Вы тут

ЦВК падвяла вынікі выбарчай кампаніі ў мясцовыя Саветы дэпутатаў


Гендарная раўнавага, самы вялікі конкурс на мандат і незвычайныя скаргі выбаршчыкаў. З якімі вынікамі фінішавала сёлетняя выбарчая кампанія, абмеркавалі на пасяджэнні Цэнтральнай камісіі па выбарах і правядзенні рэспубліканскіх рэферэндумаў.


Асноўны паказчык паспяховасці выбарчай кампаніі — яўка. Сёлета яна склала больш за 77 %, да таго ж 35 % выбаршчыкаў прагаласавалі датэрмінова. Старшыня Цэнтральнай камісіі па выбарах і правядзенні рэспубліканскіх рэферэндумаў Лідзія Ярмошына падкрэсліла: «Яўка адпавядае нашым звычайным параметрам. Над ёй упарта працуюць улада, бюджэтныя ўстановы. Яўка не з'яўляецца нечаканай. Я магу сказаць, што ў грамадзян ёсць цікавасць да выбараў. Больш за тое, усе скаргі, якія паступалі да нас, змяшчалі словы «ў мяне актыўная пазіцыя, я хачу прыняць удзел у выбарах».

Усяго абралі 18 810 дэпутатаў. У адной раённай акрузе па выбарах у Ельскі раённы Савет дэпутатаў Гомельскай вобласці выбары не праводзіліся, таму што адзіны кандыдат выбыў да дня галасавання. Рэгіёнам з самым вялікім конкурсам на дэпутацкі мандат стала сталіца.

Калі намаляваць статыстычны партрэт новага складу дэпутатаў, то 48 % з іх — гэта жанчыны. Больш за палову, 56 % абраных кандыдатаў, ужо раней мелі дэпутацкія партфелі. Трэцяя частка мясцовых прадстаўнікоў улады працуе ў сферы адукацыі, навукі і аховы здароўя, кожны пяты — задзейнічаны ў сельскай гаспадарцы. 4 % ад агульнай колькасці дэпутатаў — моладзь ва ўзросце да 31 года, а 2 % — належаць да пэўнай партыі.

Самым папулярным спосабам вылучэння кандыдатаў стаў збор подпісаў. Не вельмі ахвотна кандыдаты стваралі выбарчыя фонды. Сёлета 10 % прэтэндэнтаў адкрылі ўласныя рахункі. Толькі 27 % кандыдатаў выкарысталі магчымасць выступіць на радыё. Але значна павялічылася ў параўнанні з выбарамі 2014 года колькасць масавых мерапрыемстваў, арганізаваных кандыдатамі.

Абмяркоўвалі на пасяджэнні і скаргі кандыдатаў і выбаршчыкаў. Некаторыя з іх былі досыць нестандартныя. Хтосьці застаўся незадаволены адсутнасцю тэрмінала ў буфеце выбарчага ўчастка. Адной выбаршчыцы не дазволілі па генеральнай даверанасці аддаць голас за кандыдата замест дачкі. Адказваючы на пытанне пра перспектывы рэфармавання сістэмы правядзення выбараў, Лідзія Ярмошына адзначыла: «Гэта вырашае суб'ект заканадаўчай ініцыятывы, гэта значыць — кіраўнік дзяржавы або парламент. Магчыма, што змены будуць. Пэўныя прапановы ёсць». Дата наступных выбараў у Беларусі стане вядома восенню гэтага года.

Марыя ДАДАЛКА

Загаловак у газеце: Вынікі падведзены

Выбар рэдакцыі

Грамадства

Як выхаваць даследчыка за школьнай партай?

Як выхаваць даследчыка за школьнай партай?

Чаму ўсе краіны, якія развіваюць інавацыйную эканоміку, робяць сёння стаўку на STЕM? 

Палітыка

Аляксандр Лукашэнка сустрэўся з прадстаўнікамі СМІ Расіі

Аляксандр Лукашэнка сустрэўся з прадстаўнікамі СМІ Расіі

Некалькі рэчаў сёлета адбываюцца ўпершыню.

Грамадства

Ці набудуць у гаспадароў старыя хаты?

Ці набудуць у гаспадароў старыя хаты?

Адэльскі сельскі савет, што ў Гродзенскім раёне, можна назваць брамай у Еўрасаюз.