У п’янага мінчаніна канфіскавалі Fiat

Першае рашэнне аб канфіскацыі аўтамабіля за «п'янае кіраванне» 13 лістапада вынес суд Першамайскага раёна Мінска.

На лаву падсудных трапіў 28-гадовы кіроўца FІAT, які раней прыцягваўся да крымінальнай адказнасці за незаконны абарот моцнадзейных ці атрутных рэчываў. Яго спынілі на МКАД 27 кастрычніка. У крыві маладога чалавека выявілі 1 праміле алкаголю. Як паведамілі ў АДАІ Першамайскага РУУС Мінска, упершыню за кіраванне ў нецвярозым стане яго аштрафавалі і пазбавілі правоў 14 кастрычніка гэтага года.

На гэты раз суд прызначыў маладому чалавеку пакаранне ў выглядзе 1 года і 6 месяцаў папраўчых работ з утрыманнем 20% заробку ў бюджэт штомесяц, штраф 300 базавых велічынь (39 млн рублёў), пазбавіў правоў на тры гады і канфіскаваў аўтамабіль, за рулём якога знаходзіўся абвінавачаны. Дарэчы, FІAT, які фактычна належаў 28-гадоваму мінчаніну, зарэгістраваны на іншага чалавека. Але як адзначыла старшыня суда Першамайскага раёна Мінска Тамара Высоцкая, для суда не мае прававога значэння прыналежнасць транспартнага сродку. Зараз FІAT знаходзіцца на штрафстаянцы. Прысуд у законную сілу не ўступіў і можа быць абскарджаны на працягу 10 дзён.

Нагадаем, што закон аб канфіскацыі аўтамабіля, на якім п'яны кіроўца папаўся ў другі раз за год, уступіў у сілу 24 кастрычніка гэтага года. Цяпер суд мае поўнае права, згодна з арт. 317 прым. Крымінальнага кодэкса, канфіскаваць аўтамабіль, на якім было здзейснена гэтае злачынства (незалежна ад таго, каму ён належыць, за выключэннем выпадкаў згону).

Надзея ДРЫЛА.