20 Верасень, чацвер

Вы тут

13 крокаў, каб быць стройнай


За тыдзень чалавек можа страціць каля 1 кг, гэта значыць, за месяц рэальна скінуць 3—4. Калі зыходная вага вялікая, гэтая лічба можа дасягаць 5 кілаграмаў. Аднак важна не фарсіраваць падзеі. Дайце сабе час, каб прыйсці ў форму.


Крок 1

Правільна снедаем

Для таго каб запусціць абменныя працэсы, снедаць трэба на працягу 1—1,5 гадзіны з моманту абуджэння. Ранішні прыём ежы вельмі важны з пункту гледжання паступлення энергіі, таму прапускаць яго не варта. Класічны варыянт сняданку — каша. Менш класічны, але таксама жыццяздольны — амлет, тварог, запяканка.

Крок 2

Плануем перакусы

У сярэднім за дзень у вас павінна быць 1-2 перакусы. Ланч — паміж сняданкам і абедам. Падвячорак — паміж абедам і вячэрай. У варыянце пяціразовага харчавання мы ядзім практычна кожныя 2—2,5 гадзіны. Для перакусу ідэальна падыходзяць садавіна, ёгурты, невялікі сандвіч з зерневым хлебам і гарачы напой.

Крок 3

Абедаем з розумам

Вельмі важна ўлічваць колькасць тлушчаў у сваім рацыёне! Частая памылка, якую робяць практычна ўсе людзі, калі абедаюць па-за домам і офісам, — няўважлівае стаўленне да ежы, якую ім падаюць ва ўстанове грамадскага харчавання. Адна справа з'есці проста салату, іншая — салату, багата запраўленую тлустым соусам альбо алеем. Кавалак мяса і незразумела з чаго зробленая катлета — таксама розныя рэчы! На жаль, мы звяртаем увагу на аб'ём ежы, а не на яе каларыйнасць. Гэта няправільна. Вас павінен хваляваць састаў прадуктаў, асабліва, калі вы ясцё не дома.

Крок 4

Вячэраем своечасова

Час вячэры — 19—20 гадзін. Аднак ён можа мяняцца як у адзін, так і ў другі бок. Усё залежыць ад таго, калі чалавек кладзецца спаць. Лепш за ўсё прымаць ежу за тры гадзіны да сну. Пры гэтым вы можаце зрабіць аблегчаны варыянт вячэры: кефір, вотруб'е (3 сталовыя лыжкі), трохі тварагу. Паўнавартасны варыянт: кавалак мяса, морапрадукты, тварог, яйкі, рыба або любы іншы бялковы прадукт. У якасці гарніру павінна быць толькі гародніна.

Крок 5

Пераглядаем рацыён

Выключыце з рацыёну запраўленыя маянэзам складаныя салаты, паўфабрыкаты, састаў якіх вам незразумелы ці вы ў ім не ўпэўнены. Абмяжуйце або зусім адмоўцеся ад свініны, бараніны, розных субпрадуктаў (печань, мазгі, ныркі). Дапушчальны аб'ём сметанковага масла — 1 чайная лыжка штодня. Таксама дыетолагі раяць устрымацца ад розных алеяў, лепш выкарыстоўвайце нізкатлушчавыя запраўкі — соевы соус, таматную пасту, лімонны сок, бальзамічны воцат і г. д. Усё гэта таксама смачна і не так каларыйна.

Крок 6

Высыпаемся

Чалавек лепш худзее, калі высыпаецца, паколькі менавіта ў сне выпрацоўваюцца пэўныя гармоны. Яны з'яўляюцца антаганістамі інсуліну. Калі вы добра адпачылі ноччу, вам не будзе хацецца салодкага. Але пры сістэматычным недасыпанні або бяссонніцы раніцай вам абавязкова спатрэбіцца шакаладка, цукерка і г. д. Утрымацца ад такіх спакусаў будзе нашмат больш складана.

Крок 7

Вучымся адрозніваць голад ад апетыту

Голад — стан, калі чалавек гатовы з'есці ўсё, што заўгодна. Апетыт — праява капрызу, гэта значыць вы перабіраеце, што б вам такога пакаштаваць цяпер, гэта ці тое. Вядома, не варта баяцца апетыту, яго з'яўленне — гэта нармальна. Але ў такой сітуацыі трэба не есці, а папіць! Гарачы напой, нават шклянка цёплай вады (лепш, калі вы выцісніце туды некалькі кропель лімоннага соку), адцягне вас на гадзіну-паўтары і дапаможа дажыць да наступнага, нармальнага прыёму ежы.

Крок 8

Харчуемся рэгулярна

Вялікая памылка: чым менш я ем, тым хутчэй худзею. Калі вы прапускаеце абед (любы іншы прыём ежы), ведайце, што ўвечары ў вас, верагодна, будзе зрыў. Вы з'ясцё больш, чым планавалі. У такой сітуацыі спрацоўвае ахоўны механізм: арганізму неабходна выжыць, таму ён будзе кампенсаваць недаатрыманую энергію з лішкам. Раптам вы наступны раз таксама вырашыце прапусціць абед?

Крок 9

Налягаем на гародніну і садавіну

Неабходна павялічыць долю гародніны і свежай садавіны ў сваім рацыёне. Яны змяшчаюць мінімум калорый і прыродную глюкозу, якая дае энергію. Таксама важна ўжываць бялок і малочныя прадукты. Малако, кефір, ражанка — усё гэта крыніцы неабходнага для нашых касцей кальцыю.

Крок 10

Замяняем небяспечнае салодкае на дазволенае

Дапушчальныя пладова-ягадныя прысмакі (зефір, пасціла, мармелад), але пры гэтым трэба звяртаць увагу на этыкетку. На жаль, сёння прадаюць вельмі шмат хімічных прадуктаў. У іх няма ні агар-агару, ні пекціну, затое ёсць толькі цукар і жэліруючыя рэчывы. Кампаненты павінны быць натуральнымі.

Таксама можна дазволіць сабе і шакалад. Аднак улічыце, што ўсім вядомы горкі шакалад валодае дакладна такой жа каларыйнасцю, як і малочны. Дазволеная дзённая доза — маленькая "плітачка". Адна папярочная пласцінка шакаладу змяшчае каля 100 калорый, а каб іх спаліць, вам спатрэбіцца плаваць або хадзіць 20-30 хвілін!

Крок 11

П'ём ваду

Абавязкова піце ваду. Яна адыгрывае вельмі важную ролю на этапе расшчаплення тлушчу. Часта чалавек сочыць за рацыёнам, але пры гэтым не звяртае ўвагі на колькасць выпітай вадкасці. У выніку лішнія кілаграмы не сыходзяць.

Разлічыць неабходны аб'ём вельмі лёгка: масу целаx 30 мл вадкасці. Напрыклад: 60 кгx 30 мл = 1800 мл. У гэтую лічбу ўваходзіць вада без газу, гарбата (але не надта завараная). Усё астатняе: супы, малако, сокі — не лічыцца.

Крок 12

Шмат ходзім і займаемся спортам

Важна павысіць фізічную актыўнасць. Вельмі эфектыўная хада. У адрозненне ад бегу, яна дае магчымасць зберагчы суставы і падыходзіць практычна ўсім людзям. Пры гэтым расшчапленне тлушчу адбываецца, толькі калі вы ходзіце без перапынку 45 хвілін! Калі ж вы дайшлі да бліжэйшага кіёска, а потым зноў ляглі на канапу — патрэбнага эфекту не будзе.

Крок 13

Не спадзяёмся на цуд

Не трэба думаць, што скінуць вагу можна, не прыкладаючы да гэтага ніякіх намаганняў. Некаторыя жанчыны ўскладаюць вялікія надзеі на масаж, але ў момант гэтай працэдуры худзее толькі масажыст. Падобныя рэчы — усяго толькі дадатак, штуршок для стымуляцыі расшчаплення тлушчаў. Без карэкцыі харчавання вага не зменшыцца!

Вера ФЕМІНА

Загаловак у газеце: 13 крокаў да стройнасці

Дадаць каментар

Выбар рэдакцыі

Грамадства

Чым здзіўлялі арганізатары Фестывалю навукі?

Чым здзіўлялі арганізатары Фестывалю навукі?

Толькі Ньютан і толькі хардкор! 

Культура

Новы музей і вулічны гадзіннік цяпер ёсць у Дуброўне

Новы музей і вулічны гадзіннік цяпер ёсць у Дуброўне

Іх стварылі ў гонар прадпрыемстваў, якія паспяхова функцыянавалі ў дарэвалюцыйны час.

Грамадства

Барацьба з баршчэўнікам Сасноўскага ідзе нежартоўная

Барацьба з баршчэўнікам Сасноўскага ідзе нежартоўная

Не выяўлены гіганцкі баршчэўнік пакуль толькі ў Брагінскім, Нараўлянскім і Лельчыцкім раёнах Гомельшчыны.

Грамадства

Якім чынам можа праяўляцца адзінота?

Якім чынам можа праяўляцца адзінота?

Адзінота і асабліва адзінота ў сям'і — рэальная прыкмета нашага часу.