Абмаражэнне ўзнікае часцей за ўсё з‑за празмернай упэўненасці ў тым, што тэмпература навакольнага асяроддзя (холад, мароз) не можа значна нашкодзіць арганізму. Чамусьці многія забываюцца на простыя ісціны, здольныя захаваць здароўе і жыццё. Урач-валеолаг Мінскага гарадскога клінічнага псіхіятрычнага дыспансера Леанід МЯЛЕШКА нагадвае, што і як рабіць.
1. Вопратка. Насіце не проста цёплую, але свабодную вопратку — якая спрыяла б нармальнай цыркуляцыі крыві. Варта апранацца па прынцыпе «капусты», каб паміж «слаямі» была праслойка паветра, здольная затрымліваць цеплыню. Важна, каб усе слаі былі лёгкімі і воданепранікальнымі, паколькі мокрае адзенне павялічвае рызыку абмаражэння. Не выходзьце на мароз без рукавіц, шапкі і шаліка. Лепшы варыянт — рукавіцы з тканіны, якая не прапускае вільгаць і не прадзімаецца. Пальчаткі з натуральных матэрыялаў хоць і зручныя, але ад марозу не ратуюць. Шчокі і ніз твару можна абараніць шалікам. У ветранае халоднае надвор'е перад выхадам на вуліцу адкрытыя ўчасткі цела змажце спецыяльным крэмам. Не насіце на марозе металічных, у тым ліку залатых і сярэбраных упрыгажэнняў (пярсцёнкі, завушніцы). Метал астывае значна хутчэй за цела, у выніку чаго магчымае «прыліпанне» да скуры і халадовыя траўмы. Па-другое, пярсцёнкі толькі тармозяць нармальную цыркуляцыю крыві.
2.
Абутак. Не варта насіць надта цесны абутак, які сціскае сасуды, што павялічвае верагоднасць абмаражэння. Ногі больш за ўсё схільныя да ўздзеяння нізкіх тэмператур, паколькі ўвесь час знаходзяцца ў пастаянным кантакце з паверхняй зямлі. У выпадку працяглых прагулак перыядычна сціскайце і расціскайце пальцы на нагах, каб палепшыць краваток. Вельмі важна, каб абутак быў сухі. У абутку павінны быць цёплыя вусцілкі, шкарпэткі — шарсцяныя.
3. Ежа. Рэкамендуецца цёплая і досыць каларыйная. Халодная ежа нашмат горш засвойваецца і патрабуе дадатковай энергіі для ператраўлівання і сагравання ў арганізме. Калі ж вам у экстрэмальных умовах даводзіцца здаволіцца халодным пайком, імкніцеся дасканала жаваць ежу, паступова саграваючы яе. Больш піце, пажадана цёплыя напоі. Вада паляпшае кровазварот і павялічвае тым самым забеспячэнне цеплынёй усяго арганізма. Нельга забываць, што алкаголь выклікае вялікія страты цеплыні і ў той жа час — ілюзію цеплыні. Дадатковым фактарам з'яўляецца немагчымасць сканцэнтраваць увагу на прыкметах абмаражэння. Курэнне на марозе таксама непажаданае, паколькі ў працэсе звужаюцца дробныя сасуды, пагаршаецца мікрацыркуляцыя крыві, і гэта робіць канечнасці ўразлівымі.
Сачыце за колерам твару, вушэй, носа і шчок вашага сябра, а ён няхай «назірае» за вашымі.
Не дазваляйце абмарожанаму месцу зноў замерзнуць — гэта пагражае больш значным пашкоджаннем скуры.
Не знімайце на марозе абутак з абмарожаных канечнасцяў — яны распухнуць і вы не зможаце зноў надзець яго. Неабходна як мага хутчэй дайсці да цёплага памяшкання. Калі змерзлі рукі, паспрабуйце адагрэць іх пад мышкамі.
Вярнуўшыся дадому пасля працяглай прагулкі па марозе, абавязкова пераканайцеся ў адсутнасці абмаражэння канечнасцяў, спіны, вушэй, носа. Пушчанае на самацёк абмаражэнне можа прывесці да гангрэны і наступнай ампутацыі.
Як толькі на прагулцы вы адчулі пераахаладжэнне, неабходна як мага хутчэй зайсці ў любое цёплае месца, каб сагрэцца і агледзець найбольш уразлівыя для марозу месцы.
Калі ў вас заглухла машына ў незнаёмай мясцовасці або ўдалечыні ад населенага пункту, лепш за ўсё ў чаканні дапамогі, іншага аўтамабіля заставацца ў машыне.
Хавайцеся ад ветру: верагоднасць абмаражэння на ветры значна вышэйшая.
Не мачыце скуру: вада праводзіць цеплыню значна лепш за паветра. Не выходзьце на мароз з вільготнымі валасамі. Калі чалавек, скажам, упаў у ваду, мокрае адзенне неабходна зняць, ваду выцерці, пераапрануцца ў нешта сухое і тэрмінова накіравацца туды, дзе цёпла. У лесе, напрыклад, трэба распрануцца і высушыць адзенне, а ў час чакання — энергічна рабіць фізічныя практыкаванні каля агню.
Адпраўляючыся на працяглую прагулку на марозе, трэба прыхапіць з сабой пару шкарпэтак на змену, рукавіцы і тэрмас з гарачым чаем. Перад выхадам неабходна паесці.
Варта ўлічваць, што ў дзяцей тэрмарэгуляцыя арганізма яшчэ не поўнасцю настроена, а ў пажылых людзей і пры некаторых захворваннях гэтая функцыя бывае парушана. Такія катэгорыі схільныя да пераахаладжэння і абмаражэння. Дзецям праз кожныя 15–20 хвілін гульні на вуліцы пажадана вяртацца ў цеплыню і сагравацца.
Першая дапамога на марозе:
1. Даставіць пацярпелага ў цёплае памяшканне. Зняць абутак, шкарпэткі, пальчаткі. Выклікаць хуткую дапамогу.
2. Пры лёгкай ступені абмаражэння. Сагрэць пераахалоджаныя ўчасткі цёплымі рукамі, лёгкім масажам, расціраннем, дыханнем, шарсцяной тканінай, пакласці ватна-марлевую павязку.
Пры абмаражэнні 2–4 ступеняў. Хуткае саграванне, масаж і расціранне рабіць не трэба. Пакладзіце на паверхню слой марлі, затым тоўсты слой ваты, пасля зноў марлі, а зверху — цырату (павязка, якая забяспечыць цяплоізаляцыю). Пашкоджаныя канечнасці фіксуюць з дапамогай падручных сродкаў (дошчачкі, фанеры, тоўстага кардону) — накладваюць і прыбінтоўваюць паверх павязкі. У якасці ізалюючага цяпло матэрыялу можна выкарыстоўваць ватнік, фуфайку, шарсцяную тканіну.
3. Пацярпеламу трэба даць цёплае пітво, гарачую ежу, па 1 таблетцы аспірыну, анальгіну, па 2 таблеткі «Но-шпа» і папаверыну.
4. Не рэкамендуецца расціраць снегам, паколькі сасуды канечнасцяў можна лёгка пашкодзіць, а мікратраўмы скуры паспрыяюць занясенню інфекцыі. Нельга выкарыстоўваць хуткае адаграванне абмарожаных канечнасцяў каля вогнішча, прымяняць грэлкі, паколькі гэта пагоршыць працяканне абмаражэння. Нельга прымяняць для расцірання алеі, тлушчы, спірт.
5. Пры агульным пераахаладжэнні лёгкай ступені дастаткова сагрэцца ў цёплай ванне пры пачатковай тэмпературы вады 24 градусы, якую павысіць паступова да нармальнай тэмпературы цела. У больш цяжкіх выпадках пацярпелага неабходна даставіць у бальніцу.
Святлана БАРЫСЕНКА
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
Што за таемнымі дзвярыма?