Ідуць гады, змяняюцца падзеі. Многія з іх страчваюць свой колер, але памяць пра крывавыя старонкі гісторыі нашай краіны жыве і цяпер. На жаль, вельмі мала засталося ўдзельнікаў і сведак падзей Вялікай Айчыннай вайны. У кожнага з іх — свае ўспаміны пра вайну, свая горкая памяць...
Жыве ў вёсцы Лапеніца, што на Гродзеншчыне, выдатная жанчына. Не так даўно я даведаўся, што Галіна Васільеўна Грышкевіч у вайну была яшчэ дзіцем. У той час яна, сямігадовая дзяўчынка, з бацькамі жыла на Мядзельшчыне, у мястэчку Крывічы. Калі пачалася вайна, бацька пайшоў на фронт. А маці, Надзея Васільеўна, падалася з дзецьмі на ўсход да радні, пад Віцебск.
Шмат чаго давялося перажыць у тыя страшныя гады... Ужо па дарозе яны ледзь не загінулі, бо каля горада Лепеля трапілі пад налёт нямецкай авіяцыі. А калі, нарэшце, дабраліся да нашых, то і там доўга не затрымаліся. Нехта данёс паліцаям, што бацька — камуніст, да таго ж ваюе на фронце. За гэта сям'ю ледзь не расстралялі.
Падзеі ваеннага ліхалецця болем адгукаюцца ў сэрцы гэтай немаладой жанчыны. «Маці разумела, што жыцця нам тут не будзе, — узгадвае Галіна Васільеўна. — І мы падаліся ў Расонскі раён, да матчынай сястры. Спакойнага жыцця і тут не прадбачылася, бо маці стала падтрымліваць сувязь з партызанамі».
Для іх было толькі адзінае выйсце — ісці ў лес, да народных мсціўцаў. Жанчына памятае, як доўга прабіраліся праз гушчар, пералазілі па жэрдках праз асушальныя канавы. Так трапілі ў атрад імя Ракасоўскага. Жылі ў зямлянцы. Прыйшлося перажыць усё: і голад, і холад, і страх за жыццё. Матуля хадзіла ў штаб варыць ежу, мыць бялізну, даглядаць параненых. Вельмі цяжка было зімой: у сырой зямлянцы хварэлі, дапамагчы не было каму. Лячыцца прыходзілася самім. Да таго ж і есці не было чаго. Летам збіралі ягады, а потым хадзілі да латышоў і абменьвалі на гарох, муку. Пра соль нават і не ўспаміналі. Крыху пазней сталі прылятаць самалёты з тылу. Яны скідвалі ў мяшках соль, якую потым па драбочку збіралі дзеці ў лесе.
Верш «Лясы Расоншчыны» Галіна Васільеўна напісала яшчэ ў раннім юнацтве пад уздзеяннем перажытага:
Лясы Расоншчыны густыя,
Наш беларускі родны край.
Вас не забудзем мы, жывыя, —
Нас збераглі ад дзікіх зграй.
Вы сагравалі ў моцны холад,
Травой лячылі ад хвароб,
Вадой паілі, хоць з балот,
І елкі слалі на сугроб.
Былі ратункам і аховай
Для многіх ад варожых куль.
І з лесу йшлі ў бой партызаны,
Грамілі ворагаў адтуль.
«А потым нас, дзяцей, самалётам адправілі ў савецкі тыл, — успамінае Галіна Васільеўна. — Мы з сястрой трапілі ў дзіцячы дом у Калінінскай вобласці. Там і жылі да самага вызвалення Беларусі».
Так закончыліся для яе з сястрой тры страшэнныя гады фашысцкай акупацыі — гады пакут і нястачы. Галіна Васільеўна заўсёды ганарылася сваім бацькам, які прайшоў баявы шлях ад радавога да капітана і закончыў вайну ў Вене. За час баёў Васіль Яфімавіч быў двойчы паранены, бо на пасадзе палітрука першым падымаўся ў атаку — і байцы ішлі следам. «Асабліва нам у дзяцінстве падабалася з сястрой разглядаць яго ўзнагароды: два ордэны Вялікай Айчыннай вайны, медалі «За адвагу», «За ўзяцце Будапешта», «За вызваленне Вены», «За перамогу над Германіяй», — працягвае жанчына.
Сваё жыццё яна звязала з прафесіяй настаўніка. Шмат гадоў Галіна Васільеўна выкладала рускую мову і літаратуру ў мясцовай школе. І цяпер яна заўсёды жаданы госць на святочных мерапрыемствах. Нягледзячы на паважны ўзрост, не губляе жыццялюбства і аптымізму, радуецца поспехам сваіх вучняў. Жанчына захоўвае ў сэрцы памяць аб мінулым. Ёй заўсёды ёсць аб чым расказаць нам, маладому пакаленню, бо пакуль жыве памяць — жыццё працягваецца.
Яўген АСМАЛАВЕЦ
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
Што за таемнымі дзвярыма?