У кавярні пабіў бакалы і камін

Прагулка маладога чалавека з сябрамі скончылася... дэбошам у новай кавярні.

— Кампанія ішла па лясным масіве ўздоўж вуліцы Філімонава. Праходзячы побач з адным з будынкаў, адзін з хлопцаў звярнуў увагу на новую кавярню, якую дагэтуль не бачыў. Ён зайшоў унутр, нягледзячы на забарону супрацоўнікаў службы аховы. Падняўся па лесвіцы ў залу, дзе было шмат людзей. Падышоў да стала з посудам і пачаў... біць бакалы, што там стаялі, — паведаміла падрабязнасці здарэння прэс-афіцэр Партызанскага РУУС г. Мінска Ганна Чыж-Літаш. — Убачыўшы, што да яго накіраваліся ахоўнікі, хлопец перабег у другую залу, дзе, схапіўшы палена, пачаў біць ім па шкле каміна, пакуль тое не рассыпалася. У гэты момант у кавярню падаспелі супрацоўнікі міліцыі.

Затрыманы аказаўся 19-гадовым тынкоўшчыкам. Хлопец раней ужо быў неаднаразова судзімы за хуліганства. Свой учынак ён нічым патлумачыць не мог, паўтараючы, што не ведае, дзеля чаго зайшоў у кавярню і ўстроіў там пагром. З яго слоў, у момант здарэння быў цвярозым, аднак за некалькі дзён да таго знаходзіўся ў працяглым запоі. Маладога чалавека накіравалі на абследаванне ў псіхіятрычную клініку. Прыкладная сума нанесенай шкоды склала каля 10 мільёнаў рублёў.

Сяргей РАСОЛЬКА.