Памочнік Прэзідэнта Рэспублікі Беларусь па эканамічных пытаннях Кірыл РУДЫ. Першы намеснік міністра эканомікі нашай краіны Аляксандр ЗАБАРОЎСКІ. Начальнік упраўлення інфармацыі Міністэрства замежных спраў, прэс-сакратар Дзмітрый МІРОНЧЫК. Дырэктар навуковай установы «Аб'яднаны інстытут энергетычных і ядзерных даследаванняў «Сосны», кандыдат фізіка-матэматычных навук Андрэй КУЗЬМІН. Кіраўнік кампаніі «ЯндексБел» Аляксей СІКОРСКІ. Шматразовы чэмпіён сусветных спаборніцтваў па праграмаванні (і сярод школьнікаў, і сярод студэнтаў, і сярод найбуйнейшых ІТ-карпарацый) Генадзь КАРАТКЕВІЧ. Як вы думаеце, што агульнага паміж гэтымі людзьмі?
На ўрачыстым сходзе, прысвечаным 20-годдзю стварэння спецыяльнага фонду Прэзідэнта Рэспублікі Беларусь па сацыяльнай падтрымцы адораных навучэнцаў і студэнтаў, стала вядома, што ўсе яны ў розныя гады станавіліся стыпендыятамі і лаўрэатамі фонду. А ўсяго за 20 гадоў дзейнасці фонду яго ўзнагародамі былі адзначаны больш за 30 тысяч навучэнцаў і студэнтаў. І калі б са сцэны паспрабавалі расказаць пра дасягненні кожнага з іх, то не хапіла б і цэлага месяца...
Ідэя стварэння фондаў па падтрымцы адоранай і таленавітай моладзі нарадзілася ў няпросты для нашай краіны час. У сярэдзіне 1990-х заняткі навуковымі даследаваннямі і творчасцю станавіліся ўсё менш прэстыжнымі. А найлепшыя выпускнікі ВНУ імкнуліся з'ехаць працаваць за мяжу. Сёння стыпендыяты і лаўрэаты фонду, якія дасягнулі высокіх вяршынь у сваёй кар'еры, канстатуюць, што прызнанне іх заслуг у самым пачатку жыццёвага і прафесійнага шляху стала істотнай падтрымкай, моцным стымулам і нават штуршком для ўпэўненага руху наперад.
— Для мяне, напрыклад, стыпендыя фонду адкрыла калісьці магчымасць для наведвання гістарычных архіваў у Расіі і іншых краінах, — расказвае першы прарэктар Магілёўскага дзяржаўнага ўніверсітэта імя А. Куляшова, доктар гістарычных навук, дацэнт Дзмітрый ЛАЎРЫНОВІЧ.
Кірыл Руды правёў паралель паміж стыпендыятамі прэзідэнцкага фонду па падтрымцы адоранай моладзі і героямі казкі Андэрсена пра свечку: «Толькі калі свечку запалілі, усе ўбачылі, якая яна прыгожая. Таксама і з маладымі людзьмі: трэба запаліць у іх агонь, каб ён свяціў і іншым...»
Званне стыпендыята і лаўрэата прэзідэнцкага фонду — гэта не проста ўзнагарода, а знак таго, што дзяржава бярэ на сябе адказнасць за далейшае прафесійнае станаўленне маладога таленту — школьніка або студэнта. Лёс кожнага лаўрэата ўважліва адсочваецца і пасля яго ўступлення ў дарослае жыццё. Гэта робіцца для таго, каб стварыць максімальна спрыяльныя ўмовы для самарэалізацыі асобы з найбольшай карысцю для краіны. Маладым людзям аказваецца падтрымка ў выбары працоўнага месца, у вырашэнні жыллёвых і іншых матэрыяльных праблем, а таксама ў пытаннях, звязаных з іх станаўленнем у жыцці.
Старшыня савета спецыяльнага фонду Прэзідэнта, рэктар Белдзяржуніверсітэта акадэмік Сяргей АБЛАМЕЙКА адзначыў, што школьнікі і студэнты заахвочваюцца за дасягненні па самых розных напрамках: ад інфармацыйных тэхналогій да матэматыкі або медыцыны. Не менш важныя і гуманітарныя навукі. Сяргей Абламейка паведаміў, што калі па першым часе дзейнасці фонду заахвочваліся цягам года некалькі сотняў чалавек, то ў апошнія гады іх колькасць штогод перавышае 2300 чалавек.
Сумесныя праекты ядзерных тэхналогій.
