У Мінску вызначыліся пераможцы гарадскога этапу рэспубліканскага конкурсу «Студэнт года — 2015». За пуцёўку ў рэспубліканскі фінал змагаліся 13 студэнтаў самых буйных сталічных універсітэтаў (шасцёра юнакоў і сем дзяўчат), якія перамаглі на аналагічных спаборніцтвах у сваіх ВНУ.
Да пачатку конкурсу ў фае Камандна-інжынернага інстытута МНС разгарнуліся некалькі інтэрактыўных пляцовак. На пляцоўцы «#Я выбіраю Мінск_БРСМ» «вырасла» маладая яблынька — сімвал Года моладзі, а дзяўчаты-валанцёры з хэштэгам, прысвечаным Мінскай гарадской арганізацыі БРСМ, прапаноўвалі ўсім ахвотным зрабіць памятнае фота на фоне цудоўнага дрэва. Зрабіць сэлфі ці групавы фотаздымак можна было таксама на пляцоўцы «Тэатр пачынаецца з вешалкі» — тут гасцей сустракалі дамы ў сярэдявечных строях і мужчыны ў фраках. На пляцоўцы меўся тэатральны рэквізіт — касцюмы і маскі, якія можна было прымераць на сябе падчас фатаграфавання. Побач размясцілася майстэрня «МіМ БДУ», дзе з дапамогай мастакоў-аквагрымёраў можна было ў лічаныя хвіліны займець цікавы фейс-арт. А па дарозе ў глядацкую залу гасцей чакала фотасушка, на якой госці маглі бліжэй пазнаёміцца з канкурсантамі.
Мінскі адборачны тур уключаў пяць конкурсаў. Яшчэ да пачатку спаборнітцваў журы выставіла ацэнкі па трох «завочных» конкурсах. Ацэньваліся «Партфоліа ўдзельніка» (матэрыялы пра дасягненні канкурсантаў у вучобе, творчасці, навуцы, спорце і грамадскай дзейнасці), аўтарскі відэаролік «Я — студэнт» і «Праект у Год моладзі» (прэзентацыя маладзёжнага праекта, рэалізаванага канкурсантам у бягучым годзе).
Пачатак вочным спаборніцтвам паклаў нумар «Каралі начной Вероны» ў выкананні... курсантаў Акадэміі МУС. Пад гэтую вядомую кампазіцыю ўдзельнікі выйшлі на сцэну ў касцюмах тэатральных і кінагерояў. Далей у конкурсе «Прэзентацы-Я» кожны з удзельнікаў расказваў пра сябе, сваю прафесію і ўніверсітэт. А ў творчай эстафеце «Маладая Беларусь» канкурсанты дэманстравалі індывідуальныя таленты — пелі, танцавалі, чыталі вершы, паказвалі гумарыстычныя сцэнкі, адным словам, спрабавалі здзівіць і прыцягнуць увагу членаў журы. Атрымалася гэта ў траіх: рашэннем журы у рэспубліканскі фінал выйшлі Вольга СЯЧКО (Беларускі дзяржаўны медыцынскі ўніверсітэт), Аляксандра МУРЗОЎСКАЯ (БНТУ) і Марына ВІШНЕЎСКАЯ (Камандна-інжынерны інстытут МНС).
А ў інтэрнэт-конкурсе «Студэнт года onlіne», які праходзіў у суполцы «Мінск—БРСМ» у сацыяльнай сетцы «УКантакце» перамагла Аляксандра Мурзоўская, якая набрала 1228 галасоў інтэрнэт-карыстальнікаў.
Надзея НІКАЛАЕВА
nіkalaeva@zvіazda.by
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.