Вы тут

Калі ва ўрачоў з'явяцца адвакаты?


Адным з найважнейшых паказчыкаў якасці жыцця ў краіне з'яўляецца ўзровень медыцынскага абслугоўвання. На ўчарашняй сустрэчы членаў Пастаяннай камісіі Палаты прадстаўнікоў беларускага парламента па ахове здароўя, фізічнай культуры, сямейнай і моладзевай палітыцы з прадстаўнікамі Славацкай урачэбнай палаты і грамадскага аб'яднання «Беларуская асацыяцыя ўрачоў» гутарка закранала як падабенствы і адрозненні сістэм аховы здароўя ў Беларусі і Славакіі, так і прававыя аспекты працы ўрачоў.

Валянцін МІЛАШЭЎСКІ, намеснік старшыні Пастаяннай камісіі Палаты прадстаўнікоў Нацыянальнага сходу Беларусі па ахове здароўя, фізічнай культуры, сямейнай і моладзевай палітыцы, член рабочай групы ўрада па супрацоўніцтве з парламентам Славацкай Рэспублікі

звярнуў увагу на тое, што з часоў Савецкага Саюза ў сістэме аховы здароўя Беларусі не адбылося значных змен. Аналагічныя сістэмы функцыянуюць у Вялікабрытаніі і Швецыі. Фінансаванне ідзе з рэспубліканскага бюджэту і размяркоўваецца па нарматыве на аднаго жыхара. У той жа час у нас ёсць платныя медыцынскія паслугі — як правіла, тыя, што не з'яўляюцца сацыяльнымі (ад іх не залежыць працягласць жыцця пацыента), напрыклад, пластычныя аперацыі.

Прэзідэнт Славацкай урачэбнай палаты Марыян КАЛАР адзначыў, што сёння ў Славакіі адбываецца пераход ад сацыялістычнай сістэмы аховы здароўя да сістэмы, дзе значную ролю хоча адыгрываць рынак. «Але бальніцы ніколі не будуць «таварам», а пацыент — «кліентам», — падкрэсліў Марыян Калар. У Славакіі кожны ўрач павінен рэгістравацца ў Славацкай урачэбнай палаце — гэта адзіная навукова-даследчая і прафесійная арганізацыя ўрачоў у краі не. Так, у палаце зарэгістравана 23 тысячы ўрачоў, з іх 14,5 тысячы з'яўляюцца яе членамі, якім аказваецца эканамічная і юрыдычная дапамога.

У Славакіі павышэнне кваліфікацыі абавязковае для кожнага ўрача, і гэта прапісана ў Законе. За кожныя 5 гадоў урач

павінен атрымаць мінімум 250 «крэдытаў» (балаў, якія налічваюцца, напрыклад, за ўдзел у навуковых канферэнцыях, за публікацыю навуковых даследаванняў). У тых, хто жыве і працуе ў невялікіх населеных пунктах, натуральна, узнікалі праблемы з «крэдытамі», таму быў створаны спецыяльны партал Славацкай асацыяцыі ўрачоў. Там размясцілі свае навуковыя тэзісы больш чым 900 урачоў. Там жа яны могуць праходзіць дыдактычныя тэсты і атрымліваць за гэта неабходныя балы.

Як расказаў журналістам Дзмітрый ШАЎЦОЎ, член Пастаяннай камісіі Палаты прадстаўнікоў па ахове здароўя, медыцынскай культуры, сямейнай і моладзевай палітыцы, старшыня Беларускай асацыяцыі ўрачоў, гэтая сустрэча мае вельмі важнае значэнне. «Мы сустракаемся са Славацкай урачэбнай палатай для таго, каб даведацца, як праводзіцца ў іх заканадаўчая дзейнасць у галіне аховы здароўя, які ўплыў і якое значэнне маюць грамадскія арганізацыі ў заканатворчым працэсе, таксама для нас цікавыя пытанні прававой абароны ўрачоў», — падкрэсліў парламентарый. Ён акцэнтаваў увагу на тым, што ў Славакіі добра працуе сістэма прававой абароны ўрачоў. Іх інтарэсы прадстаўляюцца ў судзе на працэсах як адміністрацыйных, так і крымінальных. Кожны ўрач плаціць пэўны ўнёсак, і, калі ўзнікае неабходнасць, юрыдычная і адвакацкая дапамога прадастаўляецца яму бясплатна.

Па словах Шаўцова, пры Беларускай асацыяцыі ўрачоў ужо створана адвакацкая служба, якая займаецца непасрэдна прававой абаронай медыцынскіх работнікаў. «Праца над гэтым у нас пачалася не так даўно — крыху больш за паўгода таму, — паведаміў дэпутат. — Мне вядома, што ў Славацкай Рэспубліцы такая служба існуе ўжо не адзін год. Хацелася б даведацца, што яна з сябе ўяўляе».

У выніку сустрэчы быў заключаны дагавор аб супрацоўніцтве паміж Беларускай асацыяцыяй урачоў і Славацкай урачэбнай палатай з мэтай далейшай сумеснай працы дзеля ўмацавання сістэмы аховы здароўя.

Надзея ЮШКЕВІЧ

Выбар рэдакцыі

Грамадства

Карэспандэнт «Звязды» высвятляла, чаму так цёмна на асветленых вуліцах Магілёва

Карэспандэнт «Звязды» высвятляла, чаму так цёмна на асветленых вуліцах Магілёва

Вечарам прайсціся ўздоўж цэнтральнай вуліцы Першамайскай у Магілёве адно задавальненне.

Спорт

Баскетбаліст Бенджамін-Павел Дуду: У Гане мяне называлі белым

Баскетбаліст Бенджамін-Павел Дуду: У Гане мяне называлі белым

Мама Бена — беларуска, тата — ураджэнец Ганы.

Эканоміка

Куды звяртацца, калі грамадзяніну затрымліваюць зарплату?

Куды звяртацца, калі грамадзяніну затрымліваюць зарплату?

Адказ на гэта і іншыя пытанні — у гутарцы з Дзмітрыем Шаўчуком.