Вы тут

Айчынныя прадпрыемствы прадставілі Прэзідэнту навінкі вытворчасці


Снегаўборачныя і лёдазалівачныя машыны, спартыўнае абсталяванне і музычныя інструменты прэзентаваны на адмысловай выстаўцы. Адна з асноўных задач для ўсіх вытворцаў-удзельнікаў — імпартазамяшчэнне.


Адкрывалі экспазіцыю снегаўборачныя і лёдазалівачныя машыны, ратракі (транспартны сродак для падрыхтоўкі лыжных трас), створаныя на базе трактароў МТЗ, і снегагенератары ААТ «МІСОМ». «Цалкам беларуская» — падкрэсліў Аляксандр Лукашэнка ў дачыненні да тэхнікі.

— Да наступнай зімы павінен быць чыста беларускі ратрак, гэта не праблема. Самае складанае ў вас ёсць: энергетычны сродак, кабіна, кіраванне. А ўсё астатняе — элементарна. Сёлета вы забяспечваеце неабходны аб'ём, які патрэбны біятланістам, лыжнікам, з таго, што ёсць. У наступным годзе гэта тэхніка павінна быць выключна беларускай, — адзначыў Прэзідэнт.

У зале выставачнага комплексу «БелЭкспа», які ў народзе з-за сваёй формы атрымаў назву «Рамонак», прадстаўлена абсталяванне для заняткаў спортам і культурнага адпачынку.

Спартыўны інвентар створаны ў асноўным для дзіцячых спартыўных школ, устаноў адукацыі і аматараў — на званне распрацовак для прафесіяналаў не прэтэндуюць.

Прадпрыемства «Марка» прадставіла Аляксандру Лукашэнку свае лыжныя чаравікі для язды класічным і каньковым ходам. Больш за 3600 пар такога абутку паставяць у спартыўныя школы ў якасці спонсарскай дапамогі.

Асвоена вытворчасць і мацавання для лыжаў. Па якасці не саступаюць замежным канкурэнтам, а ў цане і выйграюць.

— Тое, што зрабілі гэтыя мацаванні, малайцы. Толькі не спыняйцеся. Удасканальвайце і абыходзьце гэтыя заходнія кампаніі. Зрабіце лепш, — сказаў кіраўнік дзяржавы.

Паказалі Прэзідэнту таксама лыжныя палкі, мазі і айчынныя лыжаролеры. У вытворчасці лыжаў пакуль не ўсё дасканала. Айчынныя прадпрыемствы ў гэтым кірунку плануюць супрацоўнічаць з замежнымі кампаніямі.

Далей размясцілася экспазіцыя музычных інструментаў: піяніна, гітары, баяны, гармонікі, цымбалы, домры, балалайкі, дуда.

Справа па вырабе інструментаў досыць тонкая і патрабуе ручной працы, таму аб'ёмы майстэрняў невялікія. Звярнуў увагу кіраўнік дзяржавы, што неабходна не толькі ствараць новыя, але і аднаўляць старыя інструменты.

Самі музыканты таксама сцвярджаюць, што некаторыя інструменты могуць «раскрыцца» толькі праз гады.

Першую скрыпку ў вытворчасці гэтага інструмента ў Беларусі зайграў майстар Аляксандр Сурба. Сярод лідараў у вытворчасці домраў і балалаек пінчук Руслан Макарэвіч. Яму Прэзідэнт даручыў захаваць школу па стварэнні гэтых інструментаў:

— Прыцягвай да работы столькі чалавек, колькі трэба. Таму што гэты інструмент трэба будзе яшчэ адрамантаваць, мабыць. За табой — школа. Пакуль ты адзін, але ў цябе павінна быць больш памочнікаў.

Вытворцы баянаў і гармонікаў з Маладзечна прэзентавалі сваю навінку — бескантактавую медыясістэму. Яна ўяўляе сабой баян, які з дапамогай Wі-Fі перадае гук на калонкі і можа імітаваць разнастайныя інструменты. Створана пакуль толькі чатыры такія баяны-аркестры.

Прэзідэнт даручыў дапамагчы і вытворцам гітар і цымбалаў: «Трэба зрабіць так, каб годная ў іх была вытворчасць, каб не сорамна было».

Аляксандр Лукашэнка ацаніў якасці і айчыннага піяніна, якое пакуль складаецца з імпартных дэталяў.

— Палічыце, колькі трэба грошай на ўсё, пра што мы гаварылі, без празмернасцяў. Да 1 кастрычніка скажыце. Асноўнае мы павінны вырабіць у сябе. Што трэба па імпарце пакуль закупіць — мы закупім. Але мы сабраліся для таго, каб вырабляць усё ў сябе. І дадаткова тыя інструменты, якія тут не прадстаўлены. Гэтая праграма павінна быць рэалізавана адсоткаў на 90—95 ужо ў 2019 годзе, — падвёў вынікі сустрэчы Прэзідэнт.

Грошы на годную справу абавязкова будуць, бо ўсё гэта робіцца для дзяцей. А здаровая, спартыўная, таленавітая і ўсебакова развітая моладзь — гарант шчаслівай будучыні нашай краіны.

Марыя ДАДАЛКА

Фота БЕЛТА

Загаловак у газеце: Цалкам беларускае!

Выбар рэдакцыі

Грамадства

Як выхаваць даследчыка за школьнай партай?

Як выхаваць даследчыка за школьнай партай?

Чаму ўсе краіны, якія развіваюць інавацыйную эканоміку, робяць сёння стаўку на STЕM? 

Грамадства

Ці набудуць у гаспадароў старыя хаты?

Ці набудуць у гаспадароў старыя хаты?

Адэльскі сельскі савет, што ў Гродзенскім раёне, можна назваць брамай у Еўрасаюз.