Вы тут

Як праходзіць комплексная праверка ў войску


З 29 студзеня ў беларускай арміі праходзіць комплексная праверка. Яна скіравана на тое, каб праінспектаваць баявую і мабілізацыйную гатоўнасць злучэнняў і воінскіх часцей. Дзеля гэтага з запасу было прызвана каля 1400 чалавек. Больш за 30 з іх патрапілі ў 120-ю Рагачоўскую асобную механізаваную брыгаду. Яны дэмабілізаваліся з тэрміновай ваеннай службы ў розны час. Камусьці давялося нанова прыйсці ў ваенкамат менш чым праз дзевяць месяцаў. Іншым — праз адзін, паўтара і нават два дзясяткі гадоў. Але разам з тым іх усіх аб'ядноўвае адно — аднавіць за месяц тыя навыкі, якія атрымалі, трапіўшы калісьці ў войска па прызыве. А разам з тым — і даведацца нешта новае, паколькі тэхнічны прагрэс на месцы не стаіць.


У нядзелю ў байцоў праводзіліся заняткі на мінскім навучальным цэнтры «Уручча». Яны ўключалі ў сябе медыцынскую, тактыка-спецыяльную, інжынерную і хіміка-біялагічную падрыхтоўку, асваенне новых сродкаў сувязі, а таксама баявыя стрэльбы з аўтамата Калашнікава. Як гэта адбывалася, назіралі карэспандэнты «Звязды».

— Ваеннаабавязаныя ўжо прынялі ваенную прысягу, ім уручана зброя, праведзены заняткі па тэхніцы бяспекі, — гаворыць намеснік камандзіра 120-й асобнай гвардзейскай механізаванай брыгады гвардыі палкоўнік Дзмітрый Бурдукевіч. — Пасля таго, як яны адновяць свае навыкі тут, ім трэба здзейсніць марш у прызначаны раён, дзе яны выканаюць усе задачы па прызначэнні. Максімальную складанасць выклікае, пэўна, сувязь. Справа ў тым, што за апошнія гады на ўзбраенне былі прыняты новыя радыёстанцыі, якіх, натуральна 15—20 гадоў таму не існавала ў прыродзе. Менавіта таму мы разгарнулі вучэбнае месца, дзе прадстаўлены новыя ўзоры сродкаў сувязі, а таксама тыя, якія ўжо ўстаноўлены на тэхніцы, з якой прызваныя з запасу будуць працаваць.

Новая радыёстанцыя «Р-180» візуальна нагадвае мабільны тэлефон з эпохі 1990-х. Але функцыянал мае куды большы, чым старыя музейныя «трубкі».

— Гэтыя радыёстанцыі выкарыстоўваюцца многімі падраздзяленнямі. Яны прыйшлі на замену больш старым апаратам, — гаворыць старшы лейтэнант Максім Ганчар. — Паступілі яны да нас у 2014 годзе. Станцыі забяспечваюць добрыя магчымасці для далёкай сувязі, дзякуючы ім можна вяшчаць у вялікім дыяпазоне частот. Яна працуе ў двух рэжымах — як лічбавым, так і аналагавым, каб была магчымасць звязацца з радыёстанцыямі старога парка. Вось літаральна толькі што сюды падыходзіла старэйшая ўзроставая група. І я за 15 хвілін усё паказаў і расказаў, як настроіць радыёстанцыю. Тым больш што інтэрфейс прылады нагадвае сімбіёз аналагавай радыёстанцыі і сучаснага тэлефона.

Вока чапляе, як мужчыны вяртаюцца з вучэбнага месца па інжынернай падрыхтоўцы. Калону замыкае малодшы сяржант Андрэй Жылінскі.

— Мне тыдзень таму споўнілася 40 гадоў. І як ні дзіўна, гэта мае першыя зборы з таго часу, як я пад новы, 1999-ы, звольніўся ў запас. Служыў я ў 76-й радыётэхнічнай брыгадзе ў Мінску санінструктарам. І цяпер я таксама санінструктар. Засталося толькі ўспомніць былыя навыкі... За два дні, якія я тут знаходжуся, звярнуў увагу, што ў побыце змянілася ўсё. Пра тыя ж пральныя машыны дваццаць гадоў таму мы і думаць не маглі. Ды і рацыён значна палепшыўся. Вось толькі трапіў я сюды ну вельмі нечакана. Павестку прынеслі дадому ўвечары, а на наступны дзень я ўжо мусіў быць у ваенкамаце. Дома чакаюць два сыны-падлеткі.

Тым часам пачынаюцца заняткі па медыцынскай падрыхтоўцы.

— Па змоўчанні дзейнічаем так, быццам у вас паранена бядро, — кажа старшы лейтэнант медыцынскай службы Мікалай Андрушкевіч. — Вам трэба ўлічваць, што параненая канечнасць мусіць знаходзіцца зверху, таму што з ёй прасцей працаваць. Першы жгут — самы тугі. Другі кладзецца нахлёстам. Чаму гэта робіцца ў становішчы лежачы? Уявіце сябе ў баявой абстаноўцы, дзе ляцяць кулі. А высока ўзнятая галава, як у фільме «9 рота», — гэта падарунак для снайпера. Таму ўсе дзеянні выконваюцца толькі ў становішчы лежачы, каб вы не выдалі ні сваё месцазнаходжанне, ні групы. Пытанні ёсць? Калі няма, то разбіраем жгуты і трэніруемся. І хачу адразу сказаць: мы тут не для таго, каб проста здаць нарматывы, а для таго, каб навучыцца.

Адзін з байцоў спраўляецца з заданнем вельмі хутка. Падыходзім да яго. Івану Семчанку нядаўна споўнілася 23 гады. Гэта яго першыя зборы пасля звальнення ў запас, якое адбылося ўсяго восем месяцаў таму.

— Я служыў паўтара года ў зенітна-ракетных войсках. За восем месяцаў навыкі, атрыманыя ў войску, не забыліся. Вось толькі не мог паверыць, што калі прыйшла павестка, зноў трэба ў войска. Мяне чакаюць жонка і малое дзіця.

Іван працуе слесарам на станцыі тэхнічнага абслугоўвання. Зрэшты, яго знаёмства з аўтамабілямі на гэтым не заканчваецца.

— Тут я — старшы кіроўца. Падчас тэрміновай службы я атрымаў катэгорыю Е, а яшчэ да таго ад ваенкамата здаў на катэгорыю С. Хутка мы рушым калонай на Барысаўскі палігон, дзе будзем жыць у палатках. А паколькі ў нас рамонтнае падраздзяленне, то будзем забяспечваць вываз умоўна падбітай тэхнікі з поля бою.

І хочацца верыць, што ў прызваных з запасу атрымаецца ўсё.

Валяр'ян ШКЛЕННІК

Фота Таццяны ТКАЧОВАЙ

Выбар рэдакцыі

Эканоміка

Петришенко: Называть ЕАЭС экономическим союзом сегодня можно только авансом

Петришенко: Называть ЕАЭС экономическим союзом сегодня можно только авансом

Однако наша страна надеется, что это временные трудности.

Грамадства

Апублікаваны поўны тэкст Канцэпцыі інфармацыйнай бяспекі Беларусі

Апублікаваны поўны тэкст Канцэпцыі інфармацыйнай бяспекі Беларусі

Дзяржаўным органам і іншым арганізацыям даручана кіравацца палажэннямі канцэпцыі ў практычнай дзейнасці.

Калейдаскоп

Каля 150 спартсменаў-аматараў хочуць выступіць у «даеўрапейскіх гульнях»

Каля 150 спартсменаў-аматараў хочуць выступіць у «даеўрапейскіх гульнях»

Трэніроўкі і здымкі ўдзельнікаў пачнуцца ў красавіку.

Грамадства

Сувораўскае вучылішча вачыма яго навучэнцаў

Сувораўскае вучылішча вачыма яго навучэнцаў

Быць сувораўцам ва ўсе часы было прэстыжна.