У Мінскім сувораўскім ваенным вучылішчы з'явіўся ўнікальны шматфункцыянальны спартыўны комплекс.
Шыкоўны падарунак у канцы навучальнага года атрымалі выхаванцы Мінскага сувораўскага ваеннага вучылішча. Сумеснымі намаганнямі Міністэрства абароны, Банка развіцця Беларусі і выпускнікоў вучылішча на тэрыторыі навучальнай установы адкрыўся шматфункцыянальны спартыўны комплекс.
На ім сваё майстэрства змогуць удасканальваць як звычайныя сувораўцы, так і выхаванцы спецыялізаваных па спорце класаў. Комплекс уключае ў сябе два полі — для гульні ў футбол і гандбол, паласу перашкод, пляцоўку для заняткаў па страявой падрыхтоўцы і нават трэнажорную залу пад адкрытым небам.
— Шматфункцыянальны спартыўны комплекс несумненна дазволіць падняць на новы якасны ўзровень спартыўную падрыхтоўку сувораўцаў, — лічыць міністр абароны генерал-лейтэнант Андрэй РАЎКОЎ. — Мінскае сувораўскае ваеннае вучылішча заўсёды было адным з лідараў у сістэме агульнай сярэдняй адукацыі краіны, адпраўной кропкай у жыцці і пачатковым звяном ваеннай кар'еры для тысяч і тысяч маладых людзей. У вучылішчы створаны ўсе ўмовы для падрыхтоўкі будучых абаронцаў Айчыны.
Як перакананы старшыня праўлення Банка развіцця Беларусі, старшыня Беларускай федэрацыі футбола Сяргей РУМАС, тут, у вучобе, спартыўных трэніроўках, ваенных вучэннях, загартоўваецца характар юнакоў, фарміруюцца высокія маральныя і духоўныя якасці. «Мы, выпускнікі ваеннага вучылішча, у свой час вельмі зайздросцілі кадэтам, якія вучыліся разам з намі, бо, акрамя ваеннай выпраўкі, гэтыя юнакі выдатна маглі падшываць падкаўнерыкі, што не ўдавалася нам, а фізічная падрыхтоўка, асабліва ў выпускнікоў Мінскага сувораўскага ваеннага вучылішча, была на вышыні, — адзначыў асноўны спонсар праекта. — З першых дзён існавання ваша ўнікальная навучальная ўстанова славілася цудоўнымі выкладчыкамі, а таксама выдатнай якасцю адукацыі. Традыцыйным важным адрозненнем ва ўсе часы было спалучэнне грунтоўнай тэарэтычнай і належнай фізічнай падрыхтоўкі. Веды і навыкі, якія юнакі атрымліваюць у сценах вучылішча, выключна важныя для нашай Радзімы. Ваенны афіцэр — гонар краіны. А як вядома, здаровы дух павінен быць у здаровым целе. І хто яго ведае, можа быць, на гэтым полі вырастуць будучыя гульцы нацыянальнай зборнай па футболе. І не адзін, а цэлая каманда».
Тое, што дзеля гэтага ёсць усе падставы, тут жа сувораўцы і прадэманстравалі. Пасля ўрачыстага адкрыцця спартыўнага комплексу адбыўся таварыскі матч па футболе паміж прадстаўнікамі Банка развіцця і зборнай камандай сувораўскага вучылішча. Сувораўцы не падвялі: сваёй перамогай яны яшчэ раз даказалі, што недарэмна атрымалі такі падарунак.
Традыцыйна развіццю спорту ў Мінскім сувораўскім ваенным вучылішчы надаюць вялікую ўвагу. За апошнія гады вучылішча закранула істотная мадэрнізацыя і рэканструкцыя важных навучальных, спартыўных і камунальных аб'ектаў. У вучэбных класах, спартыўнай зале, на стадыёне, пляцы, а таксама на іншых аб'ектах установы праведзены капітальны рамонт. Сёння тут створаны ўсе ўмовы для ўсебаковага і гарманічнага развіцця сувораўцаў.
— З адкрыццём шматфункцыянальнага спартыўнага комплексу мы, па сутнасці, поўнасцю завяршылі рэканструкцыю вучылішча адносна матэрыяльнай базы, — адзначыў начальнік Мінскага сувораўскага ваеннага вучылішча генерал-маёр Віктар ЛІСОЎСКІ. — Што да рэканструкцыі вучэбнай базы, яна створана і паспяхова эксплуатуецца.
Сёлета сувораўскае вучылішча адзначае сапраўды вялікае свята — 60-ы выпуск выхаванцаў. За слаўную гісторыю існавання навучальнай установы ў яе сценах атрымалі пуцёўку ў жыццё больш як 12 тысяч юнакоў, многія з якіх сталі вядомымі военачальнікамі і выдатнымі афіцэрамі. Больш чым 60 выпускнікоў атрымалі генеральскія пагоны, больш за сотню носяць ганаровыя званні кандыдатаў навук, дацэнтаў і прафесараў. Хто яго ведае, можа, менавіта з гэтых сцен неўзабаве выйдуць і будучыя майстры спорту ці нават алімпійскія чэмпіёны?
Фота Надзеі БУЖАН
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
