,6 працэнта павялічацца даплаты да пенсій і сацыяльныя пенсіі інвалідам і дзецям-інвалідам.
Паводле папярэдняй ацэнкі сярэдні памер пенсіі па ўзросце ў лютым бягучага года складзе 811 рублёў і павялічыцца да студзеня бягучага года на 75 рублёў. Гадавое павелічэнне (люты 2023 да лютага 2024) складзе 140 рублёў, або 21 працэнт.
Памер павелічэння працоўнай пенсіі ў кожнага пенсіянера будзе свой у залежнасці ад працягласці стажу і велічыні заработку, улічаных пры вылічэнні яму пенсіі, а таксама ўстаноўленых даплат да асноўнай пенсіі.
Дадаткова на павышэнне пенсій у лютым будзе накіравана 166 мільёнаў рублёў. У цэлым у лютым расходы на выплату пенсій складуць 1,8 мільярда рублёў.
Атрымальнікамі пенсій з’яўляюцца 2,4 мільёна чалавек.
Алена КРАВЕЦ
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
