«Па гэтай дарозе мой бацька і я пайшлі на вайну», — першае, што сказаў у мікрафон Канстанцін Анісімавіч Патапчык. У дынаміках толькі што гучалі песні ваенных гадоў, таму ўзвышаны голас ветэрана здаўся іх хвалюючым працягам.
[caption id="attachment_80347" align="alignnone" width="600"] Помнік жыхарам вёсак Жураўкавічы
і Падгор'е, якія загінулі падчас
Вялікай Айчыннай вайны.[/caption]
Так і гэты дзень для жыхароў вёскі Жураўкавічы стаў працягам у чарадзе дзясяткаў тысяч дзён, якія аддзялілі іх ад ваеннага ліхалецця. У той жа далечыні назаўжды засталіся і многія іх аднавяскоўцы.
«Гэтая дарога мне бачылася ў снах на фронце. Я стаў кулямётчыкам. Пад Аўгустовам у Польшчы атрымаў цяжкае раненне...» — працягваў Канстанцін Анісімавіч. Ён расказваў, як на той жа чужой зямлі ў баях з агульным ворагам загінуў бацька. Яго магілу адшукаць не ўдалося.
«Я пакляўся сабе ўвекавечыць памяць бацькі і іншых палеглых землякоў у мемарыяльным знаку, каб перадаць святую памяць пра іх наступным пакаленням. Цяжка было здзяйсняць задуманае. Доўга шукаў на палях падыходзячы магутны валун. Шукаў магчымасць яго перавозкі ў вёску, устаноўку на пляцоўку, якую таксама трэба было падрыхтаваць па належнай тэхналогіі. Не ведаю, колькі б рабіў усё гэта адзін, калі бы да справы не далучыўся цудоўны чалавек — пісьменнік і краязнавец Іван Паўлавіч Ярашэвіч. Разам мы ўсюды знаходзілі паразуменне, атрымлівалі дапамогу», — так гаварыў у мікрафон ветэран. Перад ім стаялі аднавяскоўцы, сябры па працоўных гадах з Мінскага аўтазавода, прадстаўнікі мясцовай улады. А за спінаю ветэрана высіўся новы помнік. Магутны камень, нібы сцяг, нёс на сабе імёны трыццаці двух вяскоўцаў. Праз хвіліну Канстанцін Анісімавіч разам са сваімі праўнучкамі зняў з помніка покрыва і ўсклаў да падножжа першыя кветкі.
[caption id="attachment_80345" align="alignnone" width="600"] Для ўдзелу ў адкрыцці помніка прыехала намеснік старшыні Пастаяннай камісіі па правах чалавека, нацыянальных адносінах і сродках масавай інфармацыі палаты прадстаўнікоў Нацыянальнага сходу Аксана Уладзіміраўна Няхайчык, якая перадала Канстанціну Анісімавічу Патапчыку ганаровы знак «За развіццё ветэранскага руху» (злева на фота — Іван Паўлавіч Ярашэвіч).[/caption]
Адкрыццё такога помніка на вясковай вуліцы — прыкметны радок на старонках нашай агульнай Памяці. Для таго, каб усё гэта адбылося, спатрэбілася Асоба — шчыры, неабыякавы чалавек, які на сваім лёсе зведаў жахі вайны, ветэран Канстанцін Анісімавіч Патапчык. Разам са сваім аднадумцам Іванам Паўлавічам Ярашэвічам яны доўга пералічвалі па памяці прозвішчы людзей, назвы арганізацый і прадпрыемстваў, дзе за апошнія гады атрымлівалі падтрымку ў задуманай справе. Дапамога была вялікай і малой, але ўрэшце — неабходнай, каб імёны абаронцаў-аднавяскоўцаў з'явіліся на мемарыяльнай дошцы.
[caption id="attachment_80344" align="alignnone" width="600"] Па гэтай дарозе вяскоўцы ішлі на фронт.[/caption]
Яўген Пясецкі, фота аўтара.
Смілавіцкі сельсавет
Чэрвеньскага раёна.
З мастацтвам па жыцці.
Баявое ўзаемадзеянне найвышэйшага ўзроўню.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».