Прэм’ерай новага дакументальнага фільма пра народнага мастака Беларусі Аляксандра Кішчанку студыя гістарычных фільмаў «Майстэрня Уладзіміра Бокуна» адзначыла сваё шаснаццацігоддзе. На паказ, якая адбыўся ў кінатэатры «Беларусь», сабралася поўная зала прыхільнікаў. Уладзімір Бокун распавёў пра той шлях, які студыя прайшла за шаснаццаць гадоў існавання, пра гісторыю стварэння і адданых прафесіяналаў, якія на студыі працавалі і працуюць. На сённяшні дзень студыя гістарычных фільмаў мае ўражлівы творчы багаж: адных толькі выпускаў праекта «Зваротны адлік» — 319, 15 фільмаў праекта «100 імён Беларусі», сем фільмаў серыі «Хроніка Мінскага гета», 20 — цыкла «Асобы», 11 — праекта «Ад першай асобы», у якім вядомыя дзеячы паказваюцца праз асабістае, праз іх адносіны з сябрамі і блізкімі.
Высокі ўзровень твораў студыйцаў пацверджваюць шматлікія ўзгнгароды. На нядаўнім фестывалі «Лістапад» фільм рэжысёра Уладзіміра Луцкага «Лахва. Цана свабоды» пра паўстанне ў гета маленькага беларускага мястэчка атрымаў спецыяльны прыз журы. І падчас святкавання шаснаццацігоддзя студыі адна з такіх узнагарод знайшла ўладальніка. Фільм «За нашу Перамогу» стаў лаўрэатам сочынскага кінафестываля імя Уладзіміра Мяньшова «Перамаглі разам». Маладая рэжысёрка Кацярына Шарамет не змагла паехаць на ўручэнне ў Сочы, і прыз ёй быў прывезены і ўрачыста перададзены ў Мінску. Сярод цікавостак сустрэчы было яшчэ і знаёмства з анімацыйнай стужкай пра Міколу Гусоўскага, знятай з прыцягненнем самых сучасных тэхналогій маладой рэжысёркай, дачкой Уладзіміра Бокуна.
Фільм «Аляксандр Кішчанка. Касмічная Адысея» з цыкла «Ад першай асобы», які стаў галоўнай падзеяй імпрэзы, змусіць многіх па-новаму зірнуць на постаць мастака, вядомага сваймі мазаікамі на дамах па праспекце Незалежнасці насупраць Нацыянальнай бібліятэкі Беларусі і грандыёзным «Габеленам веку», занесеным у Кнігу рэкордаў Гінеса. У якасці сцэнарыста выступіла вядомы мастацтвазнаўца Надзея Усава. Дзякуючы ёй, у фільме прагучала шмат цікавых фактаў, якія тычацца і асабістага жыцця мастака, і яго не заўсёды спрыяльных стасункаў з калегамі. Напрыклад, не ўсім вядома, колькі перыпетый узнікла падчас стварэння мазаікі на праспекце Незалежнасці — працу прыпынялі, смальту, з цяжкасцю здабытую, расцягвалі. Кансультант фільма, вядомы мастацтвазнаўца Барыс Крэпак распавёў, як зайздроснікі арганізоўвалі нават лісты «неабыякавых грамадзянаў» у ДАІ — сцвярджалася, што ўвага кіроўцаў будзе адцягвацца на новыя мазаікі, у выніку ўзнікнуць аварыі. На шчасце, у ДАІ аднесліся да падобных опусаў з гумарам.
Фільм паказвае «касмічны маштаб» мыслення Аляксандра Кішчанкі, што падкрэсліваецца панарамнымі аэраздымкамі. Раскрываюцца вытокі ягоных незвычайных вобразаў — аказваецца, таямнічыя «парталы», шэрагі квадратаў на габеленах і карцінах натхнёныя беларускім народным арнаментам і саломапляценнем, і нават канкрэтным шэдэўрам — саламянымі царскімі варотамі, што захоўваюцца ў Раўбіцкім музеі беларускага народнага мастацтва.
На прэм’еры прысутнічала ўдава мастака, Ніна Кухарэнка. У фільме яна зачытвае яго апошнія запісы, якія гучаць як сапраўдны філасофскі запавет, заклікаючы да самаўдасканалення і творчасці.
Людміла ІВАНОВА
З мастацтвам па жыцці.
Баявое ўзаемадзеянне найвышэйшага ўзроўню.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».