Вы тут

Міністр абароны анансаваў змены ў адтэрміноўках ад арміі


Сёння словы на вернасць народу і Радзіме ўрачыста вымавілі каля 9 тысяч салдат, якія былі прызваны на тэрміновую службу і службу ў рэзерве. Больш за дзве з паловай тысячы зрабілі гэта ў 72-м Аб'яднаным вучэбным цэнтры падрыхтоўкі прапаршчыкаў і малодшых спецыялістаў. Напярэдадні прысягі камандзіры сустрэліся з роднымі і блізкімі навабранцаў, адказаўшы на пытанні датычна побыту і асаблівасцяў службы.


— Двойчы на год, пасля заканчэння падрыхтоўкі новага папаўнення, мы прыводзім яго да прысягі, — сказаў міністр абароны Беларусі Андрэй Раўкоў. — Гэта ўрачысты дзень не толькі для войска, але і для бацькоў салдат, якія цяпер будуць атрымліваць ваенна-ўліковую спецыяльнасць. Я ўдзячны бацькам за выхаванне сыноў. Упэўнены, што ў кожнай сям'і ім далі тое, што трэба даць маладому чалавеку — добрыя адносіны да калектыву, краіны і доўгу перад Радзімай.

Андрэй Раўкоў асобна закрануў тэму адтэрміновак ад войска. Зараз каля 80% маладых людзей па розных прычынах не атрымлівае ваенна-ўліковую спецыяльнасць. Што не самым лепшым чынам адбіваецца на абароназдольнасці краіны.

— Адзіны шлях, які нам бачыцца, — гэта ўнясенне пэўных зменаў у заканадаўчыя дакументы, — працягвае Андрэй Раўкоў. — Гэта будзе зроблена ў вызначанай ступені неабходнасці ва ўмовах абароны правоў маладых людзей. Натуральна, застануцца адтэрміноўкі, якія тычацца сямейнага становішча, стану здароўя і іншых пытанняў. Узброеныя Сілы ніякім чынам не зацікаўлены ў тым, каб хворы малады чалавек прызываўся ў войска.

Андрэй Раўкоў нагадаў, што нядаўна былі павышаны больш чым удвая грашовыя выплаты салдатам тэрміновай службы. Таксама Міністэрства абароны зацікаўлена ў тым, каб юнакі, якія адслужылі ў войску, мелі прыярытэты пры паступленні на дзяржаўную службу, у ВНУ, атрыманні месца ў інтэрнаце.

— Таксама мы займаемся пытаннямі ўладкавання належнага побыту салдат. Сённяшняя армія — далёка не тая, у якой служылі бацькі цяперашніх вайскоўцаў. Іншымі сталі казармы, палігоны, тэхніка, зніклі некаторыя ранейшыя нарады...

Радавы Ілья Рубіс родам з Кобрына. Ваенная тэматыка для яго не стала нязведанай пляцоўкай. Наадварот, хлопец чатыры гады вучыўся ў Мінскім абласным кадэцкім вучылішчы.

— Я спачатку хацеў стаць сувораўцам, але не прайшоў туды па конкурсе. Затым паступаў у ліцэй МНС у Гомелі, але адгаварылі бацькі. Праз год я стаў кадэтам. Мой дзед ваенны, служыў у войсках ППА ў Азербайджане. Ды і бацька праходзіў службу на Балтыйскім флоце. Таму расказваць пра войска на ўласным прыкладзе было каму. Тут жа я стану ракетчыкам, буду працаваць на комплексе "Ігла". Раней захапляўся тапаграфіяй, вывучэннем мясцовасці. У Печах я прывык да новай абстаноўкі літаральна за два дні. Дапамагло кадэцкае мінулае. Вядома, што тым, у каго падобнага досведу няма, адаптавацца ў новых умовах будзе цяжэй. Таму як магу, дапамагаю сваім саслужыўцам у спазнаванні многіх патрэбных побытавых рэчаў.

Сёння навабранцы адправіліся ў сваё першае звальненне. Увечары яны мусяць вярнуцца ў свае часці. Наперадзе іх чакаюць вучоба, баявыя стрэльбы, палявыя выхады на вайсковай тэхніцы.

Валяр'ян ШКЛЕННІК

Выбар рэдакцыі

Грамадства

Як сучасныя палешукі рыхтуюцца да свята Уваскрэсення Хрыстовага

Як сучасныя палешукі рыхтуюцца да свята Уваскрэсення Хрыстовага

Аўтар «Звязды» расказвае на прыкладзе сваёй сям'і.

Культура

ЗЕНА: Ад сцэны не стамляюся!

ЗЕНА: Ад сцэны не стамляюся!

Графік у артысткі вельмі насычаны.

Грамадства

Звыклыя выключнасці. Ці можна зразумець «лічбавае племя»?

Звыклыя выключнасці. Ці можна зразумець «лічбавае племя»?

Даследаванне «Пакаленне «Z» у пытаннях і адказах» было прадстаўлена падчас навуковага стэндапа, арганізаванага для навучэнцаў профільных педагагічных класаў у БДПУ.

Грамадства

Ежа ці сімвал? Самы час зацікавіцца роспісам яек

Ежа ці сімвал? Самы час зацікавіцца роспісам яек

Карэспандэнт «Звязды» схадзіла на майстар-клас па стварэнні «пісанак».