Вы тут

Лётчыкі пасадзілі самалёты на аўтадарогу


Адзін з першых аб’ектаў, які трапляе пад удар высокадакладнай зброі ў сучасным ваенным канфлікце, — гэта аэрадромы. Таму, каб размеркаваць і вывесці з-пад удару авіяцыю, выкарыстоўваюцца ўчасткі аўтадарог. Між іншым, іх і праектуюць у многіх краінах свету для таго, каб іх можна было пераабсталяваць пад палявыя аэрадромы, на якіх можна абслугоўваць самалёты і верталёты. Гэты досвед ёсць у многіх краінах, сярод якіх і еўрапейскія — Германія, Швецыя.


Савецкая авіяцыя асвоіла гэты кірунак яшчэ ў лютым 1945 года — для баявых вылетаў выкарыстоўваліся нямецкія аўтабаны. У Беларускай вайсковай акрузе росквіт пасадак на аўтадарогах прыйшоўся на 60-я і 70-я гады. Але яны былі пастаўлены на паўзу разам са знікненнем СССР. З усёй постсавецкай прасторы яны захаваліся на вучэннях толькі ў ваенна-паветраных сіл Украіны.

Час ішоў, і ў 2007 годзе падрыхтоўка нашага лётнага складу да выкарыстання аўтадарог аднавілася. А ў 2016-м штурмавік Су-25 паспяхова сеў на аўтадарогу ўначы — упершыню на тэрыторыі экс-СССР.

Цяпер гэты складнік неад’емны падчас вучэнняў з удзелам авіяцыі і войскаў проціпаветранай абароны. Ды і экіпажаў, якія ўмеюць гэта рабіць, з кожным годам усё больш. Свае навыкі вайскоўцы 116-й гвардзейскай штурмавой авіяцыйнай базы і 61-й знішчальнай авіяцыйнай базы ВПС і войскаў ППА паказалі сёння падчас аператыўна-тактычнага вучэння.

Самалёты МіГ-29, Су-25, Як-130 і Л-39 паспяхова селі на аэрадромны ўчастак дарогі аўтамабільнай трасы М1 Мінск-Брэст каля вёскі Чамялы. Там яны падрыхтаваліся да паўторнага вылету і нанеслі авіяцыйны ўдар па наземных цэлях на аэрадроме Ружаны. Перад тым, паводле легенды, пазіцыі на шашы атакавала дыверсійна-разведвальная група праціўніка. Задачы па прыкрыцці раёну палётаў і ўчастка дарогі ад сродкаў паветранай атакі праціўніка выконвалі знішчальнікі Су-30СМ і зенітныя ракетныя комплексы Тор-М2.  Верталёты Мі-24 і Мі-8МТВ-5 50-й змяшанай авіяцыйнай базы супрацьстаялі дзеянням незаконных узброеных фармаванняў. Медыцынскі модуль апошняга забраў з поля бою ўмоўнага параненага.

— Сёння быў адпрацаваны шэраг тактычных задач, — зазначыў камандуючы ваенна-паветранымі сіламі і войскамі проціпаветранай абароны генерал-маёр Ігар Голуб, пад кіраўніцтвам якога і праводзіцца аператыўна-тактычнае вучэнне. — Разлікі па ліквідацыі дыверсійна-разведвальных груп праціўніка працавалі як з зямлі, так і з паветра. Задачы выкананы, умоўны праціўнік быў выціснуты. Пасадку на дарогу выканалі самалёты, якія праводзілі расчыстку паветранай прасторы. Зараз да самалётаў падвешваюцца боепрыпасы і іх запраўляюць палівам для выканання далейшых задач. Змяшаная ўдарная група, якая складаецца з чатырох самалётаў, атрымлівае каардынаты стацыянарнай цэлі для яе паражэння. Мы мусім адпрацаваць спецыяльныя тактычныя прыёмы, якія павысяць патэнцыял авіяцыі. Уплыў на аэрадынаміку робіць і густы лес.

Адметнасць сённяшніх вучэнняў — тое, што пасадку на аўтадарогу ўпершыню выканаў курсант 4 курса авіяцыйнага факультэта Ваеннай акадэміі. Гэта быў радавы Арцём Чарніцкі. Зрабіў ён гэта на вучэбна-трэніровачным самалёце Л-39.

— Палёт аказаўся вельмі хвалюючым, — дзеліцца вайсковец. — Яго можна параўнаць толькі з самым першым у жыцці. Поспех любога палёту закладваецца на зямлі, і лётнае майстэрства складаецца з дзвюх частак, як і іншыя дысцыпліны — тэорыі і практыкі. Тэорыі нас вучаць выкладчыкі са шматгадовым практычным стажам. І як бачым, узровень падрыхтоўкі дазваляе выканаць такую складаную задачу, як пасадку на аэрадромны ўчастак дарогі. Калі саджаеш самалёт на аэрадром, ты ведаеш кожны арыенцір, дапамагаюць і тэхнічныя сродкі. На дарозе гэтага няма. Мясцовасць цалкам незнаёмая, вакол толькі лес. Таму трэба быць максімальна сканцэнтраваным, а кожнае дзеянне — гранічна вывераным.

Валяр’ян ШКЛЕННІК

Фота Ганны ЗАНКАВІЧ

Выбар рэдакцыі

Грамадства

«Да штыка ён пяро прыраўняў». Узгадваем ваеннага карэспандэнта Канстанціна Сіманава

«Да штыка ён пяро прыраўняў». Узгадваем ваеннага карэспандэнта Канстанціна Сіманава

28 лістапада 2020 года спаўняецца 105 гадоў з дня нараджэння вядомага рускага пісьменніка, ваеннага карэспандэнта і журналіста Канстанціна Сіманава. 

Грамадства

«Калі б не сям'я Абрамукоў, наш род перастаў бы існаваць яшчэ ў 1941 годзе». Расіянка з Ніжняга Ноўгарада знайшла ў беларускай вёсцы сваякоў

«Калі б не сям'я Абрамукоў, наш род перастаў бы існаваць яшчэ ў 1941 годзе». Расіянка з Ніжняга Ноўгарада знайшла ў беларускай вёсцы сваякоў

І аднавяскоўцаў людзей, якія ў час вайны ратавалі сям'ю яе бабулі, жонкі афіцэра Чырвонай Арміі.

Спорт

«Вікторыя», якая робіць з Гродна баскетбольную сталіцу

«Вікторыя», якая робіць з Гродна баскетбольную сталіцу

Гродна — горад з багатай не толькі культурнай, але і баскетбольнай гісторыяй. 

Грамадства

У Гродне жыхары кватэр адмовіліся падчас капітальнага рамонту здымаць аздабленне з балконаў. На іх падалі ў суд

У Гродне жыхары кватэр адмовіліся падчас капітальнага рамонту здымаць аздабленне з балконаў. На іх падалі ў суд

Такога кшталту справа ў судзе Кастрычнiцкага раёна Гродна разглядаецца ўпершыню.