Навіны сталіцы

Аэраздымку з верталёта праводзяць для праверкі стану цепласетак Мінска.

Аб гэтым БелТА паведамілі ў філіяле «Мінскія цеплавыя сеткі РУП «Мінскэнерга». Работы павінны праводзіцца да 11 сакавіка, але іх перанеслі з-за дрэннага надвор'я. Палёты з выкарыстаннем спецыяльнага цеплавізара дазваляюць выявіць цеплавыя анамаліі, сярод якіх — пашкоджанні, недастатковую цеплавую ізаляцыю на трубаправодах, іх затапленне. Будзе складзена табліца папярэдніх аператыўных вынікаў.

Гістарычныя рэканструкцыі каля сталічнай ратушы пачнуцца ў маі і працягнуцца да кастрычніка, будуць праходзіць кожную суботу з 12 да 13 гадзін.

Аб гэтым агенцтву «Мінск-Навіны» расказаў кіраўнік клуба «Менская харугва», дэпутат Палаты прадстаўнікоў Нацыянальнага сходу Рэспублікі Беларусь Міхаіл Мілаванаў. «Праграма стане больш разнастайнай. Мы пастаянна вывучаем новыя кнігі і дакументы, якія датычацца жыцця нашых продкаў. Гледачы змогуць прыняць удзел у бітвах, прайшоўшы інструктаж па тэхніцы бяспекі. Будзе шмат музыкі і танцаў», — адзначыў Міхаіл Мілаванаў.