Плюсы і мінусы эмбарга для нашай краіны
Вайна санкцый паміж Расіяй і Еўрапейскім саюзам на пару з ЗША згуляе на руку Беларусі. Чыноўнікі ўжо разглядаюць пазіцыі на рынку Расіі, якія магчыма запоўніць беларускай прадукцыяй, і прагназуюць шматмільённы прыбытак для краіны.
У сітуацыі, якая зараз склалася, Беларусь выступіць як нейтральны пастаўшчык той самай прадукцыі, ад якой адмовіліся ў РФ. Расія плануе на год адмовіцца ад прадукцыі такіх пастаўшчыкоў, як ЕС, ЗША, Канада, Аўстралія і Нарвегія. У такіх абставінах для Беларусі адкрываецца шырокі рынак для рэалізацыі малака і малочнай і плодаагародніннай прадукцыі, а таксама мясных вырабаў.
Паводле папярэдніх звестак, валютная выручка ад паставак сельгаспрадукцыі і прадуктаў харчавання сёлета павінна наблізіцца да 6 мільярдаў долараў, што перавысіць леташні паказчык на суму да 400 мільёнаў. За студзень—ліпень 2014 года вытворчасць прадукцыі сельскай гаспадаркі ў бягучых цэнах склала 58,1 трлн рублёў і павялічылася ў параўнанні са студзенем—ліпенем 2013-га ў супастаўных цэнах на 7,8%. Вытворчасць прадукцыі раслінаводства ў гаспадарках усіх катэгорый павялічылася на 37,1%. Што тычыцца жывёлагадоўлі, то яна зменшылася на 5,4%. Аб'ём вытворчасці раслінаводства ў студзені—ліпені гэтага года вырас за кошт больш ранніх тэрмінаў уборкі збожжавых і зернебабовых культур і павелічэння іх ураджайнасці ў параўнанні з мінулым годам.
Намеснік прэм'ер-міністра Беларусі Міхаіл Русы назваў магчымае павелічэнне аб'ёмаў паставак прадукцыі ў РФ на другое паўгоддзе 2014-га: на 147-150% будуць павялічаны пастаўкі малочнай прадукцыі, паўфабрыкатаў мясных-каўбасных — са 115% да 140%, бульбы і гародніны — павялічацца на 40% (пастаўкі бульбы могуць павялічыцца ў 2 разы, што ў натуральным выражэнні складзе больш за 1 млн тон). Але з прычыны агульнай тэндэнцыі да зніжэння прадукцыі жывёлагадоўлі і памяншэння пагалоўя жывёлы ці магчыма дасягнуць падобных паказчыкаў і ў дастатковай меры забяспечыць і расійскі, і беларускі рынкі?
Ці будзе па кішэні беларусам беларускае?
На працягу ўсяго часу, пачынаючы з 12 жніўня, калі прадстаўнікі Расіі і Беларусі пачалі абмеркаванне колькасці паставак, расійскі бок неаднаразова рабіў запыты на павелічэнне першапачаткова разлічаных аб'ёмаў. Менавіта за кошт экспарту з Беларусі плануецца ліквідаваць магчымасць з'яўлення дэфіцыту прадуктаў харчавання ў Калінінградскай вобласці. Таксама з РФ паступіў адказ на рээкспарт забароненай да ўвозу прадукцыі з боку Беларусі, але ў той жа час Беларусь зможа пастаўляць у РФ перапрацаваную прадукцыю з еўрапейскай сыравіны. Расійскі бок падчас перамоў звярнуў асаблівую ўвагу на кантроль раслінаводчай прадукцыі. У гэтым выпадку на Беларусі ляжыць сур'ёзная адказнасць па доглядзе прадукцыі на прадмет яе бяспекі і наяўнасці каранцінных аб'ектаў. Можна выказаць здагадку, што перапрацоўка дазволена РФ толькі таму, што сённяшнія пастаўшчыкі не здольны за кошт сваёй сыравіны цалкам забяспечыць рынак Расіі неабходнай прадукцыяй. Але ёсць яшчэ адно пытанне: ці не стануць беларускія тавары даражэй на ўнутраным рынку? Паколькі большая частка прадукцыі пойдзе на экспарт, то ўнутраны рынак будзе недастаткова забяспечаны. Вядома, магчыма будзе купіць садавіну, малако і мясную прадукцыю з ЕС і замяніць гэтай прадукцыяй патэнцыяльны дэфіцыт беларускага рынку. Такія прэцэдэнты ўжо мелі месца — Прэзідэнт даручаў ураду набыць тыя прадукты харчавання, якія назапасіліся на беларускай мяжы з-за расійскіх санкцый. Але тут з'яўляюцца яшчэ два пытанні. Ці будуць прадукты з ЕС мець прымальныя цэны з улікам выдаткаў на лагістыку? І ці будуць гэтыя прадукты такімі ж якаснымі, як беларускія? Бо яшчэ ў красавіку ў Міністэрства аховы здароўя былі пытанні да якасці польскіх яблыкаў, паколькі ў Швецыі яны былі канфіскаваны з гандлёвага абароту: у гатунку Gala выявілі высокатаксічнае рэчыва дыметаат. Пастаўшчыком гэтых яблыкаў выступала польская кампанія, якая таксама прадала амаль 30 тон яблыкаў Беларусі і Расіі. У сённяшняй сітуацыі пастаўшчыкі з ЕС, якія прадавалі сваю прадукцыі ў Расію, будуць спрабаваць збыць яе ў Беларусі. А за мінімізацыяй страт прыбытку можа стаяць жаданне збыць і няякасную прадукцыю.
Вось і незразумела, чаго чакаць ад цэн на малако і мяса да канца года. І наогул, ці ўбачым мы менавіта беларускае малако і мяса на нашых прылаўках?
Топ «чорнага спіса»
А якая з краін больш за ўсё пацерпіць ад немагчымасці экспартаваць прадукцыю ў Расію на працягу года? Паводле звестак мытнай службы РФ аб імпарце за 2013 год, у топ 5 трапляюць Нарвегія, якая пацерпіць найбольшы ўрон (больш за $1,15 млрд), Польшча (больш за $1,14 млрд), ЗША (больш за $0,84 млрд), Германія (больш за $0,81 млрд), Нідэрланды (больш за $0,7 млрд). Менш за ўсё пацерпіць Вялікабрытанія (больш за $66 млн), таму што ў Расію пастаўляецца вельмі малая доля ад агульнай колькасці экспарту сельскагаспадарчай прадукцыі Злучанага Каралеўства. Яна складае менш за 1 працэнт.
Найбольшыя страты на расійскім рынку мяса свіней панясе Данія (каля $318 млн). У сектары рыбы і морапрадуктаў больш за ўсё страціць Нарвегія (каля $1,14 млрд). Па экспарце малочнай прадукцыі найбольшую шкоду пацерпіць Фінляндыя (каля $317 млн). Што тычыцца садавіны, то тут лідзіруе Польшча, верагодныя страты якой складуць $497 млн. Яна ж страціць $250 млн на пазіцыях плодаагародніннай прадукцыі.
Асноўныя экспарцёры (а гэта 20 краін, уключаючы ЕС, ЗША і Канаду) на няздольнасці прадаць сваю прадукцыю ў Расію страцяць каля $9,16 млрд.
Варта таксама адзначыць, што прадукцыю менавіта гэтых краін Беларусь можа скупіць, каб запоўніць паліцы нашых магазінаў. Унутры ЕС будзе паніжэнне цэн на ўсе тыя пазіцыі, якія не змаглі экспартаваць у РФ. Калі расійскі бок не здыме забарону на ўвоз гэтай прадукцыі, то Беларусь зойме досыць выгаднае становішча: «сваё прададзім даражэй, у суседзяў купім танней».
Ці варта чакаць павелічэння знешнегандлёвага сальда?
Адказ з'явіцца тады, калі наша краіна будзе з дакладнасцю ўпэўнена, што зможа паставіць ўвесь запланаваны аб'ём экспарту ў Расію. Федэральная антыманапольная служба Расійскай Федэрацыі дапускае змену санкцыйнага спіса прадукцыі па выніках маніторынгу. Падчас абмеркаванняў у Расіі плануецца разгледзець усе меры, накіраваныя на насычэнне ўнутранага рынку, у тым ліку ў частцы ўнясення змяненняў у спіс тавараў, у дачыненні да якіх уведзена забарона. Таксама ў РФ дапускаецца зніжэнне мытных ставак на шэраг харчовых тавараў, у дачыненні да якіх уведзена забарона і якія неабходныя для таго, каб насыціць унутраны рынак.
У любым выпадку, нават нягледзячы на магчымае змяненне Расіяй пераліку тавараў, забароненых да ўвозу, гэта не вельмі паўплывае на аб'ёмы беларускіх паставак. Але ўсё падлічыць можна толькі тады, калі ў Беларусі збяруць увесь ураджай, вызначаць шляхі, аб'ёмы паставак і цэны на сыравіну, якая будзе перапрацоўвацца і экспартавацца ў РФ у выглядзе гатовай прадукцыі, а таксама дакладна вызначаць шляхі напаўнення ўнутранага рынку. Таксама неабходна ўлічваць фактар канкурэнцыі. Бо ўжо цяпер Беларусь занепакоена магчымым экспартам тавараў з Еўрапейскага саюза праз Украіну ў Беларусь, Казахстан і Расію ў сувязі з падпісаннем Украінай дагавора аб асацыяцыі з ЕС. Ад гэтага можа пацярпець у першую чаргу наша эканоміка.
Ілья КРЫЖЭВІЧ
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
Што за таемнымі дзвярыма?