Якой будзе сфера ІT праз пяць гадоў? На што трэба звяртаць увагу абітурыентам? Адказы на гэтыя і многія іншыя пытанні гучалі падчас сустрэчы «Шчыра запрашаем у свет інфармацыйных тэхналогій», арганізаванай адміністрацыяй Парка высокіх тэхналогій. Пракансультавацца да спецыялістаў у бізнес-інкубатар установы прыйшлі амаль паўтысячы абітурыентаў, у тым ліку з рэгіёнаў.
— Мы вельмі б хацелі, каб беларусы былі не пасіўнымі назіральнікамі, а самі станавіліся стваральнікамі прарыўных тэхналогій. Акрамя гэтага, мы ўпэўнены, што менавіта ІT-адгалінаванне можа стаць ключавым для нашай эканомікі і зрабіць багатымі не толькі асабіста вас, але і нашу краіну. — сказаў падчас сустрэчы кіраўнік парка Валерый ЦАПКАЛА.
Адміністрацыя парка сёлета падрыхтавала каталог-даведнік для тых, хто паступае на ІT-спецыяльнасці. У ім сабрана поўная інфармацыя пра ўсе факультэты краіны, якія рыхтуюць спецыялістаў для гэтай сферы: пералік спецыяльнасцяў, прахадныя балы і многае іншае. Спампаваць дакумент у электронным выглядзе можна на сайце ПВТ.
Кіраўнікі кампаній парка — дырэктар ТАА «Артокс Лаб» Аляксандр ЛІНД і дырэктар ВУП «Белка Геймз» Марына КОРСУН — расказалі пра асноўныя трэнды ў ІT-адгалінаванні і пра тое, якія спецыяльнасці будуць запатрабаваныя ў сферы праз пяць гадоў. «Насамрэч вельмі цяжка адказаць, што будзе з інфармацыйнымі тэхналогіямі праз такі тэрмін, — лічыць Аляксандр Лінд. — Таму галоўнае, што зробіць вас запатрабаванымі, — здольнасць да пастаяннай і бесперапыннай вучобы. Як толькі вы падумаеце, што ўсё ведаеце, вы скончыцеся як спецыяліст. Змены накрыюць з такой хуткасцю, што вы ўжо не паспееце за імі. Галоўнае, на што трэба абапірацца — уласныя адчуванні. Шукайце тое, што вам падабаецца рабіць. Бо заўсёды будзе попыт і на тых, хто ўмее ствараць нешта новае, і на тых, хто ўмее кіраваць ужо створаным, і на тых, хто ўмее вучыць новаму іншых». «Акрамя здольнасці вучыцца, я б адзначыла яшчэ гатоўнасць працаваць больш за восем гадзін у суткі, — дапоўніла калегу Марына Корсун. — Бо тыя аб'ёмы працы, якія сёння прыходзіцца выконваць нашым супрацоўнікам, звычайна не ўкладваюцца ў стандартны графік».
— Штогод у парку ствараецца тры тысячы новых працоўных месцаў, прыкладна траціну з іх займаюць выпускнікі беларускіх універсітэтаў, — распавёў намеснік дырэктара адміністрацыі ПВТ Аляксандр
МАРЦІНКЕВІЧ. — Пры гэтым, па нашых падліках, усяго ў краіне па ІT-спецыяльнасцях кожны год выпускаецца каля шасці тысяч чалавек. Таму можна дакладна сказаць, што мы забіраем да сябе найлепшых. Гэта тыя, хто ўжо ўсё ўмее і абсалютна гатовы да працы ў вялікіх кампаніях. «Давучваць» кагосьці на месцы ніхто не збіраецца. Увесь адукацыйны працэс перанесены ў сцены нашых ВНУ, і яны нядрэнна спраўляюцца са сваёй задачай. Гэтаму спрыяюць і шматлікія сумесныя лабараторыі і філіялы, якія ствараюць кампаніі-рэзідэнты на базе ўніверсітэцкіх кафедр. Таму, калі студэнт адказна вучыўся, не прагульваў заняткі і цалкам засвоіў праграму, праблем з уладкаваннем на добрае месца ў яго не павінна ўзнікнуць. Іншае пытанне, якіх ведаў вымагае ад выпускнікоў час. Большасць кіраўнікоў кампаній кажа супрацоўнікам, што вывучэнне камп'ютарных моў — гэта справа нажыўная, асвоіць новае можна вельмі хутка. А вось асновы праграмавання і алгарытмізацыі, фізіка (бо вельмі актыўна развіваюцца прыкладныя і навукаёмістыя кірункі ІT), матэматыка — гэта фундаментальныя рэчы. А менавіта на іх студэнты звычайна звяртаюць менш увагі, маўляў, дысцыпліны не зусім «профільныя».
Выказаўся намеснік дырэктара ПВТ і па набалелай для многіх абітурыентаў праблеме здачы фізікі для паступлення на ІT-спецыяльнасці. Паводле яго слоў, пытанне аб магчымай замене ЦТ па фізіцы на англійскую мову было канчаткова закрыта на адным з нядаўніх «круглых сталоў» з удзелам усіх дэканаў адпаведных факультэтаў. Яны аднагалосна выказаліся супраць такіх змен, зыходзячы са сваёй практыкі: студэнты, якія здавалі замест фізікі англійскую мову, заўважна горш засвойвалі асновы алгарытмізацыі.
Даведка «ЧЗ»
Топ-10 самых запатрабаваных у ПВТ спецыяльнасцяў у 2015 годзе:
* аўтаматызаваныя сістэмы апрацоўкі інфармацыі;
* вылічальныя машыны, сістэмы і сеткі;
* інжынерна-псіхалагічнае забеспячэнне інфармацыйных тэхналогій;
* інфарматыка;
* інфарматыка і тэхналогіі праграмавання;
* інфармацыйныя сістэмы і тэхналогіі;
* інфармацыйныя тэхналогіі і кіраванне ў тэхнічных сістэмах;
* штучны інтэлект;
* камп'ютарная бяспека;
* матэматыка.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
Што за таемнымі дзвярыма?