З 24 па 26 ліпеня ў горадзе Баранавічы Беларуская чыгунка правядзе фестываль музейных экспазіцый "Час, падзеі, людзі" сярод музеяў арганізацый беларускай магістралі. Ён адкрые дэкаду святочных мерапрыемстваў, прымеркаваных да прафесійнага свята - Дня чыгуначнікаў.
Фестываль музейных экспазіцый праходзіць на Беларускай чыгунцы ўпершыню. У цяперашні час на магістралі створаны і дзейнічаюць 19 музеяў і 22 пакоі баявой і працоўнай славы, якія налічваюць больш за 50 000 адзінак захоўвання. Таксама створаны два музея чыгуначнай тэхнікі пад адкрытым небам, якія знаходзяцца ў Баранавічах і Брэсце.
Фестываль праводзіцца ў два этапы. Першы - адборачны - прайшоў у аддзяленнях дарогі. Другі адбудзецца ў фармаце выставы, якая размесціцца на вакзале станцыі "Баранавічы-Палескія". Яна стане галоўнай падзеяй прэм'ернага фестывалю і конкурснай праграмы. На суд журы аддзяленні дарогі прадставяць экспанаты ў трох намінацыях. У намінацыі "Прэзентацыя музейнай экспазіцыі" ўдзельнікам трэба будзе прадэманстраваць выставачнае афармленне сваіх музейных экспазіцый. У намінацыі "Музейная рэліквія" будзе прадстаўлены шэраг прадметаў, якія адлюстроўваюць прыналежнасць да чыгуначнай тэматыцы. У намінацыі "Музей як аб'ект культурнага турызму" можна будзе пазнаёміцца не толькі з рэкламна-інфармацыйнымі матэрыяламі, а таксама пакінуць свае пажаданні ў адмысловай "Кнізе водгукаў", якая будзе ў кожнай дэлегацыі. Колькасць водгукаў наведвальнікаў будзе ўлічвацца членамі журы пры падвядзенні вынікаў.
Таксама ў рамках фестывалю прадугледжана правядзенне круглага стала, удзельнікі якога разгледзяць актуальныя пытанні развіцця музеяў Беларускай чыгункі і абмяняюцца вопытам работы па ўкараненні новых форм і метадаў работы ў музейную практыку.
У рамках культурнай праграмы прадугледжана наведванне музея гісторыі і чыгуначнай тэхнікі Баранавіцкага аддзялення Беларускай чыгункі і гарадскога краязнаўчага музея. Па выніках фестывалю будуць уручаны спецыяльныя дыпломы і прызы.
Важнай падзеяй напярэдадні Дня чыгуначніка стане адкрыццё пасля рэканструкцыі музея чыгуначнай тэхнікі Беларускай чыгункі ў Брэсце. Урачыстае мерапрыемства пройдзе 27 ліпеня. Дэлегацыі аддзяленняў беларускай магістралі прымуць удзел у адкрыцці выставачнага павільёна музея і азнаёмяцца з абноўленай экспазіцыяй музея пад адкрытым небам.
Сяргей РАСОЛЬКА
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
Што за таемнымі дзвярыма?