Вы тут

У «Беларусьфільма» тры інфармацыйныя нагоды і ўсе аб новых фарматах


На гэтым тыдні Нацыянальная кінастудыя прадэманстравала сваё «пераарыентаванне». У адзін дзень запусціла свой першы сіткам пад рабочай назвай «Ілюзіі», абвясціла аб хуткім завяршэнні першай поўнаметражнай анімацыйнай карціны «Зоркі сёмага неба» і назвала пераможцаў конкурсу на сцэнарый зноў жа анімацыйнага фільма ў фармаце поўнага метра. Конкурс таксама быў праведзены ўпершыню. «Беларусьфільм» ідзе непракладзенымі сцежкамі, чым, напэўна, намагаецца абвергнуць некампліментарныя стэрэатыпы пра сябе. Што з гэтага атрымаецца і ці набудзе ўстанова новую форму, гледачу яшчэ давядзецца пабачыць.


Імідж наперад

Уладзімір Карачэўскі толькі крыху больш за год працуе на пасадзе дырэктара Нацыянальнай кінастудыі, а на прэс-канферэнцыях абвяшчаюць новае і новае. То ўдзел у капрадукцыйных праектах, то далучэнне да Індустрыяльнай платформы кінафестывалю «Лістапад», то стварэнне экскурсійных маршрутаў па кінамясцінах Мінска, то серыя паказаў дакументальных фільмаў «Час «Летапісу» ў кінатэатры «Піянер», то, нарэшце, кінафарматы, якія «Беларусьфільм» асвойвае ўпершыню.

Прамільгнула і навіна пра наведванне кінастудыі кіраўніцамі і жонкамі кіраўнікоў дыпламатычных місій напярэдадні 8 сакавіка — штогадовая сустрэча, якую арганізуе жонка міністра замежных спраў Вера Палякова-Макей, гэтым разам прайшла на «Беларусьфільме», сярод касцюмаў і ружжаў з піратэхнічнага аддзела. То-бок, бачна, што работа над іміджам вядзецца.

Хоць зразумела, кінастудыя ў першую чаргу ацэньваецца па сваіх работах, а кінапракат апошнім часам яна парадавала толькі «Жыццём пасля жыцця» Дзмітрыя Астрахана і «Чорным сабакам» па кнізе Мікалая Чаргінца. Другая карціна, дарэчы, пасля паказаў на тэлеканале НТВ 11 красавіка выйшла ў мінскі пракат (рэспубліканскі конкурс кінапраектаў усё прадугледжвае і прапануе ствараць дзве версіі фільма — чатыры серыі для тэлебачання, спадзяюцца, расійскага, і поўны метр для вялікага экрана, ужо беларускага).

Пераарыентаванне ж — працэс доўгі, перанастройка канвеера буйной кінафабрыкі вымагае часу, а пакуль можна браць экскурсіямі. Мы чакаем, ці адзначыцца новая вяха кінастудыйнай гісторыі ў фільме пра Янку Купалу і экранізацыі «Авантур Пранціша Вырвіча» Людмілы Рублеўскай, а «Беларусьфільм» тым часам нават перавышае чаканні і пачынае камедыйны серыял. Як бы адказваючы на запыт сучаснага гледача.

Дарогу маладым

Таму шмат што гэтымі днямі тут здараецца ўпершыню. Першыя здымкі «Ілюзій» у павільёне «Беларусьфільма» прайшлі 9 красавіка. Гэта будзе шаснаццацісерыйны (па 26 хвілін) камедыйны маладзёжны серыял, у якім шэсць герояў павінны хутка паставіць паспяховы спектакль, каб выратаваць студэнцкі тэатр ад закрыцця.

Да таго ж аказалася, што пасля сарака гадоў існавання студыі анімацыйнага кіно яна здольная на поўны метр. Маецца на ўвазе фільм, які адразу робіцца як поўны метр, а не складаецца з кароткаметражных частак. Работа над першым — «Зоркі сёмага неба» — вядзецца ўжо некалькі гадоў.

«Кінастудыя пераарыентавала сваю палітыку: цяпер мы працуем не толькі з мэтрамі і вядомымі людзьмі, але і актыўна — з моладдзю. Прыкладам з'яўляецца наша рэпертуарная палітыка: мы пачалі здымаць маладзёжны сіткам, у якім удзельнічаюць акцёры, што альбо год-два таму скончылі Акадэмію мастацтваў, альбо яшчэ вучацца, ствараюцца альманахі ігравога і дакументальнага кіно, дзе рэжысёрамі выступаюць дэбютанты, над нашымі анімацыйнымі фільмамі працуюць у тым ліку маладыя мастакі-аніматары і рэжысёры-аніматары», — расказвае Уладзімір Карачэўскі.

Адзінае, што здымаюцца ў сіткаме ўчарашнія студэнты, ну, тут па сюжэце прадугледжана, а рэжысёрскае крэсла маладому не даверылі: аддалі майстру Івану Паўлаву.

У стварэнні «Зорак сёмага неба» маладыя задзейнічаны, а кіраўніцтва праектам узяла на сябе ўжо вядомы рэжысёр Алена Турава, дачка Віктара Турава і аўтар «Рыжыка ў Залюстроўі» і «Кіндэр-Вілейскага прывіда». Яна ж зоймецца работай над, лічы, другой поўнаметражнай анімацыйнай карцінай па сцэнарыі-пераможцы ўжо згаданага маладзёжнага конкурсу.

Як ні круці, кінастудыя немінуча агаляе праблему сучаснага беларускага кіно — майстры ёсць, а замены ім няма, у буйныя праекты нам няма каго прапанаваць. І справа тут не ў палітыцы «Беларусьфільма», куды ты яе ні арыентуй, а ў тым, што ў свой час наша кінаіндустрыя ўпусціла нешта важнае.

Старажытнаславянскія багі

З дваццаці пададзеных на конкурс сцэнарыяў заявак і трынаццаці дапушчаных да разгляду журы найлепшым быў прызнаны сюжэт «Песня Сірын» Сяргея Рагатка, у якім задзейнічаны пантэон старажытнаславянскіх багоў і міфалагічных істот — уласна птушка Сірын, Вялес, Пярун, Макоша, Купала і Кастрама, Паляндра, Дуб Светабудовы ды іншыя.

Два хлопчыкі па дарозе на дачу сустракаюць дзіўную птушку, якая крадзе тэлефон аднаго з іх. У пошуках апарата галоўныя героі становяцца сведкамі неверагодных падзей і мусяць прадухіліць знішчэнне Ніжняга, Верхняга і Пасярэдняга светаў.

«Кінастудыя паварочваецца і ў бок гледача. Апроч фестывальнага інтарэсу, нам важна, каб у аўдыторыі была зацікаўленасць. Каб людзі, якія сустракаюць супрацоўніка кінастудыі на вуліцы і даведваюцца, што ён там працуе, не пыталіся: «А што, яна яшчэ існуе?» Мы хацелі б, каб тое, што мы робім, знаходзіла водгук у беларускага гледача, каб ён ведаў, што мы робім, і пазнаваў персанажаў», — кажа Алена Турава.

Сцэнарый «Песні Сірын» ператворыцца ў фільм, а два ўдзельнікі, якіх журы вырашыла адзначыць заахвочвальнымі прызамі («Пенаты» Алены Зміцер і «Залаты яблык» Станіслава Сабалеўскага), застануцца ў сцэнарным партфелі кінастудыі.

У што б згаданыя «першыя» ініцыятывы не выліліся, у калідорах студыі ўпершыню за некалькі гадоў узнікае прыемнае адчуванне, што «кінафабрыка» разам з усімі няўдачамі, прынамсі, прыкладае намаганні да таго, каб пераламіць песімістычную традыцыю.

Атрымаецца папулярны сіткам ці не, ацэніць глядач поўнаметражную беларусьфільмаўскую анімацыю альбо праігнаруе, магчыма, адна з навінак кінастудыі спрацуе і скажа, што на «Беларусьфільме» прыйшлі лепшыя часы.

Сафія ПАЛЯНСКАЯ

Загаловак у газеце: Непракладзеныя сцежкі

Выбар рэдакцыі

Грамадства

Што паглядзець у Хоцімску?

Што паглядзець у Хоцімску?

У Хоцімску нават ёсць кола агляду.

Грамадства

«За больш чым сем год былі ўсяго адны суткі без баявога выезду»

«За больш чым сем год былі ўсяго адны суткі без баявога выезду»

Гісторыя кар'еры падпалкоўніка ў адстаўцы Генадзя Цімахоўцава.

Палітыка

Беларусь і ЕС падпішуць візавае пагадненне не пазней за 2 лютага 2020 года

Беларусь і ЕС падпішуць візавае пагадненне не пазней за 2 лютага 2020 года

Верагодна, гэта адбудзецца ўжо ў гэтым лістападзе. 

Грамадства

Як праходзіў ваенна-гістарычны фестываль «Мір-1812»

Як праходзіў ваенна-гістарычны фестываль «Мір-1812»

Трэці раз ваенна-гістарычны фестываль «Мір-1812» на два дні перанёс пасёлак больш чым на два стагоддзі назад.