Вы тут

Аднаразовае – не значыць бяспечнае


Пандэмія дрэнна паўплывала як на здароўе насельніцтва і эканоміку краін, так і на стан навакольнага асяроддзя. На жаль, тыя добрыя вынікі ад каранціну – напрыклад, больш чыстыя вада і паветра, бо частка вытворчасцяў была зачынена, а людзі перасталі карыстацца аўтамабілямі, – былі часовымі. Усё вярнулася на кругі свая, як толькі абмежавальныя меры былі знятыя. Да таго ж мы атрымалі яшчэ і новыя экалагічныя праблемы, звязаныя з аднаразовымі адходамі. І гаворка не толькі пра ахоўныя маскі і пальчаткі, але і пра ўпакоўку.

Тыя, хто жыве па прынцыпах zero waste, не маглі не заўважыць, што купіць прадукты без упакоўкі стала нашмат цяжэй. У некаторых крамах у пластык пачалі пакаваць і хлеб, і булачкі, і гародніну з садавінай. Усё часцей прадаўцы адмаўляюцца класці гатовую прадукцыю ў тару пакупнікоў нават там, дзе раней без пытанняў пагаджаліся гэта рабіць. Тая ж сітуацыя і са сваімі кубкамі ў кавярнях. З першага погляду падаецца, што гэта правільныя меры, якія неабходны для нашай бяспекі. Эколагі ж сцвярджаюць адваротнае. Пачнем з самага відавочнага: пластыкавая тара – нестэрыльная. Ніхто не ведае, колькі разоў і хто да яе дакранаўся. Да таго ж параўнальны аналіз тэрмінаў захавання вірусу на паверхнях паказаў, што ён трымаецца даўжэй на сталі і пластыку, чым на медзі і кардоне. На пластыкавых упакоўках каранавірус можа захоўвацца больш за 72 гадзіны. Таму крыху абсурднымі выглядаюць прапановы карыстацца аднаразовымі пальчаткамі пры ўваходзе ў краму. Як яны змогуць абараніць нас? Што сапраўды неабходна, дык гэта мыць рукі, не дакранацца да твару і трымаць дыстанцыю.

Шматразовая ўпакоўка, відавочна, не толькі больш экалагічная, але і больш бяспечная. Мыла і гарачая вада эфектыўна знішчаюць вірусы і бактэрыі. Калі вы ў гэтым не ўпэўнены, можаце карыстацца пасудамыйнай машынай і сродкамі дэзінфекцыі. Аднак памятайце, што зараз лепей не дзяліцца ні з кім сваім шматразовым посудам і не дакранацца кубкам або бутэлькай непасрэдна да крана ці кафейніка ў грамадскіх месцах.

Пандэмія прытармазіла забароны на выкарыстанне аднаразовай пластыкавай упакоўкі па ўсім свеце. Так, напрыклад, у Каліфорніі (ЗША), дзе такая забарона была ўведзена яшчэ ў 2016 годзе, пакупнікі пры набыцці тавараў былі абавязаны альбо прынесці сваю тару, альбо заплаціць 10 цэнтаў за шматразовую сумку. З пачаткам пандэміі новыя правілы адмянілі на 60 дзён. Прычым пакупнікі цяпер не толькі не павінны плаціць за ўпакоўку, але і пазбаўляюцца права пакаваць набытае ў сваю тару. У адрозненне ад ЗША, Еўрапейскі саюз змог не дапусціць вяртання да аднаразовых пакетаў. Еўракамісія адмовілася зрабіць паслабленні ў заканадаўстве і прыняла рашэнне, што ЕС працягне прытрымлівацца абранай стратэгіі ў дачыненні да пластыку. Аднак некаторыя кампаніі ўсё ж выступілі супраць выкарыстання шматразовай тары па ўласным жаданні. Так, напрыклад, сетка кавярняў “Starbucks” яшчэ ў сакавіку вырашыла не абслугоўваць наведвальнікаў са сваімі кубкамі па ўсёй Вялікабрытаніі.

Яшчэ некалькі парадаў

У краме старайцеся адразу браць тое, што вам неабходна. Не трэба мацаць кожную булачку ці пачак з печывам (так рабіць увогуле нельга ніколі!). Калі ў вас ніяк не атрымліваецца карыстацца шматразовай тарай, купляйце большыя аб’ёмы прадуктаў: замест шасці пакетаў грэчкі па паўкіло – упакоўку на тры кілаграмы. Так колькасць пластыку зменшыцца ў некалькі разоў. Гатуйце дома, бо служба дастаўкі раскладвае ежу выключна ў аднаразовую тару. Спадзяюся, вы памятаеце, што і ўпакоўкі ад піцы не перапрацоўваюцца, паколькі забруджаныя тлушчам.

Друкуецца ў часопісе «Родная прырода».

Выбар рэдакцыі

Грамадства

Калі дапамога патрэбна экстранна, яе заўсёды змогуць аказаць валанцёры Чырвонага Крыжа

Калі дапамога патрэбна экстранна, яе заўсёды змогуць аказаць валанцёры Чырвонага Крыжа

Гучны гул сірэны знянацку застаў пенсіянерку Веру Васільеўну дома.

Грамадства

Хормайстр Ніна Ламановіч: Можна выходзіць замуж, калі жыццё жанчыны пасля гэтага палепшыцца

Хормайстр Ніна Ламановіч: Можна выходзіць замуж, калі жыццё жанчыны пасля гэтага палепшыцца

Галоўнаму хормайстру Вялікага тэатра 27 жніўня споўнілася 70 гадоў. 

У свеце

У «чорнай» зоне. Чаму Літву захліснула пандэмія?

У «чорнай» зоне. Чаму Літву захліснула пандэмія?

Уся Літва трапіла ў «чорную» зону заражэння каранавірусам. 

Грамадства

Страшнае слова «генацыд»

Страшнае слова «генацыд»

Для тых, хто прысвойвае сабе права быць «выключнымі», гэта рана ці позна становіцца катастрофай у маштабах народа.