Прэзідэнт Беларусі Аляксандр Лукашэнка сустрэўся са старшынёй Камітэта нацыянальнай бяспекі Казахстана Карымам Масімавым.
Прэзідэнт адзначыў, што сустрэча са старшынёй КНБ Казахстана да месца, бо зараз збірае інфармацыю да перамоваў з расійскім калегам Уладзімірам Пуціным 9 верасня. З ім плануе абмеркаваць сітуацыю і ў ЕАЭС, і асабліва ў Афганістане, а менавіта: як падзеі там уплываюць на постсавецкую прастору.
«Беларусы ў баку ад гэтага не засталіся і не застануцца. Таму я збіраю гэтую інфармацыю. Вы як чалавек інфармаваны, думаю, мне нешта раскажаце і падкажаце. Для нас гэта вельмі важна. Мы хочам у гэтай сітуацыі вызначыцца. Але я сказаў, што збіраюся прытрымлівацца лініі АДКБ па афганскім фактары», — заявіў Аляксандр Лукашэнка.
Ён адзначыў, што на Казахстан, Расію больш уздзейнічаюць працэсы, што адбываюцца на Бліжнім Усходзе, у Цэнтральнай і Паўднёвай Азіі, у Афганістане.
«Афганістан не адна бяда не абміне, бо гэта гіганцкая краіна. Намаганні і погляды туды звернуты сур’ёзныя. Мы і па Беларусі бачым. Нам у цэнтры Еўропы часам няпроста», — дадаў Прэзідэнт.
Аляксандр Лукашэнка падкрэслівае: яго задавальняе, як складваюцца адносіны спецслужбаў Беларусі і Казахстана.
«Усё, пра што вы дамовіцеся з нашым старшынёй (КДБ. — „Зв.“), мы будзем свята выконваць. Вы гэта павінны ведаць. Мы будзем разам працаваць там, дзе нам выгадна і дзе нам неабходна», — кажа кіраўнік краіны.
Ён акцэнтуе ўвагу, што з Казахстанам з даўніх часоў складваюцца добрыя адносіны. Ды і Карыма Масімава Прэзідэнт ведае, як вопытнага, надзейнага палітыка і супрацоўніка спецслужбаў.
«З усіх бакоў нам жыць разам, супрацоўнічаць і вырашаць агульныя праблемы, якія характэрны і для вас, і для нас. Хацелася б, каб па лініі спецслужбаў, як ва ўсіх краінах бывае, усталяваўся дадатковы канал сувязі, па якім мы будзем абмяркоўваць і прымаць рашэнні па больш чуллівых пытаннях», — падкрэслівае кіраўнік краіны.
Узгадаў Аляксандр Лукашэнка і аб сяброўскіх адносінах з былым Прэзідэнтам Казахстана Нурсултанам Назарбаевым і перадаў яму і дзеючаму лідару краіны прывітанні.
«У вас выдатны Прэзідэнт. Нам крыху сумна без Нурсултана Абішавіча, і я Прэзідэнту Касыму-Жамарту Такаеву пра гэта сказаў. Сумна, бо ён быў душой нашай невялікай кампаніі. Але вам пашчасціла з Прэзідэнтам. У вас неабходна вучыцца сяброўскай рабоце ў імя народа і дзяржавы», — сказаў Прэзідэнт Беларусі.
Аляксандр Лукашэнка адзначыў, што ўжо дамовіўся з Прэзідэнтам Казахстана перагаварыць пра будучае на саміце ў Душанбэ 16-17 верасня.
У сваю чаргу Карым Масімаў расказаў, што перад прыездам у Беларусь быў на прыёме ў Нурсултана Назарбаева і Касыма-Жамарта Такаева, дакладаў пра ўзаемадзеянне са спецслужбамі Беларусі і пра будучую сустрэчу з Аляксандрам Лукашэнкам.
«Яны прасілі вам перадаць прывітанне. Касым-Жамарт Кемелавіч даў даручэнні, якія я хацеў бы з вамі абмеркаваць, напярэдадні вашай сустрэчы ў Душанбэ 16 верасня па лініі АДКБ. Я думаю, нам ёсць што абмеркаваць, паколькі мы сяброўскія краіны. У нас мэты і задачы адзіныя, сумесныя, і мы павінны адзін аднаму дапамагаць», — паведаміў старшыня Камітэта нацыянальнай бяспекі Казахстана.
Марыя ДАДАЛКА
Фота БелТА
Сумесныя праекты ядзерных тэхналогій.
