Вы тут

Прычыны сямейных канфліктаў


У сямейных канфліктаў ёсць і рэальныя прычыны, здольныя прыводзіць да краху.

Канфлікт нельга разглядаць як адхіленне ад нармальных паводзін — гэта від стасункаў, эмацыянальная спроба выявіць нейкія супярэчнасці. Так што і для сем'яў канфлікты — справа звычайная, ва ўсіх бываюць. Праблема зусім не ў тым, ці ёсць яны ўвогуле, а ў тым, што вы робіце для іх вырашэння і папярэджвання.


Нейкіх фармальных падстаў для пачатку сваркі можа быць шмат — абед нясмачны, дзіця дрэнную адзнаку ў школе атрымала, кажам не тое, робім не гэта... А вось рэальных прычын канфлікту існуе вельмі мала, і яны даўно вывучаны. Разглядзім усё ж такі галоўныя. Пры гэтым адкрытую палігамнасць аднаго з партнёраў, зазіранні ў бутэльку, ужыванне наркотыкаў і схільнасць да азартных гульняў разглядаць не будзем, бо вырашыць такія праблемы без спецыялістаў амаль немагчыма.

1. Паспешлівасць. Самыя частыя спрэчкі ўзнікаюць у пар, якія пажаніліся неабдумана, з прычыны першай закаханасці, цяжарнасці, страху страціць любага. Калі страсці сціхаюць, дзіця падрастае і ўжо ніхто нікуды не сыходзіць, высвятляецца, што паміж гэтымі двума вельмі мала агульнага, яны наогул адзін аднаго абсалютна не ведаюць. Так і пачынаюцца сваркі «на роўным месцы».

2. Фінансавыя праблемы. Калі ў сям'і штодня не хапае грошай, няма нармальнага жылля або магчымасці набыць штосьці вельмі неабходнае, гэта абумовіць дэпрэсію ў кожнага члена сям'і. Пастаянная незадаволенасць узроўнем жыцця рана ці позна выліваецца ва ўзаемныя абвінавачанні і спрэчкі. Вельмі добра, калі фінансавыя праблемы можна павярнуць так, каб згуртаваць сям'ю вакол іх вырашэння, але часцей бывае наадварот.

3. Стасункі з бацькамі. Мама і тата — самыя дарагія для кожнага з нас людзі, і калі яны ўмешваюцца ў справы жанатых дзяцей, то канфлікт паміж апошнімі непазбежны.

Частыя пераезды, камандзіроўкі і вельмі напружаны графік работы — усё, што перашкаджае праводзіць час разам — таксама не спрыяе згуртаванню сям'і.

Самыя канфліктныя перыяды, калі неабходна асабліва ўважліва ставіцца да сябе і другой паловы — гэта першы год сумеснага жыцця і нараджэнне першынца. Менш небяспечныя канфлікты ўзнікаюць пры іншых вялікіх зменах — нараджэнні новага дзіцяці, змене месца працы, падрастанні дзяцей (асабліва пераходны перыяд), выхадзе партнёраў на пенсію...

— Адны канфлікты разбураюць сем'і, іншыя ўмацоўваюць. Існуе ўсяго тры спосабы выхаду з канфлікту — пазбяганне, кампраміс і супрацоўніцтва, — тлумачыць псіхолаг Мінскага гарадскога клінічнага псіхіятрычнага дыспансера Ірына ГАРБАНАВА. — Самае важнае, не дапускаць напружання, якое вымотвае, прыводзіць да выбуху эмоцый, адчужэння і развалу сям'і. Калі штосьці ідзе не так, як хацелася б, трэба размаўляць, і гэта павінна быць шчырая размова. Нават калі вы перакананыя ў сваёй праваце, трэба выслухаць усіх зацікаўленых. Не пераконваць усіх у сваёй праўдзе, а разам шукаць выйсце. Неабходна прыняць агульнае рашэнне, і правілаў выхаду з канфлікту далей павінны трымацца ўсе...

І яшчэ...

  • Не ідэалізуйце партнёра. Прымайце ў людзях і іх недахопы. Мы ўсе розныя, і без талерантнасці не абысціся.
  • Нельга пачынаць сварку, калі вы проста нязгодныя ў дробязях.
  • Нельга абражаць і максімальна чапляць другі бок канфлікту. Адмоўцеся ад эгаізму і ўпартасці. У нашых партнёраў таксама ёсць сваё меркаванне, пачуццё ўласнай годнасці, планы і жаданні. Шукайце агульнае. Гэта ў інтарэсах любога. Схаваная агрэсія прыводзіць не толькі да распаду сям'і, але і да шматлікіх захворванняў.
  • Калі адчуваеце, што ўнутры ўсё «закіпае» і хочацца сказаць нешта крыўднае, палічыце да дзесяці, а пакуль лічыце, прыгадайце, што гэтага чалавека вы самі выбралі сабе ў спадарожнікі жыцця, вы марылі пражыць жыццё разам. Цяпер пачынайце гаварыць.

Гэта ўсё Я!

Дзякуючы гэтаму практыкаванню, можна прааналізаваць сваю асобу, што паспрыяе падтрымцы талерантных стасункаў з навакольнымі.

Вазьміце ліст паперы і падзяліце на квадраты такім чынам:

У квадраце 1 напішыце 5 якасцяў, якія вам у сабе падабаюцца (можна адным словам, кшталту «надзейны», а можна і так: «умею сябраваць»).

У квадраце 3 напішыце 5 вашых якасцяў, якія вам не падабаюцца ў сабе.

Цяпер перафармулюйце якасці з квадрата 3 так, каб яны пачалі выглядаць як станоўчыя. Для гэтага можаце ўявіць, як гэтыя якасці назваў бы іншы чалавек, які вас вельмі любіць і якому падабаецца ў вас усё. Запішыце гэтыя перафармуляваныя якасці ў квадраце 2.

Далей уявіце, што вас хтосьці вельмі не любіць і таму нават вашы станоўчыя якасці ўспрымае як адмоўныя. Перарабіце якасці з квадрату 1 з пункту гледжання вашага злога ворага і запішыце ў квадраце 4.

Прыкрыйце далонню квадраты 3 і 4, паглядзіце на квадраты 1 і 2. Бачыце, які цудоўны чалавек атрымаўся! Паглядзіце затым на квадраты 3 і 4. Жудасная карціна: хто захоча мець стасункі з такім чалавекам?

На самай справе ўсё гэта — вы! Вы апісалі адны і тыя ж якасці, толькі з пункту гледжання сябра і ворага. Намалюйце ў цэнтры вялікую літару «Я» і прыгадвайце гэты малюнак часцей.

Святлана Барысенка

protas@zviazda.by

Загаловак у газеце: Мілыя сварацца...

Выбар рэдакцыі

Эканоміка

Тонкае мастацтва дабрабыту. Складаем сямейны бюджэт разам са спецыялістам Нацбанка

Тонкае мастацтва дабрабыту. Складаем сямейны бюджэт разам са спецыялістам Нацбанка

2020 год паставіў усіх нас перад неабходнасцю дакладна планаваць свае выдаткі.

Калейдаскоп

Вясёлыя гісторыі чытачоў

Вясёлыя гісторыі чытачоў

Класiкаў трэба ведаць…, Быў бы араты, будзе й прыганяты, Па малiну…

Эканоміка

«Мы выказалi прапановы, i нас пачулi». Як дзяржаўныя прэферэнцыi дапамагаюць падтрымаць суб'ектаў гаспадарання

«Мы выказалi прапановы, i нас пачулi». Як дзяржаўныя прэферэнцыi дапамагаюць падтрымаць суб'ектаў гаспадарання

У бiзнес-колах Гродзеншчыны лiчаць, што меры па падтрымцы эканомiкi з'явiлiся своечасова.