Вы тут

Адносіны Беларусі і Канады знаходзяцца на першаснай стадыі


Аб гэтым заявіла намеснік старшыні Савета Рэспублікі, нацыянальны каардынатар па дасягненні Мэт устойлівага развіцця Мар'яна Шчоткіна на сустрэчы з Надзвычайным і Паўнамоцным Паслом Канады ў Польшчы і Беларусі па сумяшчальніцтве Льюіс Скэнлан. Цікава, што гэта першая сустрэча з прадстаўнікамі Канады ў верхняй палаце Нацыянальнага сходу.


«На мой погляд, кантакты паміж Канадай і Беларуссю знаходзяцца толькі на пачатковай стадыі, — сказала Мар'яна Шчоткіна. — Вядома, тое, што ў нас гандлёвы абарот складае менш за 50 млн долараў, — гэтага вельмі недастаткова. Я са шкадаваннем адзначыла, што тавараабарот упаў. І нават за кароткі перыяд 2019 года тавараабарот знізіўся амаль на 50 %».

Фота БелТА.

Намеснік старшыні Савета Рэспублікі паведаміла, што гэты паказчык склаў менш за 10 млн долараў. На яе думку, гэта сведчыць аб тым, што Беларускай гандлёва-прамысловай палаце і канадскім партнёрам неабходна наладзіць большае ўзаемадзеянне.

Віцэ-спікер верхняй палаты звярнула ўвагу, што ў Канадзе прадстаўлены інтарэсы «МТЗ» і «БелАЗа», аднак гэта ўсё ж толькі пачатак супрацоўніцтва дзвюх дзяржаў.

«У нас у парламенце створана група дружбы з Канадай, але парламенцкі складнік таксама пакуль вельмі нязначна развіты, — сказала Мар'яна Шчоткіна. — Я разумею, што ў нас гэта пачатак шляху, пачатак вялікага супрацоўніцтва, таму і Сенат, і Палата абшчын [яны складаюць канадскі парламент. — «Звязда»] таксама будуць цікавіцца супрацоўніцтвам з Беларуссю».

Намеснік старшыні Савета Рэспублікі асобна спынілася на гуманітарным складніку адносін. На яе думку, беларускія ўніверсітэты могуць зрабіць шмат для развіцця культурных сувязяў з Канадай.

Таксама віцэ-спікер выказала надзею, што Беларусі ўдасца лепш даведацца пра Канаду праз турызм. Пакуль у нас не вельмі шмат адтуль гасцей, ды і беларусы нячаста наведваюць гэтую дзяржаву. «Мяркую, турыстычныя лініі нам таксама трэба развіваць, мы будзем усяляк гэтаму садзейнічаць», — дадала яна.

Мар'яна Шчоткіна падкрэсліла: Беларусь вельмі шануе Канаду як дзяржаву і яе народ. Гэта ў тым ліку звязана з тым, што Канада адной з першых прыйшла на дапамогу пасля аварыі на Чарнобыльскай АЭС. «Гэта неацэнна, калі ты адчуваеш, што не адзін у гэтым свеце», — канстатавала намеснік старшыні Савета Рэспублікі.

Яна таксама расказала, што з захапленнем успрыняла прызначэнне Льюіс Скэнлан у якасці пасла ў нашу краіну. «Я думаю, што калі за справу бяруцца жанчыны, то гэта справа прасоўваецца значна хутчэй. Мы з вамі павінны зрабіць вельмі шмат для нашых дзяржаў і для людзей, якія жывуць у іх», — адзначыла віцэ-спікер.

Рэзюмуючы сказанае, Мар'яна Шчоткіна пацвердзіла, што Беларусь вельмі зацікаўлена ў развіцці кантактаў з Канадай — перш за ўсё парламенцкіх. Пры гэтым вялікае значэнне для нас мае наладжванне сувязяў па дасягненні Парадку дня ў галіне ўстойлівага развіцця на перыяд да 2030 года.

У адказ Льюіс Скэнлан заявіла, што для Канады найважнейшым прыярытэтам з'яўляецца развіццё эканамічных адносін. Дарэчы, інфармацыя пра іх: у 2018 годзе гандлёвы абарот паміж Беларуссю і Канадай склаў 47,5 млн долараў і скараціўся на 21,4 % да ўзроўню 2017. Істотна знізілася адмоўнае сальда: з 33,8 млн долараў у 2017 годзе да 2,9 млн долараў у 2018 — у 11,5 раза.

За 2018 год з Канады паступіла інвестыцый на суму 6,9 млн долараў (79,6 % да 2017 года), у тым ліку 4,9 млн долараў прамых інвестыцый.

Уладзіслаў ЛУКАШЭВІЧ

Загаловак у газеце: Пачатак вялікага шляху

Выбар рэдакцыі

Грамадства

Карэспандэнт «Звязды» высвятляла, чаму так цёмна на асветленых вуліцах Магілёва

Карэспандэнт «Звязды» высвятляла, чаму так цёмна на асветленых вуліцах Магілёва

Вечарам прайсціся ўздоўж цэнтральнай вуліцы Першамайскай у Магілёве адно задавальненне.

Спорт

Баскетбаліст Бенджамін-Павел Дуду: У Гане мяне называлі белым

Баскетбаліст Бенджамін-Павел Дуду: У Гане мяне называлі белым

Мама Бена — беларуска, тата — ураджэнец Ганы.

Эканоміка

Куды звяртацца, калі грамадзяніну затрымліваюць зарплату?

Куды звяртацца, калі грамадзяніну затрымліваюць зарплату?

Адказ на гэта і іншыя пытанні — у гутарцы з Дзмітрыем Шаўчуком.