Убачыць новыя перспектывы імкнецца моладзь Саюзнай дзяржавы
Штогод каля 20 тысяч беларусаў накіроўваюцца атрымліваць адукацыю ў Расію, а 2 тысячы расіян прыязджаюць вучыцца ў Беларусь. Гэтая інфармацыя была агучана падчас «круглага стала» «Перспектыўныя напрамкі развіцця Саюзнай дзяржавы: дзіцяча-юнацкая і маладзёжная палітыка», што адбыўся ў Нацыянальнай бібліятэцы. Размова таксама ішла пра навуковы абмен, дзейнасць сумеснай ВНУ (Беларуска-Расійскага ўніверсітэта ў Магілёве), маладзёжны бізнес-акселератар, а таксама пра іншыя шматлікія праекты. Адзначалася эфектыўнае супрацоўніцтва айчынных і расійскіх будатрадаў: такія зводныя атрады працуюць на будаўніцтве Беларускай АЭС у Астравецкім раёне і на аб'ектах нафтагазавага радовішча «Баваненкава» ў Ямала-Нянецкай аўтаномнай акрузе.
4-15
Спыняцца на дасягнутым ніхто не збіраецца. Бліжэйшым часам паміж Міністэрствам адукацыі Беларусі і Міністэрствам адукацыі і навукі РФ будзе падпісана новае Пагадненне аб супрацоўніцтве ў сферы маладзёжнай палітыкі. Некаторыя канкрэтныя прапановы былі агучаны падчас «круглага стала».
Так, напрыклад, ад кіраўніцтва Нацыянальнага дзіцячага цэнтра «Зубраня» прагучала ідэя аб удзеле расійскіх юнкараў у спецыялізаванай журналісцкай змене ў лагеры (пра сёлетнюю зусім нядаўна «Чырвонка» пісала), а таксама аб сустрэчах для абмену досведам паміж важатымі «Зубраняці» і іх калегамі з Расіі.
— Нашы ініцыятывы закліканы спрыяць паляпшэнню зносін паміж моладдзю краін Саюзнай дзяржавы, — расказала карэспандэнту «Чырвонкі» метадыст НДЦ «Зубраня» Таццяна ШВАЙКА. — Дзеці з Расіі і іншых краін цяпер таксама адпачываюць у нашым цэнтры, аднак найважнейшай задачай з'яўляецца іх удзел у тэматычных зменах. Адпачынак беларускіх дзяцей фінансуецца з дзяржбюджэту нашай краіны, а ў выпадку з расійскай моладдзю мы якраз і спадзяёмся на дапамогу Саюзнай дзяржавы. Што ж тычыцца важацкага абмену досведам, то асаблівых фінансавых выдаткаў гэта не патрабуе, аднак мы хочам, каб такое супрацоўніцтва таксама адбывалася пад эгідай Саюзнай дзяржавы.
Сярод іншых ініцыятыў вылучалася, напрыклад, прапанова абменьвацца напрацоўкамі ў выкарыстанні інтэрнэту ў сферы адукацыі, якую выказала дырэктар Нацыянальнага інстытута адукацыі Беларусі Раіса СІДАРЭНКА. Некаторыя праекты знаходзяцца ў стадыі рэалізацыі ўжо сёння.
Гэта датычыцца, напрыклад, стварэння падручніка па гісторыі Саюзнай дзяржавы, пра які паведаміла намеснік дэкана гістарычнага факультэта МДУ імя М.В. Ламаносава Аксана СОЛАПАВА. Паводле яе слоў, стварэннем падручніка ўжо сёння займаюцца беларускія і расійскія гісторыкі з гістфакаў МДУ і БДУ, Інстытута гісторыі Нацыянальнай акадэміі навук Беларусі і арганізацыі «Беларусы Масквы». Падручнік плануецца выдаць да 2016 года, калі будзе адзначацца 20-годдзе саюзнага будаўніцтва. Кніга будзе выкарыстоўвацца ў навучальным працэсе студэнтаў-гісторыкаў абедзвюх краін.
— Сёння мы маем наступную сітуацыю: спажываючы дасягненні інтэграцыі, грамадзяне нашых краін часта не ўсведамляюць, што гэта вынік стварэння Саюзнай дзяржавы, — распавяла карэспандэнту «Чырвонкі» Аксана Солапава. — Я маю на ўвазе бесперашкоднае перасячэнне мяжы, атрыманне медыцынскай дапамогі на тэрыторыі абедзвюх краін, магчымасць атрымання адукацыі і многае іншае. Пра гэтыя праекты трэба гаварыць як мага больш, каб людзі ведалі, навошта існуе Саюзная дзяржава. Распаўсюджванне інфармацыі можа адбывацца або праз СМІ, або праз сістэму адукацыі. Пазітыўныя моманты беларуска-расійскай інтэграцыі павінны выкладацца, і, спадзяюся, падручнік, які мы ствараем, будзе гэтаму спрыяць.
Вынікі мерапрыемства пракаментавала начальнік дэпартамента сацыяльнай палітыкі і інфармацыйнага забеспячэння Пастаяннага камітэта Саюзнай дзяржавы Маргарыта ЛЕЎЧАНКА:
— Мы вельмі задаволены вынікамі дыялогу. Часта на аналагічных мерапрыемствах людзям не трэба казаць пра рэгламент, яны лёгка ўкладваюцца ў адведзеныя ім хвіліны. Сёння ж нашых спікераў прыходзілася спыняць, так шмат ідэй і думак па ўдасканаленні працы з моладдзю Саюзнай дзяржавы яны маюць. Гэта добры знак. Што датычыцца канкрэтных ініцыятыў, якія прагучалі, то іх рэалізацыя патрабуе пэўнага часу, у першую чаргу з-за афармлення дакументаў. Але я думаю, ужо хутка моладзь абедзвюх краін зможа ўбачыць пазітыўныя вынікі нашага дыялогу.
Яраслаў ЛЫСКАВЕЦ.
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.