24 Верасень, панядзелак

Вы тут

Звяртаемся да неўролага


На пытанні наведвальнікаў сайта www.dоktоrа.bу і чытачоў газеты "Звязда" адказала ўрач-неўролаг 11-й гарадской паліклінікі г. Мінска Юлія ВАРАНЬКО.

— 41 год. Чым можа быць выклікана аняменне кіскі рукі? Была ў тэрапеўта, эндакрынолага. Здавала біяхімічны аналіз крыві, агульны аналіз крыві, аналіз мачы. Сказалі, што ўсё ў парадку.

— Аняменне кісцяў можа быць сімптомам мноства захворванняў. Часцей за ўсё, гэта астэахандроз шыйнага аддзела пазваночніка, сіндром запясцевага канала, недахват вітаміну В12, цукровы дыябет, рэўматоідны артрыт, хвароба Рэйна, эндакрынныя парушэнні і інш. Канчатковы дыягназ можна выставіць толькі пасля неўралагічнага агляду і некаторых дадатковых абследаванняў — рэнтгенаграфіі шыйнага аддзела пазваночніка ў некалькіх праекцыях або ядзерна-магнітна-рэзанансная і камп'ютарная тамаграфія, электранейраміяграфіі нервовых ствалоў перадплечча, аналіз крыві на цукар і інш.

— 30 гадоў. Парэзаў руку шклом у трэцяй частцы перадплечча. Адразу пасля траўмы анямелі 1, 2 і 3 пальцы і частка далоні. Пасля 2 месяцаў лячэння аднаўленне адчувальнасці: 1 палец — 80%, 2 палец — 50%, 3 палец — 80%. Рухальныя функцыі: 1 палец — 30%, 2 палец — 70%, 3 палец — 100%. У месцы парэзу пры дотыку б'е токам у пальцы. Ультрагук сярэдняга нерва: верагодна частковае пашкоджанне сярэдняга нерва. ЭНМГ сярэдняга нерва: выражанае пашкоджанне сярэдняга нерва змешанага характару. Ці мэтазгодна рабіць аперацыю? Ці можа неўрома прайсці сама? Якім будзе аднаўленне пасля аперацыі? Ці не стане горш?

— У вас добра аднавіліся рухальныя функцыі. Думаю, што можна працягнуць кансерватыўнае лячэнне, лячэбную фізкультуру, механатэрапію. З лекавых прэпаратаў вам павінны прызначыць нейрамідзін, тыяктацыд, вітаміны групы В і інш. У вашым выпадку, мяркую, аперацыя не паказана, паколькі любое аператыўнае ўмяшанне не выключае ўскладненняў.

— 31 год. Апошнія паўтара месяца мяне турбуе пастаянны боль у шыйным аддзеле пазваночніка, у патыліцы, аняменне і боль у левай руцэ. Да якога спецыяліста трэба звярнуцца? Чым могуць быць выкліканы падобныя сімптомы?

— Вам неабходна прыйсці на прыём да неўролага. Сімптомы, на якія вы ўказваеце, могуць быць звязаны з астэахандрозам шыйнага аддзела пазваночніка, наяўнасцю грыжы міжпазванковага дыска.

— Пакутую ад бяссонніцы і галаўнога болю. Нібыта хочацца спаць, але заснуць цяжка, галаўны боль не моцны і прыкладна праз дзень. Ці можа гэта быць з-за штодзённага шуму, грукату, вібрацыі ў памяшканні?

— Безумоўна, шум і вібрацыя могуць быць прычынай вашага стану. Аднак калі сімптомы ўзнікаюць і ў час адсутнасці шкодных навакольных умоў, неабходна звярнуцца да ўрача і абследавацца.

— Майму хлопцу 26 гадоў. Калі ён сядзіць, то пастаянна дрыгае нагой. Ці норма гэта?

— Хутчэй за ўсё, гэта проста шкодная звычка. Аднак канчатковы дыягназ можна паставіць толькі пасля агляду.

— Дапамажыце расшыфраваць заключэнне пасля правядзення электраэнцэфалаграфіі: "Умераная дэзарганізацыя коркавага рытму без ачаговых змяненняў і параксізмальных формаў актыўнасці галаўнога мозга". Скаргаў не было і няма. Ці можна з такім дыягназам ісці на вадзіцельскую камісію ў 24-ю паліклініку г. Мінска?

— Думаю, што можна. Не зразумела іншае. Для чаго выконвалася падобнае даследаванне, калі не было ніякіх скаргаў?

— 23 гады. Неўратычнае заіканне, вельмі баліць галава, шум у вушах. Дэфармацыя галавы, з'яўляюцца залысіны па баках, але спадчыннай схільнасці няма. Падкажыце, што гэта?

— Па той інфармацыі, якую вы пакінулі, вельмі цяжка выставіць нават папярэдні дыягназ. Звярніцеся, калі ласка, для пачатку да вашага ўчастковага тэрапеўта.

— Мужчыну — 64 гады. Аблітэруючы атэрасклероз сасудаў ніжніх канечнасцяў. Рэканструктыўнае аператыўнае лячэнне не паказана ў сувязі з аклюзіяй дыстальнага аддзела сасудзістага русла. Лячэнне: дыпірыдамол, палакард, пентаксіфілін, натрыя хларыд. Рэкамендацыі: назіранне хірурга, пентаксіфілін 0,2 па 2 т. 3 разы ў дзень 3 месяцы. Кожныя паўгода — кропельніцы. На словах сказалі, што паражоныя дробныя сасуды. Язваў няма. Пастаянных боляў таксама. Ходзіць 100-150 метраў. Пасля нагрузак, часам ноччу нямее падэшва левай нагі. Якія прагнозы? Як адтэрмінаваць ампутацыю?

— Пацыенты з такім дыягназам стаяць на дыспансерным уліку ў хірурга. Неабходна рэгулярна выконваць ультрагук сасудаў ніжніх канечнасцяў, раз у паўгода праходзіць прызначанае лячэнне, а таксама прытрымлівацца гіпахалестэрынавай, з малой колькасцю жывёльных тлушчаў, дыеты, пастаянна прымаць антыагрэганты (аспірын у дозе 75 мг) для прафілактыкі ўскладненняў (калі няма проціпаказанняў).

— Патрэбна аперацыя 11-гадоваму хлопчыку — грамадзяніну Кіргізіі. Дыягназ: новаўтварэнне трэцяга жалудачка з кровазліццём у структуру памерам 32-35-37. Магнітна-рэзанансную тамаграфію выканалі ва Узбекістане. У Бішкеку і Алмаце няма спецыялістаў і апаратуры для такой аперацыі. Ці можна правесці яе ў Мінску? Падкажыце, куды звяртацца з такім пытаннем.

— Вы можаце звярнуцца ў Рэспубліканскі навукова-практычны цэнтр неўралогіі і нейрахірургіі. Дзіцяці неабходна дапамога ўрача-нейрахірурга. Тэлефон рэгістратуры: 263 40 39, платных паслуг: 267 12 40.

Святлана БАРЫСЕНКА

Дадаць каментар

Выбар рэдакцыі

Грамадства

75 год таму пачалося вызваленне Беларусі

75 год таму пачалося вызваленне Беларусі

23 верасня 1943 года, савецкімі войскамі быў вызвалены ад нямецка-фашысцкіх захопнікаў першы населены пункт Беларусі — раённы цэнтр Камарын.

Грамадства

Каму і чым дапаможа ТЦСАН

Каму і чым дапаможа ТЦСАН

Ад дапамогі дома пажылым і да стварэння крызісных пакояў для ахвяр хатняга гвалту.

Грамадства

Маштабныя вучэнні прайшлі ў краіне

Маштабныя вучэнні прайшлі ў краіне

Актыўная фаза камандна-штабнога вучэння Узброеных Сіл прайшла ў Беларусі ў верасні.