18 Верасень, аўторак

Вы тут

Беларусь працуе на ўзмацненне адносін з усімі партнёрамі


Аб гэтым заявіў міністр замежных спраў Уладзімір МАКЕЙ на міжнароднай канферэнцыі экспертнай ініцыятывы «Мінскі дыялог». Яе падставай стала 25-годдзе знешняй палітыкі Беларусі. У мерапрыемстве прынялі ўдзел усе былыя міністры замежных спраў краіны, навукоўцы і дыпламаты.


— Дваццаць пяць гадоў устанаўлення дыпламатычных адносін Беларусі з іншымі дзяржавамі — гэта добрая магчымасць ацаніць, дзе мы зараз знаходзімся, дакладна адзначыць свае каардынаты на шкале вектараў знешняй палітыкі і зверыць планы на будучыню, — падкрэсліў ва ўступным слове кіраўнік знешнепалітычнага ведамства краіны.

Па словах Уладзіміра Макея, Беларусь нацэлена на ўмацаванне ўзаемадзеяння з усімі суседзямі і партнёрамі не на шкоду каму-небудзь і не за кошт каго-небудзь. Больш за тое, уся сутнасць нашай знешняй палітыкі заключаецца ў планамернай выпрацоўцы ўнутраных і знешніх умоў для пабудовы множных геапалітычных апор.

Кіраўнік МЗС таксама адзначыў, што знешняя палітыка Беларусі грунтуецца на наступных прынцыпах: непрымяненне сілы або пагрозы сілай, мірнае ўрэгуляванне спрэчак, непарушнасць меж і неўмяшанне ва ўнутраныя справы. «У тым ліку, менавіта ў сілу паслядоўнага выканання гэтых прынцыпаў беларусы, і гэта таксама адносіцца да нашых бясспрэчных дасягненняў, у найскладанейшым геапалітычным кантэксце здолелі не дапусціць пранікнення хаосу і гвалту, збераглі мір, бяспеку, стабільнасць у грамадстве і дзяржаве», — дадаў Уладзімір Макей.

Сёння Беларусь сапраўды з'яўляецца пляцоўкай для перамоў, пацвярджае старшыня Пастаяннай камісіі Савета Рэспублікі Нацыянальнага сходу па міжнародных справах і нацыянальнай бяспецы Сяргей РАХМАНАЎ. «Наша дзяржава сістэмна і ўвесь час, займаючы шматбаковую пазіцыю, адыгрывае вельмі важную ролю, — сказаў сенатар. — Не заўсёды гэта мела ацэнку, аднак апошнім часам гэта адбываецца. Што датычыцца далейшых крокаў, то Беларусь нікому не навязвае сваю пазіцыю, але яна кажа пра гатоўнасць дапамагчы, калі гэта будзе неабходна. А гэта сапраўды трэба, паколькі, на жаль, палітыкі розных краін не могуць дамовіцца ў тым фармаце, у якім хацелася б ім самім. Таму мы спадзяёмся, што палітыка, якую праводзіць Беларусь, будзе ўспрымацца чым далей, тым лепш». Сяргей Рахманаў таксама дадаў, што Беларусь і надалей будзе ўдзельнічаць ва ўрэгуляванні шматлікіх праблем, якія існуюць у свеце, але — не навязваючы сваю волю і рашэнні.

— Галоўны выклік для знешняй палітыкі Беларусі сёння заключаецца ў тым, што свет увайшоў у сітуацыю, калі старая сістэма і старыя правілы гульні ўжо не даюць вынік стабільнасці і развіцця, які быў раней, — адзначыў кіраўнік экспертнай ініцыятывы «Мінскі дыялог» Яўген ПРЭЙГЕРМАН. — І свет знаходзіцца ў пошуку гэтых новых правілаў. У такіх сітуацыях малыя краіны, заціснутыя паміж геапалітычнымі цэнтрамі прыцягнення — а гэта менавіта сітуацыя Беларусі — аказваюцца перад выклікам сваёй выжывальнасці.

На яго думку, сёння перад Беларуссю стаіць задача выбудаваць сваю знешнюю палітыку такім чынам, каб усе тыя рэсурсы, якія ў нас ёсць, максімальна накіраваць на забеспячэнне ўласнага суверэнітэту і развіцця.

Уладзіслаў ЛУКАШЭВІЧ

lukashevich@zvіazda.by

Загаловак у газеце: Выклікі і высновы

Дадаць каментар

Выбар рэдакцыі

Спорт

Вячаслаў Грэцкі: Часам называюць мяне Уэйнам

Вячаслаў Грэцкі: Часам называюць мяне Уэйнам

Пра знакамітае прозвішча і сучаснасць беларускага хакея.

Эканоміка

Ці можна кіраваць попытам спажыўцоў?

Ці можна кіраваць попытам спажыўцоў?

Ад спантаннай пакупкі са «зніжкай па-беларуску» можна не толькі не атрымаць якой-небудзь эканоміі, але і пераплаціць за яе.

Культура

У Мінск прыедуць «Іліяда» на папірусе і найстаражытнейшыя фрагменты Бібліі

У Мінск прыедуць «Іліяда» на папірусе і найстаражытнейшыя фрагменты Бібліі

Выстаўка адкрываецца ў Нацыянальнай бібліятэцы Беларусі.

Грамадства

Андрус Пулакас: У Беларусі шукаю не адрозненні, а супадзенні

Андрус Пулакас: У Беларусі шукаю не адрозненні, а супадзенні

З Літвой у нас агульнае гістарычнае мінулае, і зараз яна – наша бліжэйшая суседка ў Еўрасаюзе.