Давід Серван-Шрэйбер — нейрабіёлаг, клінічны псіхолаг, псіхатэрапеўт, аўтар кнігі «Антырак» казаў: «У мяне часта пытаюцца, ці можна звесці здаровы лад жыцця да некалькіх простых, зручных для запамінання правілаў. Я спрабаваў выкласці ўсё, пра што сам даведаўся ў гэтай галіне за апошнія дваццаць гадоў заняткаў інтэгратыўнай медыцынай (новы напрамак у медыцыне, у якім пры дыягностыцы і лячэнні захворванняў спалучаюцца метады сучаснай заходняй медыцыны і нетрадыцыйных медыцынскіх сістэм (гэта можа быць традыцыйная кітайская медыцына, індыйская аюрведа, тыбецкая медыцына. — Аўт.). Атрымалася 20 парад. Я ведаю, што для мяне асабіста яны працуюць. Спадзяюся, яны прынясуць здароўе і задавальненне і вам!».
Шрэйбер захварэў у 30 гадоў, а таму ў сваёй кнізе выступае і як відавочца, і як урач: «Сёння не існуе альтэрнатыўных метадаў вылечвання раку. Немагчыма нават падумаць аб тым, каб лячыць яго, не звяртаючыся да сучасных дасягненняў заходняй медыцыны. Але пры гэтым неразумна грэбаваць натуральнай здольнасцю арганізма абараняцца ад пухлін, папярэджваючы хваробу або дапамагаючы арганізму падчас тэрапіі». Кніга спадара Шрэйбера — не догма, яна проста дае чытачу навуковыя звесткі, якія дазволяць любому больш свядома ставіцца да свайго здароўя.
1. Гатаваць па-старому
Імкніцеся як мага часцей выбіраць асноўную страву па прынцыпе, які быў да наступлення эры індустрыяльнай жывёлагадоўлі: 80 працэнтаў агародніны і бабовых, не больш за 20 працэнтаў жывёльных бялкоў. Так мяса становіцца дапаўненнем, смакавым кампанентам, а не галоўным складнікам нашай стравы.
2. Змешваць розную агародніну.
Брокалі — эфектыўны сродак прафілактыкі раку і спрыяе вывядзенню з арганізма таксінаў. Дзейнічае яшчэ мацней у спалучэнні з цыбуляй або часнаком ці нават таматным соусам. Завядзіце звычку дадаваць цыбулю, часнок і цыбулю-парэй да сваіх страў.
3. Ужываць (па магчымасці) біяпрадукты.
Але памятайце, што лепей з'есці брокалі або любую іншую агародніну, вырашчаную з дапамогай сучасных хімічных тэхналогій, чым наогул гэта не есці.
4. Дадаваць спецыі.
Куркума — магутны супрацьзапаленчы сродак. Яе, як і чорны перац, можна дадаваць амаль ва ўсе стравы, а таксама ў запраўку да салатаў.
5. Забыцца на бульбу.
Крухмал, які ў ёй змяшчаецца, паднімае ўзровень цукру ў крыві. І ў ёй столькі пестыцыдаў, што фермеры (з тых, каго я ведаю асабіста) імкнуцца не ўжываць уласную прадукцыю — калі толькі яна не вырашчана па біятэхналогіі.
6. Аддаваць перавагу рыбе.
Лепей ужываць рыбу тры разы на тыдзень — селядзец, скумбрыю, сардзіны, у якіх змяшчаецца менш ртуці і поліхлорбіфенолаў, чым у больш буйной рыбе кшталту тунца. У рэстаранах я пазбягаю страў з рыбы-меч і акулы: у ЗША яны ўжо пад забаронай для цяжарных жанчын — так шмат у іх забруджванняў (з-за буйных памераў гэтых рыб).
7. Выбіраць добрыя яйкі.
Аддавайце перавагу яйкам, якія змяшчаюць незаменныя тлустыя кіслоты амега-3 або не ўжывайце жаўткі. З таго часу, як курэй пачалі адкормліваць кукурузай і сояй, іх яйкі змяшчаюць у дваццаць разоў больш тлустых кіслот амега-6, якія спрыяюць развіццю запаленчых працэсаў, чым карысных для здароўя амега-3.
8. Змяніць алей.
Аліўкавы і рапсавы цудоўна падыходзяць для гатавання страў і запраўкі салатаў. А сланечнікавы, соевы і кукурузны лепш выкарыстоўваць радзей: у іх надта шмат амега-6.
9. Выкарыстоўваць моц раслін.
Чабор, мацярдушка, базілік, размарын, мята... Гэтыя духмяныя травы вельмі карысныя для здароўя. Акрамя задавальнення, яны даюць нам разнастайныя антыаксіданты і нават рэчывы з супрацьракавым дзеяннем. Іх варта рэгулярна дадаваць у стравы.
10. Харчавацца «цэльна».
Аддавайце перавагу прадуктам з цэльнага зерня, а таксама сумесі розных злакаў — цэльназерневай і шматзерневай макароне і хлебу. Па магчымасці адмоўцеся ад прадуктаў з белай мукі. Макарону варыце «аль дэнтэ», як заведзена ў італьянцаў (пры гэтым адчуваецца ўнутраная пругкасць), каб пазбегнуць пад'ёму цукру ў крыві.
11. Абмежаваць цукар.
Дэсерт, салодкія газаваныя напоі і сокі з дабаўленнем цукру не павінны станавіцца штодзённай звычкай. Пазбягайце прадуктаў, у якіх цукар указаны сярод інгрэдыентаў на адным з першых трох месцаў. Часцей ешце садавіну, асабліва персікі, слівы, чырвоныя ягады. А калі хочацца нечага смачнага на дэсерт, узгадайце пра чорны шакалад з колькасцю какавы звыш 70 працэнтаў.
12. Тры кубкі зялёнай гарбаты ў дзень.
Іх лепей выпіваць па-за асноўнымі прыёмамі ежы.
13. Не быць катэгарычнымі.
Нам варта памятаць: для нашага здароўя найбольшае значэнне маюць нашы штодзённыя звычкі, а не кулінарныя радасці, якія можна дастаўляць сабе час ад часу.
14. Знаходзіць час прайсціся пешшу.
Або патанцаваць, прабегчыся. Імкніцеся, каб у вас атрымалася хоць бы паўгадзіны хады (або падобнага руху) за дзень. Дастаткова пятнаццаці хвілін, каб дайсці пешшу да працы ці крамы і столькі ж пешшу назад. Сабака часта аказваецца лепшым спадарожнікам для пешай прагулкі, чым чалавек. А калі нейкі занятак прыносіць задавальненне, больш шанцаў, што вы яго не кінеце.
15. Бываць на сонцы (нават калі воблачна).
Хвілін па дваццаць у дзень, каля поўдня. Або парайцеся з урачом наконт таго, які ў вас узровень вітаміну Д у крыві і ці можна вам прымаць гэты вітамін у капсулах або ў кроплях.
16. Пазбягаць бытавых «забруджвальнікаў».
Праветрывайце адзенне пасля хімчысткі на працягу дзвюх гадзін. Для прыборкі аддайце перавагу менш агрэсіўным сродкам (сода, гаспадарчае мыла) або надзявайце пальчаткі. Старайцеся не грэць ваду і іншыя вадкасці ў пластыкавых ёмістасцях (чайніках або іншым посудзе). Адмоўцеся ад пестыцыдаў у доме і, наколькі гэта магчыма, у садзе. Замяніце старыя патэльні з падрапаным тэфлонавым пакрыццём. Фільтруйце ваду, калі ў вашай мясцовасці яна можа быць забруджана пестыцыдамі. Калі размаўляеце па мабільным, трымайце апарат падалей ад галавы.
17. Быць на сувязі як мінімум з двума сябрамі.
І памятаць, што да іх можна звярнуцца па дапамогу ў цяжкую хвіліну, хоць бы па інтэрнэце ці тэлефоне. Калі яны жывуць недалёка, сустракайцеся з імі часцей — як з усімі, каго вы любіце.
18. Асвоіць простыя прыёмы рэлаксацыі.
Напрыклад, з дапамогай дыхання — каб знімаць напружанне, калі ўзнікае пачуццё, што жыццё заганяе ў кут.
19. Абавязкова рабіць тое, што падабаецца.
Няхай гэта будзе нешта адно і хоць бы зусім нядоўга, але абавязкова штодня.
20. Рабіць нешта добрае.
Знайдзіце магчымасць зрабіць нешта сапраўды патрэбнае і карыснае для тых, хто жыве ў вашым пад'ездзе, двары або раёне. І сапраўды рабіце гэта.
Святлана БАРЫСЕНКА
Сумесныя праекты ядзерных тэхналогій.