У суботу на галоўнай воднай артэрыі сталіцы — Свіслачы, прайшла валанцёрская экалагічная акцыя па прыбіранні берагоў ракі ад бытавога смецця. Два дзясяткі неабыякавых людзей прайшліся «генеральнай прыборкай» уздоўж берага ў раёне мінскіх вуліц Сямёнава і Маякоўскага, дзе рака цячэ побач з жылымі дамамі. Менавіта тут на Свіслачы застаўся некрануты куток дзікай прыроды — вільготныя пойменныя лугі, алешнікі і лазнякі.
Валанцёры з грамадскай арганізацыі «Ахова птушак Бацькаўшчыны» з супрацоўнікамі мінскага піўзавода «Аліварыя» з падтрымкай Мінскага гарадскога камітэта прыродных рэсурсаў і аховы навакольнага асяроддзя ўжо некалькі гадоў запар удзельнічаюць у праектах, накіраваных на абарону Свіслачы. Сёлета ў рамках кампаніі «Чыстая плынь» працягвалася праца па навядзенні парадку ў пойме ракі: устаноўлены скрыні для паасобнага збору смецця, лаўкі для адпачынку, адрамантаваны мост праз раку. Маладыя ўдзельнікі акцыі расказваюць: у гэтым кутку Мінска жыве шмат птушак, з іх нават пяць відаў унесены ў Чырвоную кнігу Рэспублікі Беларусь.
Анатоль Кляшчук.
Фота аўтара.
Што за таемнымі дзвярыма?