Наваполацкая цэнтральная гарадская бальніца ўжо сёлета будзе мець усё, што неабходна для аказання медыцынскай дапамогі на сучасным узроўні. Застаецца атрымаць камп'ютарны тамограф і ангіёграф. Памяшканні для ўстаноўкі новай тэхнікі гатовыя, спецыялісты падрыхтаваныя. Пацыенты — у чаканні, бо, вядома, у справе атрымання лячэбнай дапамогі адлегласць мае значэнне. Адна справа ехаць па высокія тэхналогіі ў Віцебск ці нават Мінск, і другая — мець усё, што называецца, пад рукой.
Паслугамі бальніцы з 2013 года карыстаюцца не толькі жыхары самога Наваполацка, але і дзевяці навакольных раёнаў — многія з іх заўважаюць, што цяпер няма неабходнасці рвацца на абследаванне і лячэнне ў Віцебск ці сталіцу.
Мы з фотакарэспандэнтам вырашылі паглядзець у першую чаргу тое, у чым наваполацкая ўстанова аховы здароўя не саступае гарадскім бальніцам Мінска. Пачалі з асобнага корпуса радзільнага дома, які ў 2013-м быў перааснашчаны. Тут чыста, прыгожа, па-сучаснаму, і без бахілаў ды халата не пройдзеш.
— Раней існавалі два аддзяленні на 60 ложкаў у Наваполацку і Полацку, а затым быў створаны адзіны перынатальны цэнтр, — тлумачыць загадчыца радзільнага дома Маргарыта РАЗІНА. — У Полацку засталася кансультацыйная дапамога, а ўсіх парадзіх з двух гарадоў — каля 2,6—2,8 тысячы ў год — прымаем тут. Акрамя таго, усе складаныя выпадкі з дзевяці тэрытарыяльна блізкіх раёнаў таксама накіроўваюцца да нас. Практыка паказвае, што якасць аказання дапамогі стала ў выніку лепшай. За 30—40 хвілін, максімум за адну гадзіну, можа даехаць любая парадзіха. І гэта норма для родаў. Даязджаюць нават тыя, каму патрабуецца экстранная дапамога. Урачы на прыёме ўсё тлумачаць жанчынам — калі трэба ехаць, чаму не варта ні ў якім разе нараджаць дома, каб не рызыкаваць жыццём і здароўем ні сваім, ні дзіцяці.
У акушэрскім корпусе бальніцы — пяць паверхаў, тут размяшчаюцца ўласна акушэрскія і гінекалагічнае аддзяленні, рэанімацыя на шэсць ложкаў. Раней спецыяльнай рэанімацыі для парадзіх не было, а цяпер урачы-рэаніматолагі праводзяць абязбольванне ў родах — па паказаннях і па жаданні, анестэзію падчас аператыўных умяшанняў.
Да апаратаў штучнай вентыляцыі лёгкіх «падключаны» некалькі дзетак, спыняемся каля аднаго. «Немаўляты з экстрэмальна нізкай вагой, меншай за 1 кг, у нас рэдкасць — за пяць гадоў нарадзілася ўсяго чацвёра, — кажа загадчыца аддзялення інтэнсіўнай тэрапіі і рэанімацыі нованароджаных Алена КУР'ЯН. — Як правіла, тут знаходзяцца такія, як вось гэта немаўля, чыя вага пры нараджэнні была 1820 г, а цяпер 1710, што абсалютна нармальна. Усе дзеці скідваюць вагу ў першыя дні пасля з'яўлення на свет. Праз некалькі дзён малы адправіцца на другі этап выходжвання ў Віцебск».
Дэмаграфічныя паказчыкі ў горадзе — адны з найлепшых па вобласці. Звычайна ў дзень нараджаецца 10—16 немаўлят, а ўсяго летась нарадзілася 1160 навапалачан. На матуль у абноўленых палатах, на 4-5 месцаў або для дзвюх, прыемна паглядзець. У індывідуальнай — платнай (усяго 3,6 рубля за суткі) — застаём 28-гадовую Кацярыну з Полацка. «Я прыехала па накіраванні крышку раней, таму ніякіх праблем з тым, як дабірацца, не было, — кажа яна. — Два гады таму нарадзіла тут дзяўчынку, а цяпер і хлопчыка вагой 3 530 кг. Цяпер наладжваю грудное кармленне».
У структуры захваральнасці на першым месцы хваробы органаў дыхання, затым сістэмы кровазвароту і скуры.
— Мы спадзяёмся, што знізіць сардэчна-сасудзістую захваральнасць дапаможа стварэнне цэнтра камп'ютарнай нейравізуалізацыі пасля ўвядзення ў эксплуатацыю камп'ютарнага тамографа, а таксама цэнтра рэнтгенэндаваскулярнай хірургіі пасля завяршэння рэканструкцыі памяшкання і ўстаноўкі ангіёграфа, — расказвае галоўны ўрач Наваполацкай цэнтральнай гарадской бальніцы Сяргей НЯКРАСАЎ. — Важнай задачай застаецца зніжэнне анкалагічнай паталогіі. Летась колькасць памерлых ад раку вырасла амаль на 20 працэнтаў.
З аднаго боку, мы маем пасталенне насельніцтва, а з другога, для прамыслова-тэхнічнага горада заканамерны рост алергічных і анкалагічных захворванняў.
Да таго ж горад — гэта стрэсы, на вёсцы ў людзей зусім іншы расклад жыцця. Рост анкалагічнай паталогіі мы цяпер выяўляем і ў тых, хто выязджаў на заробкі ў Расію, не атрымліваў належнага лячэння, працаваў на шкоднай вытворчасці. А у цэлым праблема нашых мужчын сярэдняга ўзросту ў тым, што яны не бачаць неабходнасці рэгулярна наведваць урача, і, як высвятляецца, вельмі дарэмна. Праблемы з даступнасцю сёння няма — пазвані і прыедзь на прыём у любы зручны для цябе час.
Летась бальніца набыла сучасны рэнтгеналагічны комплекс «Космас 535», які можа захоўваць вынікі ўсіх абследаваных пацыентаў. «Сёння рэнтгеналагічнае даследаванне — гэта не плёнка, а вось такі камп'ютар, падключаны да лакальнай сеткі бальніцы, дзякуючы чаму здымкі даступныя не толькі нам падчас дыягностыкі, але і любому ўрачу, якому неабходна такая інфармацыя аб пацыенце, у тым ліку архіўная. Пры самых розных траўмах пацыент адразу дастаўляецца сюды, як, напрыклад, вось гэты хворы з пераломам таза, — кажа загадчык рэнтгеналагічнага аддзялення Аляксандр СУВОРАЎ.
Хірургічнае аддзяленне поўнасцю абнавілася дзесяць гадоў таму, але ў гэта цяжка паверыць — настолькі ўсё тут дагледжана і акуратна. Разлічана яно на 18 ложкаў, 12 з якіх хірургічнага профілю і 6 — кардыялагічнага. Трапляе сюды і той, хто ўпаў з вышыні, і той, хто перанёс інфаркт.
У аддзяленні анестэзіі і рэанімацыі бачым апараты для штучнай вентыляцыі лёгкіх, мульціфільтрат для правядзення замяшчальнай ныркавай тэрапіі, абсталяванне для плазмаферэзу, ультрафіялетавага апраменьвання крыві, лазернага лячэння.
У афтальмалагічным кабінеце стандартнае абсталяванне, якое можна сустрэць у кабінеце любога сучаснага ўрача гэтага профілю. Шчылінная лямпа з добрай оптыкай, апарат ультрагукавога даследавання, рэфрактометр. «Гадоў дзесяць таму мы пралечвалі каля 700—800 чалавек у год, а цяпер каля 2,5—3 тысяч, — удакладняе ўрач-афтальмолаг Людміла РУДАВА. — Расце і захваральнасць вачэй, і колькасць цяжкіх выпадкаў, у тым ліку запаленчых станаў. Наогул вочы — люстэрка ўсіх нашых праблем са здароўем. Тая ж праблема з сасудамі, станам імуннай сістэмы абавязкова адбіваецца і на стане вачэй». Сёлета на базе афтальмалагічнага аддзялення гарадской бальніцы плануецца стварыць міжраённы цэнтр мікрахірургіі вока, для чаго будзе набыты камбінаваны афтальмалагічны лазер.
Святлана БАРЫСЕНКА
Фота Надзеі БУЖАН
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
Што за таемнымі дзвярыма?
