У рамках патрыятычнай акцыі Федэрацыі прафсаюзаў Беларусі «Памятаем і ганарымся» каманда нашых альпіністаў узнімецца на найвышэйшую кропку Еўропы, каб ушанаваць памяць удзельнікаў вайны. На вяршыні Эльбруса ўстановяць сцягі Рэспублікі Беларусь, Беларускага дзяржаўнага музея гісторыі Вялікай Айчыннай вайны, ФПБ, а таксама копіі Сцяга і Звона Перамогі. Апошні часткова выплаўлены з гільзаў 1941-1945 гадоў.
— Ідэя з'явілася больш за год таму. Гэтая гара ў ваенныя часы была месцам жорсткіх бітваў, таму выбралі менавіта яе, — кажа старшыня Беларускай федэрацыі альпінізму і кіраўнік групы Аляксандр ГАДЛЕЎСКІ.
Учора ўвечары каманда дабралася да вучэбна-метадычнага цэнтра «Эльбрус». Сёння пачнуць адаптавацца і здзейсняць першае ўзыходжанне на невялікую вышыню, каля 3-3,5 тысячы метраў. 4 ці 5 мая альпіністы пераедуць на паўднёвы схіл гары, уздымуцца да вядомай сярод турыстаў гасцініцы «Прытулак адзінаццаці», а потым — на скалы Пастухова (вышыня 4 850 метраў). З 6 па 9 мая, у залежнасці ад надвор'я, плануюць узысці непасрэдна на вяршыню гары.
Каманда складаецца з 10 чалавек. Сярод іх — два «снежныя барсы» (людзі, якія ў свой час пакарылі ўсе пяць сямітысячнікаў Савецкага Саюза), тры майстры спорту міжнароднага класа па альпінізме.
— Эльбрус непрадказальны. Узімку моцныя вятры практычна змятаюць снег са схілаў і застаецца толькі лёд, у які пры лютаўскіх маразах да мінус 40 градусаў немагчыма ўсадзіць ледасек. А летам на вяршыні адносна цёпла, мінус 15, і шмат турыстаў уздымаюцца на гару, — распавядае Аляксандр Мікалаевіч.
Як альпінісцкае дасягненне гара ацэньваецца не надта высока. Катэгорыя складанасці — 2А (самая цяжкая вяршыня мае 6-ю катэгорыю). Але як сімвал памяці аб Вялікай Айчыннай вайне гэтае ўзыходжанне шмат значыць.
Наталля ЛУБНЕЎСКАЯ
З мастацтвам па жыцці.
Баявое ўзаемадзеянне найвышэйшага ўзроўню.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».