Вы тут

Поспехі беларускай навукі адлюстрованы ў міжнародных рэйтынгах


Поспехі беларускай навукі знаходзяць адлюстраванне ў самых розных міжнародных рэйтынгах. Так, напрыклад, у 2015 годзе Беларусь увайшла ў топ-10 краін свету з найбольш імклівым развіццём інфармацыйна-камунікацыйных тэхналогій. У глабальным індэксе інавацый за пяць гадоў наша краіна паднялася з 78-га на 53-ці радок. 15-е месца ў свеце па стварэнні новых ведаў, 32-е месца па выніках навукова-тэхнічнай дзейнасці — як сцвярджае старшыня Дзяржаўнага камітэта па навуцы і тэхналогіях Аляксандр ШУМІЛІН, па згаданых паказчыках Беларусь выйшла на ўзровень краін Еўрапейскага саюза.


За апошні час беларусамі рэалізаваны шэраг праектаў міжнароднага ўзроўню. Так, у складзе аб'яднання ATLAS нашы навукоўцы зрабілі вялікі ўнёсак у адкрыццё славутага базона Хігса. Быў распрацаваны матэматычны дызайн хімічных злучэнняў, якія патэнцыйна могуць нейтралізоўваць ВІЧ-інфекцыю І тыпу. Лінейка «беспілотнікаў», энергаэфектыўныя святлодыёдныя выпраменьвальнікі для вырошчвання сельскагаспадарчай прадукцыі, тэхналогія цеплавой стэрылізацыі хлебабулачных вырабаў без прымянення хімічных кансервантаў, кампазіцыйныя матэрыялы для 3D-прынтараў, шэраг фармацэўтычных распрацовак — усё гэта толькі маленькая частка са зробленага беларускімі навукоўцамі за апошні час.

Адна з галоўных рыс сучаснай беларускай навукі — яскравы ўхіл у бок прыкладных даследаванняў. Як зазначае старшыня Прэзідыума Нацыянальнай акадэміі навук Уладзімір ГУСАКОЎ, практычна ўсе айчынныя распрацоўкі знаходзяць прымяненне на вытворчасці. Больш за 80% унутраных выдаткаў НАН накіроўваецца менавіта на прыкладныя работы, а фундаментальныя даследаванні вылучаюцца сваёй практычнай скіраванасцю. Як вынік — ужо цяпер ва ўстанове фарміруюць спіс з топ-100 навуковых распрацовак для ўкаранення ў рэальным сектары эканомікі.

Яшчэ адзін кірунак працы Акадэміі — стварэнне так званых кластараў, устаноў, скіраваных на выяўленне «кропак росту» і апераджальных абласцей развіцця навукі. Ужо працуе некалькі дзясяткаў такіх цэнтраў. На базе НАН пастаянна ствараюцца вытворчыя прадпрыемствы. Адзін з самых буйных праектаў, які ўжо знаходзіцца ў стадыі рэалізацыі, — «Белбіяград», шматфункцыянальны навукова-тэхнічны парк.

«Мінулы год быў Годам моладзі, і вельмі важна, што пятая частка даследчыкаў НАН — гэта маладыя навукоўцы, — адзначыў Уладзімір Гусакоў. — А ўвогуле, я сказаў бы, што акадэмія навук — гэта маладзёжная арганізацыя, сярэдні ўзрост супрацоўнікаў знаходзіцца на ўзроўні 50 гадоў. Існуюць цэлыя маладзёжныя лабараторыі і праекты, а іх удзельнікі атрымліваюць шматлікія прэміі і ўзнагароды, у тым ліку міжнародныя».

«Добрая сістэма адукацыі без добрай навукі немагчымая, — упэўнены міністр адукацыі Міхаіл ЖУРАЎКОЎ. — Таму мы ўсе свае ўстановы вышэйшай адукацыі разглядаем як комплексы, дзе прыярытэтнымі з'яўляюцца навуковыя даследаванні. У нас сёння ў сістэме адукацыі дзейнічае прыкладна 300 навуковых школ па розных кірунках. І калі казаць пра прыярытэты дзяржавы, то нам падаецца, што менавіта ва ўніверсітэтах павінны аднолькава развівацца як фундаментальны, так і прыкладны сектар».

У беларускіх універсітэтах ствараюцца і ўстановы трансферту ведаў, дзе студэнтаў вучаць укараняць навуковыя веды на вытворчасці. Адсюль — вялікая колькасць прадпрыемстваў і цэнтраў, створаных на базе ВНУ. Развіваюцца і новыя формы студэнцкай навукі, у прыватнасці стартап-рух. Летась у Палескім дзяржаўным універсітэце прайшоў першы форум, прысвечаны менавіта гэтаму віду дзейнасці.

lyskavets@zvіazda.by

Загаловак у газеце: Навука на службе эканомікі

Выбар рэдакцыі

Эканоміка

Тонкае мастацтва дабрабыту. Складаем сямейны бюджэт разам са спецыялістам Нацбанка

Тонкае мастацтва дабрабыту. Складаем сямейны бюджэт разам са спецыялістам Нацбанка

2020 год паставіў усіх нас перад неабходнасцю дакладна планаваць свае выдаткі.

Калейдаскоп

Вясёлыя гісторыі чытачоў

Вясёлыя гісторыі чытачоў

Класiкаў трэба ведаць…, Быў бы араты, будзе й прыганяты, Па малiну…

Эканоміка

«Мы выказалi прапановы, i нас пачулi». Як дзяржаўныя прэферэнцыi дапамагаюць падтрымаць суб'ектаў гаспадарання

«Мы выказалi прапановы, i нас пачулi». Як дзяржаўныя прэферэнцыi дапамагаюць падтрымаць суб'ектаў гаспадарання

У бiзнес-колах Гродзеншчыны лiчаць, што меры па падтрымцы эканомiкi з'явiлiся своечасова.