Вы тут

Лукашэнка: Справа Прэзідэнта — «прасячы» акно туды, куды мы лічым патрэбным


Літаральна ўчора на пасяджэнні з урадам і губернатарамі Прэзідэнт абмяркоўваў экспарт. Карыстаючыся магчымасцю задаць пытанне Прэзідэнту падчас наведвання Рэспубліканскага навукова-практычнага цэнтра анкалогіі і медыцынскай радыялогіі імя М.М. Аляксандрава, журналісты аб’ядналі гэту тэму са знешняй палітыкай, паколькі графік ў апошні час вельмі насычаны — кожны тыдзень замежныя візіты, калісьці і па два на тыдні. Напярэдадні Аляксандр Лукашэнка анансаваў візіт на Бліжні Усход. Ужо даўно аўстрыйцы расказалі аб тым, што і яны ў лістападзе чакаюць лідара Беларусі. Што ў палітыцы паразуменне неблагое — відавочна. А што ў эканоміцы? Якіх вынікаў чакае лідар краіны ў працяг ўсіх гэтых візітаў і перамоў?


«Справа Прэзідэнта — з часоў Пятра І — „прасячы“ акно туды, куды мы лічым патрэбным. Калі Прэзідэнт прыехаў у Кітаў, у Індыю, на Бліжні Усход, у Расію, зараз у Аўстрыю, потым у Латвію мы дамаўляліся, гэта значыць, Прэзідэнт мусіць не толькі шлях пралажыць туды, а следам павінны прыйсці тыя, хто мусіць прадаваць сваю прадукцыю, купляць там і гэтак далей. Вось мая задача», — растлумачыў Прэзідэнт.

Але, адзначыў ён, у Беларусі склалася так, што недастаткова прарубіць акно і пралажыць шлях, каб начальнікі пачалі імкнуцца да новых гарызонтаў. Таму Прэзідэнт мае ехаць зноў, дамаўляцца і «гандляваць за іншых».

«А потым гляжу, калі не варушацца, дык трэба іх на супакой адпраўляць ці яшчэ кудысьці», — сказаў ён.

Аляксандр Лукашэнка назваў візіты ў Аўстрыю і Латвію «акном пасля забору, які быў вакол нас пабудаваны» пасля ўведзеных санкцый. Таму дзяржава мусіць на новым узроўні ствараць новыя сувязі.

На Бліжнім Усходзе Аляксандр Лукашэнка бываў неаднаразова. Асаблівасць працы з арабскім светам — багатыя краіны Пярсідскага заліву хочуць працаваць не па дзяржаўнай лініі, а з сям’ёй. 

«Я ім тлумачу, што ў нас не прынята, каб сям’я Прэзідэнта (гэтым займалася — прым. „Звязда“) — не, размаўляць не жадаюць. Таму ў мяне старэйшы сын у ролі Памочніка, ён пастаянна курыруе гэтыя сферы. І яны на гэта ідуць. Мы выбудавалі, асабліва з Эміратамі, добрыя адносіны. Шэйх быў тут, мы сустракаліся, пра многае дамовіліся. І мне вельмі спадабалася яго ідэя: кажа, што, калі я прафінансую вашых фермераў, сялян і куплю ў вас прадукцыю? Ён упэўніўся, што гэта вельмі якасная прадукцыя. Кажу — для нас гэта падарунак», — лічыць Прэзідэнт.

Ён перакананы: калі краіны гатовы інвеставаць у Беларусь, пашыраць сваю прысутнасць, гэта трэба замацоўваць. Да таго ж запланаваны візіт — магчымасць для кіраўніка краіны адысці ад штодзённага жыцця і адпачыць хаця б тры дні.

Хто мы, колькі нас, якія мы?

У Беларусі завяршаецца перапіс насельніцтва. Нечакана гэта кампанія выклікала дастаткова балючую рэакцыю асобных людзей і рэсурсаў, чаго не назіралася раней. Нават гучалі заклікі да байкоту. Журналісты запыталі, як, на погляд Прэзідэнта, можна растлумачыць настолькі неадэкватную рэакцыю на традыцыйную і важную кампанію. 

«Вытокі неадэкватнасці — у розумах неадэкватных людзей. Часта кажам: ім што не зрабі — усё блага. Вось ёсць у нас некалькі тысяч такіх людзей: перапіс — гэта дрэнна, асабістыя даныя кудысьці трапяць — дрэнна», — сказаў Аляксандр Лукашэнка.

Нават Прэзідэнт прайшоў перапіс без боязі, што яго асабістыя даныя кудысьці трапяць, пры тым, што пра ключавую фігуру ў дзяржаве і так ведаюць амаль усё.

«Які там страх? Пры перапісе ў кішэню не лезуць, капейкі ці рублі не лічаць. Надуманасць нейкая — „не будзе карысці ад гэтага“. Ці — „непразрысты перапіс“. Слухайце, з аднаго боку кажуць, каб дадзеныя кудысьці не трапілі, а тут кажуць — гэта не празрыста і параўноўваюць з выбарамі», — Прэзідэнт лічыць, што не варта і ўвагі надаваць такой недарэчнасці.

Дзяржаве трэба ведаць колькасць насельніцтва, яго структуру, узровень жыцця, каб далей працаваць. Кіраўнік дзяржавы нагадаў, што хутка пачнецца планаванне новай пяцігодцы, а напярэдадні Прэзідэнцкіх выбараў трэба дакладна скласці спісы выбаршчыкаў.

Аб святкаванні 7 лістапада

Беларусь — адна з нямногіх краін, якая захавала агульнарэспубліканскі статус дня Кастрычніцкай рэвалюцыі. Па перакананні Прэзідэнта, база для развіцця Беларусі створана менавіта ў СССР, краіна была высокатэхналагічнай. Як гісторык, Аляксандр Лукашэнка заклікае не адмаўляцца ад мінулага — таму і вырашана было захаваць свята. У незалежнай краіне ён прапанаваў працягнуць традыцыю падарункаў людзям: заканчваць сацыяльныя аб’екты, будоўлі, сельскагаспадарчыя работы. Падводзіць вынікі, карацей кажучы.

«Ад гісторыі адмазвацца не трэба. Быў у нас 17-ы год. Ён да нас прыйшоў з іншых тэрыторый (мы жылі ў Расійскай імперыі), адбылася рэвалюцыя. Мы пачалі будаваць разам з расіянамі і іншымі першую нашу сацыялістычную дзяржаву. Мэты былі высакародныя, было шмат чаго добрага. Але ў гісторыі гэта было», — падкрэсліў кіраўнік дзяржавы.

Ён нагадаў, як і ў Беларусі гатовыя былі знасіць помнікі, праводзіць дэкамунізацыю: «Я гэта спыніў, і мы ад гэтага выйгралі».

Марыя ДАДАЛКА

Варвара МАРОЗАВА

Фота БЕЛТА

Загаловак у газеце: «Акно» на Бліжні Усход

Выбар рэдакцыі

Грамадства

«Звязда» дапамагла ліквідаваць стыхійную паркоўку ў Магілёве

«Звязда» дапамагла ліквідаваць стыхійную паркоўку ў Магілёве

Увагу на праблеме завастрыў старшыня вулічнага камітэта гэтай мікразоны Аляксандр Пікуля. 

Грамадства

Прамянёвая тэрапія: новыя магчымасці і рызыкі

Прамянёвая тэрапія: новыя магчымасці і рызыкі

 Прамянёвая тэрапія можа выкарыстоўвацца як у спалучэнні з хірургіяй і хіміятэрапіяй, так і як самастойны метад лячэння.

Калейдаскоп

Вясёлыя гісторыі чытачоў

Вясёлыя гісторыі чытачоў

Старэнькі «Запарожац» (цяпер такіх машын і не відаць ужо) старанна пыліў па дарозе...

Грамадства

Антарктыда чакае беларусак. Але яны пакуль туды не імкнуцца

Антарктыда чакае беларусак. Але яны пакуль туды не імкнуцца

Дванаццатая беларуская антарктычная экспедыцыя адправілася на ледзяны кантынент.