Больш за 150 спартсменаў з 36 краін свету — гэта самыя моцныя батутысты сучаснасці. Сярод іх — прадстаўнікі Кітая, Японіі, Расіі, Францыі і, вядома ж, беларусы. Этап Кубка свету для спартсменаў здабыў адразу некалькі важных значэнняў, акрамя розыгрышаў медалёў непасрэдна самога турніру, спаборніцтвы ў Мінску сталі тэставымі перад ІІ Еўрапейскімі гульнямі і адным з этапаў адбору на Алімпійскія гульні 2020 года.
Пэўныя выпрабаванні прайшлі і беларускія арганізатары, спартыўныя менеджары, бо ім трэба было паказаць, наколькі «Мінск-Арэна», якая прыме спаборніцтвы ІІ Еўрапейскіх гульняў па ўсіх гімнастычных дысцыплінах, гатовая да чэрвеньскага буйнога турніру. «Перад пачаткам этапу Кубка свету ў Мінску мне давялося азнаёміцца з асноўнай і трэніровачнай арэнамі, дзе пройдуць спаборніцтвы па скачках на батуце на ІІ Еўрапейскіх гульнях, а таксама інвентаром — усё на самым высокім узроўні, арганізатары добра падрыхтаваліся. Даводзілася не раз чуць ад спартсменаў, што выступаць у такой атмасферы вельмі камфортна. Яшчэ раз хацеў бы падкрэсліць: перакананы ў паспяховасці будучых спаборніцтваў батутыстаў падчас Гульняў», — адзначыў у сваім камэнтарыі прэзідэнт тэхнічнага камітэта Еўрапейскага гімнастычнага саюза па скачках на батуце Уладзімір Земан.
Са спартыўнага пункту гледжання Кубак свету ў Мінску атрымаўся таксама захапляльным і інтрыгуючым. Напрыклад, у індывідуальных скачках у фінал не змог адабрацца адзін з лідараў кітаец Дон Дон, а ў жаночым турніры ў барацьбе за медалі не прынялі ўдзел беларускі.
Аднак нашы спартсмены сталі пераможцамі ў сінхронных скачках, сярод мужчын «золата» Кубка свету заваявалі Уладзіслаў Ганчароў і Алег Рабцаў, у жаночым турніры, паказаўшы ідэальнае выкананне скачкоў, перамогу атрымалі Ганна Ганчарова і Марыя Махарынская.
Алімпійскі чэмпіён Рыа-2016 Уладзіслаў Ганчароў стаў яшчэ і ўладальнікам «бронзы» ў індывідуальных спаборніцтвах. На жаль, дапусціўшы памылку, ён не змог змагацца за «золата». «Сінхронную праграму з маім партнёрам па камандзе Алегам Рабцавым адпрацавалі добра, а вось у індывідуальным выступленні мне хацелася пазмагацца за больш высокія месцы на п'едэстале. Я дапусціў грубую памылку: на прамым элеменце сагнуў ногі, за што суддзі знялі балы», — расказаў Уладзіслаў.
Залаты медаль індывідуальных скачкоў у мужчын заваяваў расійскі атлет Міхаіл Мельнік, яго суайчыннік Андрэй Юдзін стаў другім.
У жаночых індывідуальных скачках «золата» аказалася ў кітаянкі Чжу Сюэін, расійская спартсменка Яна Паўлава выйграла сярэбраны медаль, на трэцюю прыступку п'едэстала ўзнялася кітаянка Лін Кванкі.
Зараз у беларускай каманды невялікі адпачынак, а ўжо 25 красавіка стартуе чарговы трэніровачны збор.
Дар'я ЛАБАЖЭВІЧ
Фота Ганны ЗАНКАВІЧ
Як мы бярозавік куплялі на гандлёвай пляцоўцы лясгаса і ў лясніцтве
Творчая вечарына народнага артыста Беларусі прайшла ў адной з мінскіх гімназій.