У канцы лістапада ў Вільнюсе на сцэне Рускага драматычнага тэатра Літвы Беларускі акадэмічны музычны тэатр прадставіў балет «Клеапатра», аперэты «Лятучая мыш», «Сільва» і дзве пастаноўкі для дзяцей — «Прыгоды Кая і Герды» і «Бураціна.bу». Гэтымі спектаклямі, якія заканчваліся гучнымі апладысментамі, была пастаўлена апошняя кропка Дзён беларускай культуры ў Літве, што доўжыліся аж тры месяцы.
Афіцыйна Дні культуры Рэспублікі Беларусь пачаліся 30 жніўня сумесным выставачным праектам беларускіх і літоўскіх мастакоў «DRAUGE / РАЗАМ». Выстаўка з поспехам праходзіла ў галерэі літоўскага саюза мастакоў «Арка». Беларускую частку праекта склалі работы вядомых майстроў: жывапіс Анатоля Кузняцова, Ірыны Кузняцовай, Тамары Шэлест, Дзяніса Барсукова; графіка Веры Ягоўдзік; фотаздымкі Уладзіміра Парфянка і Аляксея Кузняцова.
— Арганізатарамі экспазіцыі сталі Нацыянальны цэнтр сучасных мастацтваў з Мінска, Пасольства Беларусі ў Літве і наша галерэя, — кажа дырэктар «Аркі», мастачка Давіле Тамкутэ. — Выстаўка «РАЗАМ» раскрывае тэмы, што аб'ядноўваюць Літву і Беларусь. У агульнай выстаўцы вельмі цікава заўважаць падабенствы і адрозненні ў творчасці літоўскіх і беларускіх мастакоў, адказваць на пытанні «Хто мы?», «Што нас раз'ядноўвае і яднае сёння?» Таму, думаю, выстаўка мае такі вялікі поспех.
У рамках Дзён беларускай культуры сваю творчасць паказалі і тэатральныя калектывы. Беларускі дзяржаўны маладзёжны тэатр прывёз гледачам Вільнюса, Шауляя, Шальчынінкая і Швянчоніса пастаноўкі не толькі для дарослых, але і для дзяцей. Так, былі прадстаўлены спектаклі «Васіліса прыгожая» і «Дзень нараджэння ваўка». Для дарослых паказалі кранальную гісторыю пра каханне «Варшаўская мелодыя» і «Казіны востраў».
— Спектакль «Казіны востраў» — гэта містычная гісторыя-прытча, якая заключае глыбокую філасофію і неўтаймаваную гульню пачуццяў, глыбока прадуманую рэжысёрскую лінію і выдатны склад акцёраў, — сказаў карэспандэнту «Звязды» вядомы літоўскі пісьменнік Адольфас Стракшыс.
Магілёўскі абласны драматычны тэатр у Вільнюс прывёз спектакль «Фрэкен Жулі». Цікавасць да гэтай пастаноўкі была не толькі таму, што яе рэжысёр — літовец Саўлюс Варнас. Гэтую драму А. Стрындберга заўсёды суправаджалі скандалы, п'есу забаранялі, пастаноўкі альбо захаплялі, альбо адштурхоўвалі. Літоўскую публіку вабіла і паведамленне, што гэты спектакль удастоены ІІІ Нацыянальнай тэатральнай прэміі Беларусі за найлепшую рэжысёрскую работу, а таксама за найлепшую рэжысуру і найлепшую жаночую ролю.
У Цяльшаі і Клайпедзе выдатна выступіў Дзяржаўны ансамбль танца Беларусі пад кіраўніцтвам Валянціна Дудкевіча.
— Прыемна, што ў творчасці ансамбля адчуваецца смелы пошук свайго харэаграфічнага почырка, імкненне да новых арыгінальных інтэрпрэтацый сталых фальклорных форм. Важна, што ўсе вобразы ствараюцца на аснове багатай спадчыны беларускага народа, — зазначыў вядомы літоўскі мастацтвазнаўца Альбертас Вайдыла.
Студэнцкі хор Беларускай акадэміі музыкі ўдала выступіў у Вільнюсе і Каўнасе на VІ Міжнародным фестывалі харавой сакральнай музыкі імя св. Якава.
Традыцыйнае Свята беларускай песні прайшло ў Вільнюсе ўжо 20-ты раз. У канцэрце прынялі ўдзел аматарскія ансамблі беларускай дыяспары з Вільнюса, Клайпеды, Вісагінаса, Шальчынінкая, госці з Латвіі. У якасці ганаровага госця на свяце выступіў Беларускі дзяржаўны ансамбль народнай музыкі «Свята».
У рамках Дзён культуры прайшлі таксама мерапрыемствы, прысвечаныя памятным датам класікаў беларускай літаратуры — Якуба Коласа і Максіма Багдановіча. Знакавай падзеяй стаў і Фестываль беларускага кіно.
— Дні беларускай культуры ў Літве скончыліся паспяхова. Трэба і ў будучыні пашыраць культурныя сувязі з нашымі суседзямі, — сказаў міністр культуры Літвы Шарунас Біруціс.
Вітаўтас ЖЭЙМАНТАС, уласны карэспандэнт «Звязды» ў Літве,
г. Вільнюс
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
