Вы тут

Як моладзь вывучае праблему гандлю людзьмі


18 актыўных маладых людзей сабраліся ў летнім лагеры пад Мінскам, каб больш даведацца і знайсці свой спосаб супрацьстаяць адной з глабальных пагроз сучаснасці — гандлю людзьмі. У праграме ў хлопцаў і дзяўчат — шэсць дзён, насычаных яркімі майстар-класамі з аўтарытэтнымі экспертамі.


Лагер пад назвай «Вывучай. Дзейнічай. Падзяліся» праходзіць ужо другі раз. Леташняе мерапрыемства паказала вялікую цікавасць з боку моладзі, таму сёлета была сабрана новая група неабыякавых да тэмы актывістаў. Ініцыятарам правядзення лагера выступіла прадстаўніцтва Міжнароднай арганізацыі па міграцыі ў Беларусі сумесна з Міністэрствамі замежных і ўнутраных спраў. Акрамя таго, праект падтрымалі розныя агенцтвы ААН: ПРААН, ЮНІСЕФ, ЮНФПА, Дэпартамент грамадскай інфармацыі (ДГІ) ААН, УВКБ ААН, ЮНЭЙДС сумесна з USAІD — Агенцтвам ЗША па міжнародным развіцці. Не засталіся ўбаку і прадстаўніцтвы МЗС Каралеўства Нарвегія і пасольства Вялікабрытаніі ў Рэспубліцы Беларусь, а таксама камерцыйныя арганізацыі, якія выступілі ў якасці спонсараў.

— Гандаль людзьмі з'яўляецца адной з найбольш небяспечных праяў арганізаванай транснацыянальнай злачыннасці. З 2002 года ў Беларусі выяўлена больш за 5600 ахвяр гандлю людзьмі, з якіх каля 5000 — ахвяры сексуальнай эксплуатацыі. Многае зроблена, каб мінімізаваць маштабы гэтай з'явы. Вядома, у адзіночку мы б не змаглі з гэтым справіцца, у нас напрацаваны добрыя сувязі з замежнымі калегамі і грамадскімі арганізацыямі. Правядзенне такога лагера — адна з мер прафілактыкі ў маладзёжным асяроддзі негатыўных з'яў, звязаных з гандлем людзьмі, — падкрэсліў падчас адкрыцця лагера намеснік начальніка галоўнага ўпраўлення па наркакантролі і супрацьдзеянні гандлю людзьмі (МУС) Уладзімір ЕМЯЛЬЯНАЎ.

Часам правядзення лагера — сярэдзіна лета — абрана нездарма: 30 ліпеня адзначаецца Сусветны дзень барацьбы з гандлем людзьмі. Дарэчы, менавіта Беларусь стала ініцыятарам надання яму ў 2013 годзе афіцыйнага статусу. Па даных Міжнароднай арганізацыі працы, на дадзены момант больш за 20 мільёнаў чалавек ва ўсім свеце з'яўляюцца ахвярамі прымусовай працы, прычым каля 70 % з іх — жанчыны і дзеці. Як расказаў кіраўнік прадстаўніцтва Міжнароднай арганізацыі па міграцыі ў Рэспубліцы Беларусь Зейнал ГАДЖЫЕЎ, на гэты год запланавана падпісанне глабальнага дагавора аб міграцыі. Ён стане першым пагадненнем, дасягнутым у выніку міжурадавых перагавораў і заключаным пад эгідай ААН, якое ахопіць усе аспекты міжнароднай міграцыі. Як чакаюць эксперты, гэта дапаможа істотна паўплываць у тым ліку і на праблему гандлю людзьмі.

Вяртаючыся да работы лагера: нягледзячы на тое, што гэтая тэма стала асноўнай, удзельнікі таксама закрануць пытанні спынення распаўсюджвання ВІЧ і СНІД, бежанства, устанаўлення гендарнай роўнасці і многае іншае. Увогуле — абмяркуюць усё тое, што звязана з Мэтамі ўстойлівага развіцця, якія былі прынятыя дзяржавамі — членамі ААН. Усяго мэт 17, і накіраваны яны ў глабальным сэнсе на ліквідацыю галечы, барацьбу з няроўнасцю і несправядлівасцю, а таксама на рашэнне праблем, звязаных з кліматычнымі зменамі.

Асноўная мэта лагера — растлумачыць, што кожны чалавек са свайго боку можа зрабіць, каб спыніць распаўсюджванне гэтых з'яў. Тое, што ўнесці свой уклад у змяненне сітуацыі да лепшага сапраўды можа кожны, незалежна ад свайго ўзросту, месцазнаходжання і сацыяльнага статусу, даказвае падбор удзельнікаў лагера. Гэта маладыя людзі ва ўзросце ад 18 да 25 гадоў з усёй Беларусі з розным жыццёвым і валанцёрскім вопытам. Каб стаць удзельнікам, трэба было ўсяго толькі запоўніць анкету, канчатковае ж рашэнне прымала конкурсная камісія. Так, напрыклад, выбраная Аліна МЕТНЕР працуе педагогам-арганізатарам у цэнтры дадатковай адукацыі дзяцей і моладзі «Росквіт» у Бабруйску, а таксама з'яўляецца валанцёрам грамадскага аб'яднання «Маці супраць наркотыкаў». Там актывістка вядзе клуб для дзяўчат, таму адна з мэт наведвання лагера — атрымаць новую карысную інфармацыю, якой можна будзе падзяліцца з падапечнымі экспертнага пункту гледжання. Акрамя таго, па выніках работы лагера яго ўдзельнікі прадставяць свае праекты на тэму міграцыі або процідзеяння гандлю людзьмі, якія будуць рэалізоўваць на працягу наступнага года ў рэгіёнах пры падтрымцы экспертаў і агенцтваў ААН.

Як расказала ўдзельніца лагера мінулага года журналістка Яўгенія ЛЕСНІКОВА, праект дазволіў не толькі значна больш даведацца аб праблеме гандлю людзьмі, але і бліжэй пазнаёміцца з дзейнасцю спецыяльных устаноў ААН, а таксама ўсталяваць кантакты з актывістамі з розных сфер. У сакавіку гэтага года ўдзельнікі сабраліся на двухдзённую сустрэчу, каб падзяліцца сваім вопытам арганізацыі і ўдзелу ў мерапрыемствах, на якія іх натхніла навучанне. Плануецца, што фармат бесперапыннага ўзаемадзеяння будзе прымяняцца і далей. І, як у прывітальным слове падкрэсліваў кожны з экспертаў, калі пасля ўдзельнікі падзеляцца атрыманай інфармацыяй хоць бы з блізкімі — значыць, праца праведзена не дарэмна.

Дар'я КАСКО

Загаловак у газеце: Час дзейнічаць

Выбар рэдакцыі

Культура

У нядзелю яўрэі святкуюць Новы год дрэў

У нядзелю яўрэі святкуюць Новы год дрэў

На гэта свята асаблівым чынам спажываюць розную садавіну, запіваючы келіхамі добра разбаўленага віна.

Грамадства

Як задаволіць кадравы голад у сферы ІТ?

Як задаволіць кадравы голад у сферы ІТ?

Работадаўцы кажуць, што быць добрым праграмістам і ўмець пісаць код для эфектыўнай работы ўжо недастаткова.

Культура

Балельшчыкі II Еўрапейскіх гульняў ужо рэзервуюць вясковыя гатэлі

Балельшчыкі II Еўрапейскіх гульняў ужо рэзервуюць вясковыя гатэлі

«Адышоў час, калі гасцям патрэбныя былі толькі «чарка і скварка», ім ужо цікавыя музеі, культурная праграма».