Пытанні бязвізавых паездак, гандлёва-эканамічнага і парламенцкага супрацоўніцтва абмеркавалі падчас сустрэчы старшыня Савета Рэспублікі Нацыянальнага сходу Беларусі Міхаіл Мясніковіч і Надзвычайны і Паўнамоцны пасол Рэспублікі Карэя ў Беларусі Кім Ёнг Хо.
Міхаіл Мясніковіч прапанаваў аднавіць кансультацыі па працы над праектам пагаднення паміж дзвюма краінамі аб кароткатэрміновых грамадзянскіх бязвізавых паездках. У снежні 2013 года прадстаўнікі Беларусі ўжо накіроўвалі карэйскаму боку адпаведную прапанову. Старшыня Савета Рэспублікі падкрэсліў, што ўзровень эканамічнага развіцця Беларусі і Карэі дазваляе казаць аб мэтазгоднасці заключэння такога дагавора.
Што тычыцца гандлёва-эканамічнага супрацоўніцтва, то Міхаіл Мясніковіч унёс прапанову аб пабудове сумеснай фабрыкі па вытворчасці тэлевізараў і панэляў з адной з карэйскіх кампаній. Таксама ён прапанаваў актывізаваць і навукова-тэхнічнае ўзаемадзеянне, улічваючы, што станоўчыя прыклады такой кааперацыі ўжо ёсць. Міхаіл Мясніковіч выказаў задаволенасць праектам сумеснага беларуска-карэйскага цэнтра доступу да інфармацыі, створанага больш за год таму.
Акрамя таго, старшыня Савета Рэспублікі адзначыў, што наша краіна зацікаўлена і ў пашырэнні парламенцкага супрацоўніцтва. Паводле яго слоў, у гэтым кірунку «патэнцыял магчымасцяў зараз з'яўляецца недаацэненым».
«Можна было актывізаваць кантакты на ўзроўні кіраўніцтва парламентаў. Мы аднаўляем наша запрашэнне кіраўніцтву парламента Рэспублікі Карэя наведаць Беларусь», — адзначыў Міхаіл Мясніковіч.
Ілья КРЫЖЭВІЧ
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
Што за таемнымі дзвярыма?