Днямі канчаткова раскрыла сакрэт Полішынеля ВГТРК, якая сёлета адказвае за выбар прадстаўніка Расію і трансляцыю шоу у краіне-суседцы. Закрытым рашэннем журы другі шанс атрымаў спявак Сяргей Лазараў, які ўжо выступаў на "Еўрабачанні" ў 2016 годзе і заняў па суме галасоў міжнароднага журы і гледачоў трэцяе месца. Падобны рэстарт у свой час прадпрымалі некалькі артыстаў, у тым ліку расійскі спявак Дзіма Білан, які ў 2008-м, нагадаем, з другой спробы такі выйграў конкурс. Філіп Кіркораў, які займаецца падрыхтоўкай Лазарава да "Еўрабачання-2019", параіў фанатам набрацца цярпення - песня будзе прадстаўлена пазней.
Амаль палова з 42 краін-удзельніц "Еўрабачання", што пройдзе сёлета ў маі ў Тэль-Авіве пад дэвізам Dare To Dream ("Асмелься марыць"), ужо выбрала сваіх канкурсантаў. Так, названыя прадстаўнікі ад Аўстрыі, Албаніі, Бельгіі, Вялікабрытаніі, Сан-Марына, Арменіі, Албаніі, Мальты, Нідэрландаў, Фінляндыі, Іспаніі, Італіі, Чэхіі, Аўстраліі, Кіпра, Чарнагорыі, загадзя эпаціраваў публіку прадстаўнік Францыі... Шырока абмяркоўваецца ў еўрапейскіх СМІ і магчымае запрашэнне Мадонны ў якасці спецыяльнага госця на фінальнае шоу – папярэдняя згода сусветнай зоркі, падкрэсліваюць ізраільскія выданні, ужо атрыманая, але бакі яшчэ вядуць перамовы наконт сумы ганарару.
23 лютага адбудзецца фінал нацыянальнага адбору ва Украіне. Беларусь таксама яшчэ не завяршыла нацыянальны адбор: фінальны гала-канцэрт, у якім, дарэчы, сёлета выступяць не толькі беларусы, але таксама артысты са Швецыі і Нігерыі, мусіць адбыцца да 8 сакавіка. Пакуль жа ў Белтэлерадыёкампаніі знялі відэапрэзентацыі для кожнага з 10 фіналістаў адбору – гэткі шлях да запаветнай мары, на якім выканаўцаў падсцерагаюць пэўныя перашкоды і выпрабаванні.
Вікторыя ЦЕЛЯШУК
Фота instagram.com і tvr.by
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
Што за таемнымі дзвярыма?
