Гэта, вядома, пра мацярынскае малако. І вельмі важна правільна наладзіць грудное кармленне ў першыя дні пасля нараджэння. Майце на ўвазе некалькі важных фактаў.
1. Любая матуля, незалежна ад спосабу з'яўлення дзіцяці на свет, здольна выкарміць дзіця.
2. Вельмі важнымі з'яўляюцца частыя і начныя кармленні. Стрэс, боль, расстройства маці блакіруе адзін з важных гармонаў, які перашкаджае адтоку малака.
Паводле слоў валеолага 23-й гарадской дзіцячай паліклінікі г. Мінска Алены ГАРНІЦКАЙ, у першыя дні пасля родаў (або яшчэ падчас цяжарнасці) у мам выпрацоўваецца малозіва — канцэнтрат імунаглабулінаў, якія з'яўляюцца «прышчэпкай» ад многіх інфекцый, а таксама рэчываў, якія дапамагаюць засяленню кішэчніка добрай мікрафлорай, яшчэ бялку, вітаміну А, соляў. Невялікай колькасці гэтага малозіва дзіцяці абсалютна дастаткова.
*Шэраг радзільных дамоў падтрымлівае 10 прынцыпаў натуральнага кармлення, распрацаваных ААН/ЮНІСЕФ. Гэта важна для наладжвання лактацыі з першай гадзіны. У такіх раддамах можна папрасіць персанал дапамагчы прыкласці дзіця да грудзей пасля родаў. Вельмі важна знаходзіцца з дзіцём разам, карміць яго неабмежавана часта і працягла.
*Калі ў радзільнай зале прыкладання не было, можна прасіць персанал не дакормліваць сумессю і дапамагчы прыкласці да грудзей у максімальна кароткі тэрмін пасля родаў. Гэта ваша дзіця, і ваша права — чым і як яго карміць. Калі ў штаце няма спецыяліста па натуральным кармленні, можна прасіць дапамогі ў медсястры дзіцячага аддзялення або акушэркі — яны ўсе ў вышэйзгаданых раддамах абавязаны навучыць маладую маці прыкладанню малога да грудзей.
*Пры большасці планавых кесаравых сячэнняў першае прыкладанне да грудзей таксама магчымае. Гэта робіцца адразу пасля нараджэння ў аперацыйнай. Акрамя таго, сучасныя метады правядзення аперацыі дазваляюць скараціць час знаходжання мамы ў аддзяленні інтэнсіўнай тэрапіі, і праз 12 гадзін яе ўжо можна перавесці ў пасляродавае аддзяленне. Важна, каб малое ў гэты час не дакормлівалі.
*Боль падчас прыкладання — сігнал аб тым, што вы няправільна гэта зрабілі. Калі дзіця смактала соску, яно будзе «з'язджаць» на сасок, а гэта і прычыняе боль і дрэнна спустошвае грудзі. Дзіця, накормленае сумессю ці напоенае вадой, не возьме грудзі, а будзе спаць. А гэта дрэнна для стымуляцыі грудзей, прыбывання малака, прыводзіць да хваравітага нагрубання грудзей.
*Калі дзіця нарадзілася аслабленым, не можа смактаць і сумеснае знаходжанне немагчымае, неабходна навучыцца сцэджвацца, а пасля перадаваць малако малому ў дзіцячае аддзяленне, каб яго кармілі гэтым малаком. Тут спатрэбіцца апарат для адсмоктвання малака і рэгулярныя, кожныя 2-3 гадзіны, сцэджванні грудзей, у тым ліку ноччу. Гэта дазволіць падтрымаць лактацыю.
Як прыкладваць
Звычайна кансультанты па натуральным кармленні паказваюць, як прыкласці дзіця ў любой позе — лежачы, седзячы, стоячы, абы толькі і маме, і немаўляці было зручна. Можна павучыцца і самой.
Неабходна зручна размясціцца на нейкі працяглы час. Малое лепш пакінуць у адным падгузніку. Кантакт «скура да скуры» вельмі важны для лактацыі, бо дае матулі выбух гармонаў лактацыі.
Размясціце дзіця так, каб яго жывоцік быў паралельны вашаму целу. Носік (не рот!) дзіцяці павінен глядзець на сасок. Пад галоўку завядзіце руку і дачакайцеся, пакуль малое шырока адкрые роцік. Калі яно задумалася, правядзіце пальцам па яго губках. Як толькі малое шырока адкрыла роцік, падштурхніце рукой яго галаву да грудзей (а не самі целам рухайцеся да яго). Сасок, калі сасклізне з верхняй губы і паднябення, акажацца глыбока ў роце. Калі ж сасок будзе размешчаны на ўзроўні рота, дзіця не захопіць грудзі глыбока і правільна.
Няправільнае прыкладанне прыводзіць да ўзнікнення трэшчын на сасках. Лячыць іх бессэнсоўна, калі не паправіць прыкладанне і не пазбавіцца сосак і дакорму з бутэлькі. Залячыць трэшчыны дапамагае паветра і само малако. Трэба як мага даўжэй хадзіць з адкрытымі грудзямі і пасля кармлення пакідаць на сасках некалькі кропель малака. Паміж кармленнямі неабходна карыстацца крэмамі з ланалінам. Змываць іх не трэба. Ні ў якім разе нельга карыстацца зялёнкай.
Каб справіцца з прытокам малака, трэба часта і актыўна карміць малое. Пры неабходнасці — сцэджвацца, але толькі да пачуцця палёгкі, каб малому было прасцей узяць не надта шчыльныя грудзі. Нельга сцэджвацца пасля кармлення да апошняй кроплі — гэта прывядзе да празмернай лактацыі, расцяжак і застою малака.
Дзіця павінна смактаць столькі, колькі яму захочацца. Калі ж вам неабходна зрабіць паўзу, дакраніцеся пальцам да языка дзіцяці, і яно перастане смактаць. Калі мама сама адбірае грудзі, дзіця можа зашчаміць сасок, а гэта прывядзе да з'яўлення трэшчын.
Святлана БАРЫСЕНКА.
Сумесныя праекты ядзерных тэхналогій.