У межах інтэрнэт-праекта “Созвучие”, што працуе на партале zviazda.by, з’явілася новая старонка “Максім Багдановіч”. Гэта сумесная праца Выдавецкага дома “Звязда” і кафедры беларускай філалогіі Беларускага дзяржаўнага тэхналагічнага ўніверсітэта.
Сёлета ў снежні наша краіна адзначыць 125-годдзе з дня нараджэння аднаго з пачынальнікаў беларускай літаратуры, выдатнага паэта Максіма Багдановіча. Юбілей, што набліжаеца, - добрая нагода яшчэ раз згадаць творцу, сабраць разам навуковыя і публіцыстычныя артыкулы, прысвечаныя яго жыццю і творчасці.
Куратарам інтэрнэт-старонкі “Максім Багдановіч” стаў кандыдат філалагічных навук, загадчык кафедры беларускай філалогіі Мікалай Трус. Мікалай Валянцінавіч – адзін з аўтараў персанальнай энцыклапедыі “Максім Багдановіч”, ён не так даўно выдаў манаграфію, прысвечаную творчасці класіка, а таксама добра знаёмы з іншымі даследчыкамі, якія вывучаюць творчасць паэта.
- Імя Багдановіча ў нашай літаратуры сімвалізуе стасункі з замежнымі краінамі. Ён шмат перакладаў, - распавядае Мікалай Трус. – Таму задумка сабраць разам многія матэрыялы, прысвечаныя жыццю і творчасці класіка, прадставіць іх у вольным доступе – проста выдатная. Больш за тое, з’яўленне старонкі, якая будзе папаўняцца новымі тэкстамі, можа выклікаць шырокі розгалас у грамадстве і абудзіць хвалю інтарэсу да творчасці класіка.
Ужо вядзецца збор матэрыялаў для прадстаўлення на новай старонцы. Сачыце за абнаўленнямі. Вас чакае мноства цікавостак.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
Што за таемнымі дзвярыма?