Вы тут

У Мінску дзейнічае ўнікальная экспазіцыя віртуальнай рэальнасці «VKL3D»


У Нацыянальным гістарычным музеі на пастаяннай аснове дзейнічае ўнікальная экспазіцыя — аўтарскі праект віртуальнай рэальнасці «VKL3D». Там, надзеўшы стэрэаакуляры, можна нібыта прагуляцца па Гальшанскім і Крэўскім замках часоў іх росквіту — ХV—ХVІІ стагоддзяў. Такія адчуванні называюцца «Эфектам прысутнасці».


У рабоце па 3D-рэканструкцыі за аснову былі ўзяты старыя выявы, архіўныя тэксты, навуковыя публікацыі, даныя раскопак — усяго гэтага часта недастаткова для аднаўлення поўнай карціны з усімі дэталямі. Таму даводзілася абгрунтавана выкарыстоўваць аналагі, якіх шмат у еўрапейскай архітэктуры, натуральна, кіруючыся логікай і мастацкім густам для стварэння завершанага вобразу. Таму гэты мастацкі праект лепш вызначаць як навукова-папулярны.

Ідэйны натхняльнік і распрацоўшчык дадзенай праграмы Ахрэм Белабровік вырашыў ажывіць замкавыя муры. І зрабіць так, каб па лесвіцах, па замкавым пляцы, па галерэях прагульваліся паны і паненкі, служылыя людзі. Такім чынам быў зроблены праект «Кунтушы маляваныя. Адзін дзень з жыцця Сапегаў». Была распрацавана сюжэтная лінія — якія падзеі маглі разгортвацца ў замку цягам аднаго дня. У ролі гістарычных персанажаў выступілі некаторыя папулярныя беларускія блогеры, медыйныя асобы, удзельнікі музычнага калектыву «Тутэйшая шляхта».

Атрыманыя фотаздымкі былі накладзены на 3D-выявы замка. Атрыманыя карціны надрукаваны ў стэрэафармаце пры падтрымцы кампаніі «Стэрэасвет». Ахрэм Белабровік расказаў карэспандэнту «Звязды» пра тое, як ствараўся гэты праект:

— Усё ішло даволі простым шляхам. Былі пытанні, чаму ў замках, панарамы якіх мы бачым, няма людзей. Тэхнічна ўставіць іх у саму панараму было даволі складана. Таму прыдумалі асобна стварыць малюнкі, а на іх дадаць персанажаў. Мы сустрэліся з ансамблем «Тутэйшая шляхта», з «Майстэрняй уражанняў», якія і сталі аднымі з галоўных удзельнікаў праекта. Спачатку меркавалася зрабіць адну, дзве ці тры выявы, аднак дзякуючы сумеснаму крэатыву выпрацаваўся сцэнарый. Малюнкі ідуць у храналагічнай паслядоўнасці і расказваюць пэўную гісторыю. Атрымаўся цэлы дзень з жыцця колішніх насельнікаў замка. Зроблены таксама і ролік з гэтымі выявамі.

Персанажамі «Аднаго дня з жыцця Сапегаў» сталі лідар гурта «Lіtу Tаlеr» дудар Дзяніс Шматко, блогер Ася Паплаўская, журналіст Юлія Пранчакова, мастак-рэканструктар Ледзі Олвэн з дзецьмі, Анастасія Велесава і нават яе сабака Яхант.

— Нашу гісторыю трэба паказаць цікава, нестандартна. Толькі гэтым можна зачапіць людзей, — кажа Ахрэм Белабровік. — Мы робім гэты праект не для вузкага кола зацікаўленых асоб, а для ўсіх. У свой час я нават не думаў пра стэрэаакуляры, аднак, калі зразумеў, што можна зацікавіць людзей віртуальнай рэальнасцю, прапанаваў у такім выглядзе прадставіць нашы замкі. А ў новых карцінах выкарыстана функцыя стэрэа. Мяркую, што сама галаграфія можа зацікавіць кагосьці, а следам — і наша гісторыя.

Сцэнарый «Кунтушоў маляваных» заснаваны на рэальных падзеях гісторыі — знаёмстве і пачатку раману маршалка слонімскага Юрыя Трызны з Рэгінай, сястрой гаспадара Гальшанскага замка Паўла Стафана Сапегі.

«На жаль, людзі не надта цікавяцца гісторыяй, — рэзюмуе Ахрэм Белабровік. — Хтосьці думае, напрыклад, што нашы замкі будавалі замежнікі. Аднак гэта ж зрабілі нашы ўласныя продкі! У суседзяў здымаюць мульцікі пра Смаленск, пра Суворава, іншыя робяць анімаваную гісторыю Польшчы... На гэтым фоне мы выглядаем не так багата. А хацелася б, каб больш было творчых людзей, гатовых рабіць нешта для Радзімы. Бо цяпер у нас вельмі мала цікавага кантэнту па гісторыі, мала малюнкаў, анімацыі і іншага. Калі я гэта зразумеў, то вырашыў, што пачну з сябе. Так і распачалася мая работа над «VKL3D».

Ніна ШЧАРБАЧЭВІЧ

Загаловак у газеце: Стэрэараман Сапегаў

Выбар рэдакцыі

Грамадства

Асноўная задача — захаваць біялагічную сям'ю

Асноўная задача — захаваць біялагічную сям'ю

«Звязда» звярнулася па каментарыі аб рэалізацыі Дэкрэта Прэзідэнта № 18 да старшынь профільных камісій абедзвюх палат Нацыянальнага сходу Беларусі.

Грамадства

Аповед жанчыны, якая здолела вярнуць дачку з сацыяльнага прытулку

Аповед жанчыны, якая здолела вярнуць дачку з сацыяльнага прытулку

Жанчыну, якая здолела не толькі вярнуць дзіця з прытулку, але і далей выхоўвае яго, знайсці аказалася не проста. 

Грамадства

Чаму зараз варта далей трымацца ад вадаёмаў?

Чаму зараз варта далей трымацца ад вадаёмаў?

Люты больш нагадвае пазачарговы вясновы месяц.

Грамадства

Якую літаратуру здаюць у букіністычныя крамы?

Якую літаратуру здаюць у букіністычныя крамы?

Калі звычайныя кнігарні працуюць па формуле «кніга — чалавек», то букіністычныя трымаюцца на прынцыпе «людзі — кнігі — людзі».